17. பன்னூலாசிரியர் நூருல் ஹக் அவர்களுடனான நேர்காணல்

இந்த நேர்காணல் ஞாயிறு தினக்குரலில் வெளிவந்த திகதி - 2019.07.21

பன்னூலாசிரியர் எம்.எம்.எம். நூறுல் ஹக்கின் நேர்காணல்

நேர்கண்டவர்:- வெலிகம ரிம்ஸா முஹம்மத்

பன்னூலாசிரியர், சிரேஷ்ட ஊடகவியலாளர், ஆய்வாளர், விமர்சகர் என்ற பன்முகத்தன்மையை தமது ஆளுமையாகக்கொண்டு தமது எழுத்துப் பணியில் சுமார் (39) முப்பத்தொன்பதாவது வருடத்தில் பயணித்துக்கொண்டிருக்கும் சாய்ந்தமருது எம்.எம்.எம். நூறுல் ஹக்கின் கருத்தாடல் தினக்குரல் வாசகர்களுக்காக முன்வைக்கப்படுகின்றது.



நீங்கள் எழுத்துத் துறைக்குள் வந்த சந்தர்ப்பம் எப்படியானது? உங்களை இத்துறைக்குள் ஊக்குவித்தவர்கள் யார்?

எனது எழுத்துலக பிரவேசமென்பது எனக்குள் திடீரென உதித்ததென்றே குறிப்பிட வேண்டும். ஏனெனில், 1979களிலிருந்து நூல்கள், பத்திரிகைகள் வாசிப்போடு தொடர்புபட்டிருந்தேன். அந்தவகையில் 1981 ஆம் ஆண்டு தினபதி நாழிதளில் பிரதி வெள்ளிதோறும் வெளிவந்த இஸ்லாமிய பூங்கா பகுதியில் இஸ்லாம் மார்க்கம் சம்பந்தப்பட்ட விடயங்கள் வெளிவருவது அதிலும் குறிப்பாக சில விடயங்கள் குறித்தான பிரதிவாதங்கள் இடம்பெறுவதுண்டு. அதில் ஒன்றாக ஜும்ஆ தொழுகைக்கு ஊர்வாசிகள் 40 பேர் வேண்டுமா? அல்லது 4 பேர் இருந்தால் போதுமா? என்கின்ற தலைப்பிலான விவாதக் களத்தில் ஊர்வாசிகள் 40 பேர் வேண்டும் என்கின்ற அணியில் எனது கருத்தை பதிவிட்டிருந்தேன். அது கடந்த 1981 மே 15 ஆம் திகதி பிரசுரமாகியிருந்தது.
அதனை அடுத்து, தொடர்ந்து எழுதும் எண்ணம் எனக்குள் மேலிட்டது. யாரும் என்னை தொடர்ந்து  எழுதுங்கள் என்று ஊக்குவித்தவர்கள் என்று குறிப்பிட்டுச்சொல்லும் அளவில் இல்லாத போதிலும் எனது படைப்புக்களுக்கு இடம் வழங்கிய ஊடகவியலாளர்கள் என்ற வகையில் சிலரை இங்கு குறிப்பிட முடியும்.

 அமரர்களான எஸ்.டீ.சிவநாயகம், ஆர்.சிவகுருநாதன், எஸ்.அருளானந்தன், சிவஞானம்,  ஆர்.இரத்தினசிங்கம், கே.விஜயன், என்.நடராஜா, லீலா ராமையா, சிவா சுப்பிரமணியம்,  எஸ்.தில்லைநாதன் மற்றும் என்.எம்.அமீன், ஏ.ஜே.எம்.தாஜுதீன், ஏ.எச்.ஏ.சித்தீக் காரியப்பர், எம்.ஏ.எம்.நிலாம், ஆர்.சிவநேசச்செல்வன், தனபாலசிங்கம், ஆர்.பாரதி, என்.வித்தியாதரன்,  க.குணராசா, எம்.பி.எம்.பைறோஸ்,  சுகுமார், றம்ஸி குத்தூஸ், ஆர்.ரவிவர்மா, வாசுகி சிவகுமார், சிவ கணேஷன்,  என்.சரவணன், ஜீவா சதாசிவம், ராதா மேத்தா மேலும் மர்ஹூம்களான எம்.பி.எம்.அஸ்ஹர், எப்.எம்.பைரூஸ், புயல் ஹமீத், எஸ்.எம். மன்ஸூர்  இவர்களுள் தினகரனின் பிரதம ஆசிரியராக இருந்த ஆர்.சிவகுருநாதன் ஐயாவை மாத்திரம் முஸ்லிம் காங்கிரஸின் ஸ்தாபகத் தலைவர், சட்டத்தரணி மர்ஹூம். எம்.எச்.எம். அஷ்ரஃப் அவர்கள் 1981களில் எனக்கு அறிமுகப்படுத்தித் தந்தார்கள்.


இதுவரை வெளிவந்த உங்கள் நூல் அறுவடைகள் யாவை?

01. வலிமார்களும் வஸீலா தேடல்களும் (இஸ்லாமிய ஆய்வு - 1988 பெப்ரவரி)
02. ஈதுல் பித்ர் சிறப்பு மலர் (இஸ்லாமியம் - 1993 மார்ச்)
03. ஈதுல் அழ்ஹா சிறப்பிதழ் (இஸ்லாமியம் - 1993 ஜூன்)
04. தெரிந்த விடைகளுக்கான கேள்விகள் (அரசியல் - 1996 டிசம்பர்)
05. தீவும் தீர்வுகளும் (அரசியலும், வரலாறும் - 1998 மார்ச்)
06. சிறுபான்மையினர் சில அவதானங்கள் (அரசியலும் வரலாறும் - 2002 மே 27)
07. முஸ்லிம் பூர்வீகம் (அரசியலும் வரலாறும் - 2006 ஆகஸ்ட் 27)
08. ஈமானியப் பேரொளிகள் (இஸ்லாமிய ஆய்வு - 2009 ஜனவரி 18)
09. அரசியல் சிந்தனைத்துவமும் சமூக இருப்பும் (அரசியலும் வரலாறும் - 2011 ஆகஸ்ட் 27)
10. முஸ்லிம் அரசியலின் இயலாமை (அரசியலும் வரலாறும் - 2016 ஏப்ரல் 27)
11. யார் துரோகிகள்? - சாய்ந்தமருது உள்ளூராட்சி சபை (அரசியல் - 2017 ஒக்டோபர் 15)

இப்படியாகப் பல நூல்களை வெளியிடுவதில் நீங்கள் சிரமங்களை எதிர்நோக்கவில்லையா?

நூல்களை வெளியிடுகின்றபோது பொதுவாக இரண்டு பிரச்சினைகளை ஒரு படைப்பாளி எதிர்கொள்கின்றான். ஒன்று, நூலாக்க முயற்சியில் தேவைப்படுகின்ற கணனி மயப்படுத்தலும், அட்டைப் படத்தை தீர்மானிப்பதும் அதனை செய்தெடுப்பதும் நூலைப் பதிப்பித்துத் தருகின்ற அச்சகக்காரர்களின் காலதாமதம் என்பனவற்றைக் கடந்து வருகின்ற அழுத்தங்களிலிருந்து இலகுவாக நூலாக்கி எடுப்பதில் உள்ள சிரமங்களை பெரும்பாலான எழுத்தாளர்கள் எதிர்கொள்வதை தவிர்க்க இயலாத ஒரு பொதுவான பண்பாகவே காணப்படுகின்றன. அத்தகைய சிரமத்திலிருந்து நானும் விடுபடவில்லைதான். மற்றொன்றான நூலை வெளியிடுவதற்கு ஏற்படுகின்ற செலவீனங்களை நூலை விற்பதன் ஊடாக சரிசெய்து கொள்வதென்பதில் பல சிரமங்களை எதிர்கொண்டாலும், சிலர் அதில் வெற்றியடைவதுண்டு. அந்தவகையில், நூல்களினூடாக இலாபங்களை திரட்டாவிட்டாலும் முதலுக்கு பங்கம் வராமல் பாதுகாப்பு பெற்றிருக்கிறேன்.

உங்கள் படைப்புகளை எந்த வகையான வாசகர்களை இலக்காக வைத்து எழுதி வருகிறீர்கள்?

ஆன்மிகம், அரசியல், இலக்கியம் என்ற அடிப்படையில் எனது எழுத்தாக்க முயற்சிகள் காணப்பட்டபோதிலும் இவற்றில் இலக்கியம் தவிர்ந்த ஏனைய இரண்டு வகைகளும் குறிப்பாக முஸ்லிம் சமுகத்தின் முன்னேற்றகரமான வாழ்வு முறைமைக்கும் பொருத்தமான அரசியல் நகர்வுகளுக்கும் ஈடுகொடுக்கப்பட்டவைகளாக இருக்க வேண்டும் என்கின்ற அடிப்படையில் அதிகமாக எழுதப்பட்டவைகளாகும். அதிலும் முஸ்லிம் மக்களுக்குள் காணப்படும் தனித்த அரசியல் கட்சிகளுக்கும் தேசிய கட்சிகளுக்கும் சார்புநிலை சாராது பொதுவாக முஸ்லிம் மக்களின் நலன் குறித்த இலக்கை வைத்து எழுதுவதில் பிறழ்வுக்குள் சிக்கிவிடாது எழுதுகின்ற பண்பினைக் கடைப்பிடித்து வருகின்றேன்.

தேச அரசியல் களத்துக்கேற்ற மாற்றங்கள் நிகழ்கின்றபோது பொதுவாக எல்லா மக்களையும் விழிப்பூட்டும் வகையிலான படைப்புக்களையும் படைத்திருக்கின்றேன். இதுவே எனது படைப்பின் நுகர்வாளர்களாக முஸ்லிம் சமூகத்தைக் கட்டி வைப்பதில் அதிகமும், தேசிய அரசியலை தெளிவாக விளங்கிக்கொள்வதற்கு முனைப்புக்கொண்டு இருப்பவர்களையும் எனது படைப்புக்கள் விரும்பப்படக்கூடியதாக மாறியிருக்கின்றன என நம்புகின்றேன்.

இலக்கியத்தைப் பொறுத்தவரை எனது எழுத்துப் பயணத்தின் ஆரம்ப காலங்களில் குறைந்த எண்ணிக்கையிலான கவிதைகளை யார்த்திருந்த போதிலும் அதில் வெகுவாக வாசகர்களை சுவீகரித்துக்கொள்ள முடியவில்லை. ஆயினும், படைப்புகளை அறிமுகம் செய்யும் வகையில் எழுதப்பட்ட விமர்சனங்களும், படைப்பாளிகளை இனம்காட்டும் வகையில் என்னால் காணப்பட்ட செவ்விகளும் சிலரிடமாவது சிலாகிக்கப்பட்டு, அம்பாறை மாவட்ட எழுத்தாளர் பட்டியலில் விமர்சகர் என்ற வகையில் எனது பெயரும் குறிப்பிடப்படுவது மகிழ்வே.

ஆன்மீகம், அரசியல் தவிர்ந்த இலக்கிய நூல்களை வெளியிடாமைக்கு என்ன காரணம்?

என்னைப்பொறுத்தவரை இலக்கியம் என்றால் விமர்சனம் சார்ந்த நூலையே நான் வெளியிட வேண்டும். அவ்வாறு வெளியிடுவதன் ஊடாக ஏற்படக்கூடிய செலவீனங்களை ஈடுசெய்யும் வகையில் நூல் வெளியீட்டு விழாக்களைச் செய்து அதனை எட்டிக்கொள்ளும் வகையிலான வாசகர்கள் என்னிடம் இல்லாமைதான் இத்துறை சார்ந்த நூலை வெளியிடுவதில் நான் தயக்கம்காட்டி வருகின்றேன்.

நூல் விமர்சனங்களை எழுதும்போது ஒரு எழுத்தாளன் கடைப்பிடிக்க வேண்டிய விடயங்கள் யாவை?

ஆரோக்கியமான நூல் விமர்சனங்கள் நிகழ்த்துவது என்பது நமது நாட்டைப் பொறுத்தவரை எப்போதுமே சர்ச்சைக்குரிய ஒன்றாகவே இருந்து வந்திருக்கின்றது.  ஏனெனில், விமர்சகர்களாக தங்களை அடையாளப்படுத்திக்கொண்டவர்களில் பலர் குறித்த சில அடிப்படைகளுக்குள் நின்றுகொண்டு தமது பார்வைகளை செலுத்தி அதிலிருந்து தமது விமர்சனங்களை வெளிப்படுத்தி உள்ளனர். இதனால், நூல் வெளியீட்டு விழாக்களுக்குக் கூட யாரை விமர்சகர்களாக அழைப்பது என்பதில் எழுத்தாளர்கள் பயப்பட்ட ஒரு காலமும் எம்மைக் கடந்து சென்றிருக்கின்றது. இன்றும் அதனுடைய தாக்கமான விமர்சகர்கள் நம் மத்தியில் இல்லாமலும் இல்லை. இதன் ஒரு வெளிப்பாடாக பின்வரும் கருத்தை எடுத்து நோக்குவதின் ஊடாக இதனுடைய பயங்கரம் எளிதாக துலங்க முடியும்.

இன்று நம்மத்தியில் மூத்த எழுத்தாளர்களாகக் காணப்படுபவர்களை நோக்கி இன்றைய இளைய விமர்சகர்களில் சிலர் ஷஷஅவர்கள் படைத்ததெல்லாம் இலக்கியமே இல்லை என்றும், அவர்கள் இலக்கியத்திற்கு எதைப் பங்களித்துவிட்டார்கள் என்று உச்சத்தில் வைத்து பேசப்படுகிறார்களோ தெரியவில்லை||. என்று நையப்புடைக்கும் வாசகங்களினால் இனம்காட்டி நிற்பதைக் குறிப்பிட முடியும். பொதுவாக அந்தந்தக் காலகட்டத்தில் கொடிகட்டிப் பறந்த படைப்பாளிகள் இன்றும் நல்ல படைப்பாளிகளாகவே அடையாளப்படுத்தப்படுவதுதான் முறையாகும். ஏனெனில், ஒவ்வொரு படைப்பாளியும் அவரவர் வாழ்ந்த காலத்தில் பேசப்படுபவர்களாக மிளிர்ந்தார்கள் என்றால், அது அவர்களின் ஆளுமையான ஒன்றென்றே கருதப்படல் வேண்டும். இதுதான் தொடர்ந்தேர்ச்சியான அணுகுமுறைகளாகப் பின்பற்றப்படுவதுதான் ஆரோக்கியமான விமர்சனக் களத்திற்கு உந்துசக்தி என்பேன்.

என்னைப்பொறுத்தவரை இவைகள் சரியா, பிழையா என்று விவாதிப்பதற்கு அப்பால், ஒரு படைப்பாளி தனது படைப்பை எந்த அடிப்படையில் நின்று கருத்துரைத்திருக்கின்றான் என்பதையும் அது மக்களை எவ்வளவு தூரம் சென்றடையக் கூடியதாக தமது மொழிப் பயன்பாட்டை பிரயோகித்திருக்கின்றான் என்பதையும் அவதானித்து அதனூடாக சொல்லப்படுகின்ற விடயம், மக்கள் களத்தில் எவ்வாறான தாக்கத்தை ஏற்படுத்த வல்லது என்பது குறித்து கோடிட்டுக் காட்டக்கூடியதாக எமது விமர்சனப் போக்குகள் அமைய வேண்டுமென்பதில் நான் உறுதியாக இருக்கின்றேன். இதற்கு இசைவானவர்களையே நான் ஆதரிப்பவனாகவும் இருக்கின்றேன்.


உள்நாட்டு எழுத்தாளர்களுக்கு ஈழத்து புத்தக நிறுவனங்கள் ஆதரவு தருவதில்லை என்கின்ற குற்றச்சாட்டு முன்வைக்கப்படுகிறதே. அதற்கு நீங்கள் என்ன சொல்வீர்கள்?

இதனை நான் முழுமையாக ஏற்றுக்கொள்ளத்தான் செய்வேன். ஏனென்றால், நமது நாட்டிலிருக்கின்ற புத்தக நிறுவனங்கள் இரண்டு வகையில் அமைந்திருக்கின்றது. ஒன்று நூல்களை விற்பனை செய்யும் மையத்தை மட்டும் முன்னிறுத்தியதாகும். மற்றொன்று நூல்களை பதிப்பித்தலையும், விற்பனையையும் ஒருங்கிணைத்ததாகவும் சில பதிப்பகங்கள் காணப்படுகின்றன. இவற்றில் நூல்களை விற்பனைக்கு மாத்திரம் கொள்வனவு செய்கின்றபோது நமது நாட்டின் படைப்பாளிகளின் புத்தகங்களை குறித்த விலைக் கழிவுடன் பெற்றுக்கொள்வதோடு, அவைகள் விற்பனையாகிய பின்னரே அவற்றுக்கான கொடுப்பனவுகளை வழங்குகின்றனர். அதேநேரம், குறிப்பாக இந்தியாவிலிருந்து வரக்கூடிய படைப்பிலக்கிய நூல்களுக்கு விலைக் கழிவுடன்கூடிய முழுத் தொகையையும் முன்கூட்டி செலுத்திய பின்பே தமது நூல் நிலையத்தின் ஊடாக விற்பனைக்கு விடுகின்றனர்.

படைப்பிலக்கியங்களை வெளியிட்டுக் கொடுக்கின்ற நூல் நிறுவனங்களைப் பொறுத்தவரை பெரும்பாலும் ஆக்க இலக்கிய வெளிப்பாடு கொண்ட நூலாசிரியர்களிடமிருந்து பதிப்பிப்பதற்கான குறித்ததொரு பணத் தொகையினைப் பெற்றுக்கொண்டு அதற்கு பகரமாக பதிப்பிற்கும் நூல்களின் ஒரு பகுதியை அவர்களுக்கு கையளித்தும் விடுகின்றனர். மேற்சுட்டிக்காட்டிய இந்த இரண்டு வகையிலும் நமது நாட்டுப் படைப்பாளிகளுக்கு நமது புத்தக நிறுவனங்கள் சரியாக பங்களிப்புகளை நல்கி படைப்பாளிகளை நிலைநிறுத்துவதற்கு உதவுவதில்லை என்றுதான் குறிப்பிட வேண்டும்.


படைப்பாளர்களுடனான உங்கள் தொடர்பை எப்படி தக்கவைத்துக் கொள்கிறீர்கள்?

எனது எழுத்துலக பிரவேசத்திற்கு முற்பட்டவர்களும், பிற்பட்டவர்களும் என்னோடு இன்றுவரை தொடர்பிலிருக்கின்றனர். அதுவே நான் கால இடைவெளி மாற்றத்திற்கு அப்பால் எல்லோருடனும் பயணிக்கும் வகையில் எனது எழுத்தும், போக்கும் அமைந்திருக்கின்றது என்பதைக் காட்டப் போதுமானது. இந்தப் பண்பே படைப்பாளர்களுடனான எனது தொடர்பை நெருக்கமாக வைத்திருக்க உதவுகின்றது என்று நம்புகின்றேன்.


விருதுகள் தகுதியானவர்களுக்குத்தான் வழங்கப்படுகின்றனவா? சில படைப்புக்கள் நடுவர் குழுக்கே போவதில்லை. இதுபற்றி என்ன சொல்வீர்கள்?

விருதுகளுக்கு தகுதியான படைப்புகளுக்குத்தான் விருதுகள் வழங்கப்படுகின்றன என்று சொல்வதைவிட படைப்புக்களைப் பார்வையிடுகின்ற நடுவர் குழுக்களுக்கு தகுதியானவை என காணப்படுகின்ற படைப்பே விருதை அடைந்துகொள்கின்றது. ஒவ்வொரு படைப்பாளியும் தமது படைப்பை விருதுக்கு உரித்தானது என்று கருதித்தான் போட்டிகளுக்கு அனுப்பி வைக்கின்றனர். அது அந்த படைப்பாளிக்கு உரித்தான எண்ணமாகும். எனதொரு அனுபவத்தை நான் பகிர்ந்துகொள்ள விரும்புகிறேன்.
2006 ஆம் ஆண்டு வெளியிட்ட "முஸ்லிம் பூர்வீகம்" என்ற நூலுக்கு விருது கிடைக்கும் என்று நான் முழுமையாக நம்பியிருந்தேன். ஆனால், கிடைக்கவில்லை. நானே விருது பெறும் என நினைத்திராத ஷஷஅரசியல் சிந்தனைத்துவமும் சமூக இருப்பும்|| என்ற நூலுக்கு (2011) கிழக்கு மாகாண சபையின் விருது கிடைத்தது. விருது என்பது நடுவர் குழுவின் பார்வையில் தங்கியிருக்கின்ற ஒன்றேயன்றி வேறில்லை. ஆயினும், விருதுபெற்ற படைப்புகள்தான் உன்னதமானது என்றும் விருது பெறாதவை உயர்ந்தது அல்ல என்ற பாகுபாடும் நமக்குத் தேவையில்லை என்பதே எனது நிலைப்பாடு.

சில படைப்புக்கள் நடுவர் குழுக்கே போவதில்லை என்பதைப் பார்க்கும் போது சிலருக்கும் இவ்வாறான அனுபவம் அமைந்திருக்கவும் கூடும். இதனைத் தவிர்ப்பதற்கு சிறந்த வழி என்னவென்றால், விருதுகளுக்காக நூல்களை வெளிப்படையாக கோருவதுபோன்று போட்டிக்கான இறுதித் திகதிக்கு பின்னரும் நடுவர்களுக்கு நூல்களை கையளிப்பதற்கு முன்னரும் கிடைத்த நூல்களின் முழு விபரங்களையும் பகிரங்கப்படுத்துவதின் ஊடாக, அனுப்பி வைத்த எழுத்தாளர்கள் தமது நூல்கள் சென்றடைந்திருக்கின்றதா என்பதை உறுதிப்படுத்திக் கொள்வர். அல்லது விண்ணப்பம் கோருகின்ற ஸ்தாபனங்கள் நூல்களை அனுப்பி வைக்கின்ற போட்டியாளர்களுக்கு நூல்கள் கிடைத்தமை பற்றியான அறிவித்தலையும் போட்டியில் சேர்க்கப்பட்டதா? சேர்க்கப்படவில்லையா? என்பது குறித்தான விபரத்தையும் நடுவர் குழுவினருக்கு கையளிப்பதற்கு முதல் தெரியப்படுத்துவதன் ஊடாகவும் தமது நூல் போட்டிக்கு சென்றடைந்திருக்கின்றதா என்பது குறித்து திட்டவட்டமாக அறிந்துகொள்வதற்கு வாய்ப்பிருப்பதுடன் இவ்வாறான தவறுகள் நிகழாமல் விடுவதற்கு வழி ஏற்படுத்தும் என்று நம்புகின்றேன்.


சமவெளி வலைத்தளம் பற்றி என்ன குறிப்பிடுவீர்கள்? அச்சு ஊடகங்களை விட வலைத்தளங்கள் இலக்கியத் துறைக்கு பங்களிப்புக்களைச் செய்கின்றதா? விளக்கமாக சொல்லவும்.

வலைத்தளங்கள், அச்சு ஊடகங்களைப் பொறுத்தவரை இவை ஒவ்வொன்றின் பரிமாணங்களும், பெறுமானங்களும் வேறுபட்டவைகளாகும். அச்சு ஊடகங்களை விட இலத்திரனியல் ஊடகங்கள் முந்திக்கொண்டு தமது பரப்புரைகளை செய்கின்ற வாய்ப்பு இருக்கின்றது. இதில் செய்தியைக் குறித்தான பார்வையில் மாறுபட்ட கருத்துக்கள் இருந்தாலும், இலக்கிய கருத்துக்களை முந்திக்கொண்டு பிரசுரிப்பதினால் பிணக்குகள் தோன்றுவதற்கு வாய்ப்பில்லை. ஆனால், இந்த யுகத்தைப் பொறுத்தவரை அச்சு ஊடக வாசிப்பு குறைந்து இலத்திரனியல் ஊடகம் பார்க்கப்படுவது அதிகரித்து இருக்கின்றது. இதில் எதுவென்றாலும் இலக்கியத்தை இரசிப்பதற்கும், படிப்பதற்கும் தனியொரு விருப்பம் தேவைப்படுகின்றது. அந்த விருப்புக்கூட்டம் இலத்திரனியலிலிருக்கின்றதா? அல்லது அச்சு ஊடகத்தில் இருக்கின்றதா என்பதை ஒரு கருத்துக் கணிப்பின் ஊடாகத்தான் வெளிப்படுத்த முடியும். எழுந்தமாகச் சொல்ல முடியாது.
ஆனால், அச்சு ஊடகங்கள் கவிஞர்களை அடையாளம் காட்டித்தந்த அளவை விட இன்று எண்ணிக்கையில் அதிகமானவர்களை சமூக வலைத்தளங்களின் ஊடாக படைக்கப்படுவதிலும் அவற்றின் ஊடாக போட்டிகள் நடாத்தி பரிசுகள் வழங்குவதுமாக பல கவிதையாளர்களை நமக்கு அதிகளவான எண்ணிக்கையில் அடையாளப்படுத்தித் தந்திருக்கின்றது என்றுதான் குறிப்பிட வேண்டும். என்றாலும், ஆரோக்கியமான படைப்புக்கள் இவர்களின் ஊடாக வெளிப்பட்டிருக்கின்றதா என்பது ஒரு நீண்ட கருத்தாடலை எதிர்பார்த்து நிற்பதையும் அவதானிக்கலாம்.

உங்கள் எழுத்து முயற்சிகளுக்கு கிடைத்த பாராட்டுக்கள், பரிசுகள், விருதுகள் பற்றிக் கூறுங்கள்?

• வெற்றி மாத சஞ்சிகையின் ஞாபகர்த்த விருது (2002)
• தென்கிழக்கு ஆய்வு அமையம் இஸ்லாமிய ஆராய்ச்சி மன்றம் இணைந்து வழங்கிய இளம் இலக்கியவாதிக்கான விருது (2002)
• அபாபீல்கள் கவிதாவட்டம் ஹாதிபுல் ஹுதா - நேரிய எழுத்தாளர் பட்டமளித்து கௌரவித்தல் (2006)
• வார உரைகல் பொன்மலர் பதக்கம் அணிவித்து கௌரவித்தல் (2007)
• சாய்ந்தமருது பிளைங்ஹோஸ் விளையாட்டுக் கழகத்தின் வெள்ளி விழா நினைவு விருது (2007)
• இலக்கிய நூல் பரிசுச் சான்று கிழக்கு மாகாண சபை (2011)
• விமர்சன எழுத்து பணிக்கும், ஊடகப் பணிக்குமான நினைவு விருது, மருதம் கலைக்கூடல் மன்றம் (2015)
• உலக இஸ்லாமிய தமிழ் இலக்கிய மாநாடு, இலக்கிய பங்களிப்பை கௌரவித்து வழங்கப்பட்ட விருது (2016)
• சுவதம் பாராட்டு கலாசார அலுவல்கள் திணைக்களம் (2017)

சக எழுத்தாளர்களுக்கு நீங்கள் சொல்ல விரும்பும் செய்தி என்ன?

எழுத்தாளர்கள் பல வகைப்படுவார்கள். அவர்கள் கால்பதிக்கும் துறையைப் பொறுத்து அவர்களின் ஆளுமை வெளிப்படுவதுண்டு. ஆதலால், நான் இருப்பதுபோல்தான் அடுத்தவரும் இருக்க வேண்டுமென கட்டளை இடுவது முறையல்ல. பொதுவாக அவரவர் தேர்ந்தெடுத்துக்கொண்ட படைப்பின் வடிவத்தில் அக்கறை கொள்வதும் தமது கருத்துக்கள் மக்களிடம் தாம் எழுதிய இலக்கில் சென்றடைய வேண்டும் அல்லது புரியப்படல் வேண்டும் என்ற உணர்வு மிக முக்கியமானது.

பன்மைத்துவ வாசிப்புக்காக படைப்பது என்ற கோட்பாட்டில் எழுதுவதிலும் படைத்தபின் படைப்பாளி செத்து விடுகின்றான் என்ற கோட்பாட்டை சரிகாண்பதிலும் எனக்கு பிடிமானம் குறைவு. கருத்து திணிப்பின்றி படைப்பாளிகள் அவரவர் ஏற்றுக்கொண்ட சித்தாந்தத்தில் தரித்து கொள்வது தவறான போக்கல்ல என்பதே எனது தீர்மானம்!!!

நேர்கண்டவர்:- வெலிகம ரிம்ஸா முஹம்மத்