44. எழுத்தாளர் சிறீ சிறீஸ்கந்தராசா அவர்களுடனான நேர்காணல்

 எழுத்தாளர் சிறீ சிறீஸ்கந்தராசா அவர்களுடனான நேர்காணல்

நேர்கண்டவர்:- வெலிகம ரிம்ஸா முஹம்மத்

உங்களைப் பற்றிய அறிமுகத்தை எமது வாசகர்களுக்காகக் கூறுங்கள்?

எனது இயற் பெயர் அம்பலவாணர் சிறீஸ்கந்தராசா, எனக்கு நானே வைத்துக்கொண்ட பெயர் சிறீ சிறீஸ்கந்தராசா. இந்தப் பெயரிலேயே எனது ஆக்கங்களை எழுதி வருகின்றேன். என் முகத்தை மட்டுமல்ல எனது முகவரியையும் மறைத்துக்கொள்ளத்தான் எனக்கு விருப்பம். இருந்தபோதிலும் ஒரு ஆவணப்படுத்தலுக்காக இங்கே பதிவு செய்கிறேன். நான் இல. 419, கொழும்புத்துறை பிரதான வீதி, யாழ்ப்பாணம் என்ற முகவரியில் தற்போது வசித்து வருகின்றேன்.

உங்கள் ஊர், கல்லூரி வாழ்க்கை, தொழில் அனுபவங்களையும் பகிர்ந்துகொள்ளலாமே?

யாழ்ப்பாணத்தில் இருந்து ஏறத்தாழ 03 கிலோமீட்டர் தொலைவில் உள்ள கொழும்புத்துறை என்ற கிராமமே எனது கிராமம் ஆகும். இப்பகுதியில் வீதிகள் விருத்தியாக முன்னர் யாழ்ப்பாணத்துக்கான பொருட்கள் கப்பல் மூலம் கொழும்பில் இருந்து வந்திறங்குவதால் கொழும்புத்துறை என்ற காரணப் பெயரைப் பெற்றது. இதன் எல்லைகளாக மேற்கில் பாண்டியன்தாழ்வு, கிழக்கே அரியாலையும், வடக்கே நல்லூரும், தெற்கே பாசையூரையும் கொண்டுள்ளது.

பிறப்பிடம் கொழும்புத்துறை என்ற போதும் காலச் சக்கரம் வீசிய சுழற்சி வேகத்தில் பூநகரி என்னும் இன்னொரு கிராமத்தில் எனது பெற்றோர்கள் கமத்தொழில் செய்வதற்காகக் குடிபெயர்ந்தார்கள். அதனால் நானும் அங்குதான் எனது ஆரம்பக் கல்வியை பூநகரி மகா வித்தியாலயத்தில் பெற்றுக்கொண்டேன். உயர் கல்வியை யாழ் மத்திய கல்லூரியில் பெற்றுக்கொண்டேன். உயர் தரம் கலைப் பிரிவில் தமிழையும் ஒரு பாடமாகக் கற்றுக்கொண்டேன்.

காலச் சக்கரம் தொடர்ந்து சுழல்கின்றது. எனக்கு பல்கலைக்கழக அனுமதியும் கிடைக்கின்றது. அதேவேளை தொலைத்தொடர்புத் திணைக்களத்தில் வேலையும் கிடைக்கின்றது. அன்று எடுத்த முடிவுதான் இன்று என்னை இந்த நிலைக்கு உயர்த்தி வைத்திருக்கின்றது. பட்டப் படிப்பினை எப்போதும் தொடரலாம். ஆனால் வேலை வாய்ப்பு எப்போது கிடைப்பதில்லை. கொழும்பில் தொலைத்தொடர்பு திணைக்களத்தில் நல்லதொரு வேலையில் அமர்ந்தேன்.

1983 இல் நிகழ்ந்த இனக்கலவரம் என்னையும் யாழ்நகர் நோக்கிக் கப்பல் ஏற்றிவைத்தது. மீண்டும் ஒரு முடிவு எடுத்ததன் காரணமாக ஐரோப்பிய நாடுகளில் ஒன்றுக்குச் செல்வதற்கு வாய்ப்பும் வசதியும் கிடைத்தபோதும், முகாம் வாழ்க்கை, வதிவிட அனுமதி கிடைப்பதில் தாமதம் காரணமாகவும், உடனே கையில் காசு பார்க்க வேண்டிய ஆசையில் மத்திய கிழக்கு நாடொன்றுக்கு (சவூதி அரேபியா) பயணமானேன். ஏறக்குறைய இருபத்தைந்து வருடங்கள் குடும்ப உறவுகளோடு வாழும் சந்தோசமான வாழ்வைத் தொலைத்துவிட்டு இணைய முகாமையாளராகக் (Nநுவுறுழுசுமு யுனுஆஐNஐளுவுசுயுவுழுசு) கிழித்துக் குப்பை கொட்டிவிட்டு வாழ்நாள் முழுவதும் மாத்திரைகள் தவறாமல் எடுத்துக்கொண்டேயிருக்க வேண்டிய நோய்களுடன் வீடு வந்து சேர்ந்தேன்.

இலக்கியத் துறையில் ஆர்வம் ஏற்படக் காரணமாக அமைந்த விடயம் என்ன?

அவ்வேளை எனக்குள்ளேயும் ஒரு கவிஞன், ஒரு விமர்சகன், ஒரு ஆய்வாளன் இருக்கின்றான் என்பதனை என்னால் கண்டுகொள்ள முடியவில்லை. வேலை நேரம் தவிர்ந்த வேளைகளில் கவிதைகள், கட்டுரைகள், தமிழ் இலக்கிய நூல்கள் போன்றவற்றை வாசிக்கக்கூடிய சந்தர்ப்பங்களும் கிடைத்தன.

கவிச்சக்கரவர்த்தி, பாரதி, பாரதிதாசன், கண்ணதாசன், மு. மேத்தா, வைரமுத்து, காசி ஆனந்தன், புதுவை இரத்தினதுரை ஆகியோர் கனவில் வந்து ஆசி கூறி வாழ்த்திச் சென்றார்கள். கண்ணதாசன் மட்டும்தான் என் அருகிருந்து எழுத்தாணி தந்து என்விரல் பிடித்துக் கவிதை எழுதக் கற்றுத் தந்தார். குருவுக்கு என் முதல் வணக்கம்!

உங்களது முதற் படைப்பு எப்போது, எதில் வெளியானது?

1982 களில் இலங்கை வானொலி ஷஷமங்கையர் மஞ்சரி|| என்ற நிகழ்ச்சியில் கவிதைப் போட்டி நிகழ்ச்சி ஒன்றுக்கு திருமதி இராஜேஸ்வரி சண்முகம் அம்மையார் ஒரு தலைப்புத் தந்தார். 

தென்னை மரநிழலில் தென்றல் வீசுகையில் 

கன்னம் குழிவிழவே காத்திருப்பாள் எனக்காக

என்ற எனது கன்னிக் கவிதை போட்டியில் முதலிடம் பெற்றமையால் அந்த நிகழ்ச்சியில் எனது கவிதை ஒலிபரப்பாகியது.

காத்திருப்பாள் எனக்காக!

செக்கல் சிவக்கையிலே செவ்வந்தி சோருகையில்

பக்கத் துணையின்றி பறவையினம் வாடுகையில்

கத்தும் கடலங்கே கரைமோதி மீளுகையில்

கன்னம் குழி விழவே காத்திருப்பாள் எனக்காக!

துள்ளும் மீனினமும் துடிக்குதம்மா துணையின்றி

மருளும் மானினமும் மயங்குதம்மா உறவின்றி!

தென்னை மரநிழலில் தென்றல் வீசுகையில்

கன்னம்குழி விழவே காத்திருப்பாள் எனக்காக!

இதற்கு முன்னரும் கவிதை என்ற பெயரில் ஏதேதோ எல்லாம் எழுதியிருக்கிறேன். ஆயினும் இந்தக் கவிதை மட்டுமே என் நினைவேட்டில் பதிவாகியிருக்கிறது. இந்தக் கவிதைக்கு இப்போது வயது நாற்பது. தொடர்ந்து எனக்கு களம் அமைத்துத் தந்து என் எழுத்துக்களை அங்கீகரித்து வானொலியில் ஒலிபரப்பிய பெருமை வெரித்தாஸ் வானொலியைச் சாரும். இது பிலிப்பைன்ஸ் நாட்டின் குவிசோன் நகரில் இருந்து ஒலிபரப்பாகியது. இதில் ஒலிபரப்பாகிய எனது கவிதைகள் பெரும்பாலும் விடுதலையை வேண்டி நிற்கும் ஒரு இனத்தின் விழிப்புணர்வுக் கவிதைகளாகும்,

நீள் துயில் நீங்காய்!

ஓமென ஒலித்தன உயிரினம் யாவும்

உயர் கிளைச் சேவல் ஊதின சங்கம்

மாநிலம் எங்கும் மகிழ்ந்தது பாராய்

மண்மிசை தென்றல் தவழ்ந்தது சீராய்!

தீயினில் வெந்த செந்தமிழ் ஈழம்

சிரித்திடும் காலை வந்தது காண்பாய்

புண்ணிய நிலமே புன்னகை புரிவாய்

பொன்னடி பணிந்தோம் பூந்துயில் நீங்காய்!

இந்தக் கவிதைகள் எல்லாம் எனது இன்னொரு கவிதைத் தொகுப்புக்காகக் காத்திருக்கின்றன.

அண்மையில் வெளிவந்த உங்களது தராசு முனைகள் நூல் பற்றிக் குறிப்பிடுங்கள்?

2022.05.08 ஆம் திகதி தராசு முனைகள் நூல் வெளியாகியது. இந்த நூலின் நுழைவாயில் என்னும் பகுதியில் தராசு முனைகள் என்ற தலைப்பின் கீழ் இங்கே 20 நூல் மதிப்பீடுகள் பதிவாகி இருக்கின்றன. இவை பெரும்பாலும் காற்றுவெளி (இலண்டன்) என்னும் மின்னிதழில் அவ்வப்போது வெளியானவையாகும். இந்த நூல் தராசு முனைகள் என்று மகுடம் தரித்திருந்தாலும் கூரிய கத்தி முனையிலிருந்தே கடுந்தவம் செய்திருக்கிறேன். நான் காயம்பட்டாலும் நூலாசிரியர்கள் காயம்பட்டுவிடக் கூடாது என்பதில் மிகக் கவனமாக எடை போட்டிருக்கிறேன். தராசு முனைகள் என்றும் நீதி வழுவாத தீர்ப்புகளையே இங்கே வழங்கியிருக்கின்றது என்று என் சுயநினைவோடு இத்தால் உறுதி கூறுகிறேன்.

கவிதை, சிறுகதை நூல்களையே எழுத்தாளர்கள் முதன் முதலாக வெளியிடுவது வழமை. இப்படியிருக்கும் போது நீங்கள் புத்தக விமர்சனங்கள் அடங்கிய நூலை வெளியிட விசேட காரணம் என்ன?

இது மிகவும் பெறுமதி மிக்க ஒரு கேள்வியாகும். 2022 இல் வெளிவந்த தராசு முனைகள் என்ற நூல் விமர்சனங்களடங்கிய தொகுதியே எனது முதலாவது நூல் வெளியீடாக அமைகிறது. இந்நூல் வட மாகாண பண்பாட்டு அலுவல்கள் திணைக்களத்தினரால் தெரிவு செய்யப்பட்டு அவர்களின் நிதி அனுசரணையோடு அச்சிடப்பட்டு வெளிவந்திருக்கிறது,

இருந்தாலும் கவிதைகள் என்ற வகையில் நூறு கவிதைகள் அடங்கிய தொகுப்பு ஒன்று "என் சிறகுகளை விலை பேசாதீர்கள்" என்ற தலைப்பில் தேசிய கலாசாரப் பிரிவினரால் (செத்சிரிபாய) தெரிவு செய்யப்பட்டு பதிப்பாகத் தயாராகிக் கொண்டிருக்கிறது என்ற தகவல் அறியக் கிடைத்தது மிக்க மகிழ்ச்சியைத் தருகிறது. 

எனது நூல் விமர்சனங்கள் அடங்கிய இரண்டாவது தொகுப்பின் அச்சு வேலைகள் தற்போது நடைபெற்றுக் கொண்டிருக்கின்றன என்பதனையும் இவ்விடத்தில் பதிவு செய்வது மிகப்பொருத்தமானதாக அமையும் என்று நினைக்கின்றேன்.

நூல் விமர்சன ஈடுபாட்டுக்கு, வழிகாட்டியாக இருந்தவர்கள் குறித்துக் குறிப்பிடுங்கள்?

விமர்சனத் துறை என்று சொல்வதற்கில்லை. கவிதைகள், செய்யுள்கள் பற்றிய விபரிப்பு, விளக்கம், நயந்துரைத்தல் என்ற வகையில் கலைஞர் அவர்களின் சொல்லாட்சியில் எனக்கொரு கவர்ச்சி ஈடுபாடு இருந்தது உண்மை. ஒவ்வொரு நூலின் விமர்சனத்தையும் நான் எழுதும் போது இத்தகைய ஒருவித கவிதை நடையுடனான சொல்லாட்சியை நான் கையாண்டிருப்பதனை தராசு முனைகள் வாசிக்கும்போதே உணர்ந்து கொள்வீர்கள்.

நீங்கள் நூல் விமர்சனங்களை எழுதும் போது கவனிக்கும் முக்கியமான விடயங்கள் பற்றி என்ன சொல்வீர்கள்? 

ஒரு நூலைக் கையில் எடுத்தவுடன் அந்த நூலாசிரியரின் பெயரை மட்டுமல்ல அவரின் முகத்தையும் முற்றாக மறந்துவிடுவேன். அடுத்து, வடிவம், நடை (சொந்தப் பாணி) சொல்லாட்சி, பிறமொழிக் கலப்பு, இறுதியாக அந்த நூல் இந்த சமூகத்துக்குச் சொல்ல வந்த செய்தி என்ன? இத்தகைய எடுகோள்களை முன்னிறுத்தி எனது விமர்சனத்தை எழுத ஆரம்பிப்பேன்.

இதுவரை எத்தனை நூல்களுக்கான விமர்சனங்களை எழுதியுள்ளீர்கள்? அவை பற்றிப் பொதுவாகக் குறிப்பிடுங்கள்?

விமர்சனம் என்ற வகையில் இதுவரை 50 க்கும் மேற்பட்ட நூல்களுக்கு விமர்சனம், மதிப்பீடு, அணிந்துரை, ஆய்வுரை என்று எழுதியிருக்கிறேன். முதன் முதலில் நண்பர் இசாறுதீன் அவர்களின் மழை நதி கடல் என்ற கவிதைத் தொகுப்பிற்கு வாழ்த்துரை எழுதியிருக்கிறேன்.

வாசகர்களிடையே உங்களது நூல் விமர்சனங்களுக்கான வரவேற்பு எந்தளவில் உள்ளது?

இதற்கான பதிலை தங்களைப் போன்றவர்கள்தான் சொல்ல வேண்டும். ஆனால் ஒன்று மட்டும் உண்மை. என் கவிதைகள் பற்றி ஒரு கவிதையில் நான் இப்படி எழுதியிருக்கிறேன்.

இன்னும் 

இரண்டாயிரம் வருடங்களுக்குப் பின்னர் 

என் வழித்தோன்றல் ஒருவன் 

என் கவிதைகளைத் தோண்டி எடுப்பான்.

அவனுக்காக 

இவற்றை ஆவணப்படுத்துகிறேன்..

இது எனது கவிதைகளுக்கு மட்டுமல்ல எனது விமர்சன நூல்களுக்கும் பொருந்தும்!

நூல் கண்ணோட்டம், மதிப்புரை, விமர்சனம், திறன் நோக்கு, நூலாய்வு இவ்வகையான சொற்றொடர்களிடையே ஏதாவது வித்தியாசத்தைக் காண்கின்றீர்களா?

என்னைப் பொறுத்தவரையில் மதிப்பீடு, விமர்சனம் ஒத்த கருத்தும் பொருளுமுள்ள சொற்கள்தான். ஆய்வு, திறனாய்வு என்பது இந்த வகைக்குள் அடங்குவன அல்ல. ஆனால் இவையிரண்டும் இன்னொரு பொருளும் அர்த்தமும் உள்ள சொற்கள் என்பது எனது கருத்தாகும்.

நூலாய்வு என்றால் அந்த நூலை பிச்சுப் பிடுங்கி, வெட்டிக் கிழித்து, சத்திர சிகிச்சை செய்வதற்கு ஒப்பானதாகும். இதன் விளைவு அந்த நூலைப் படிக்க வேண்டும் என்ற ஆசையைக் குறைத்துவிடும் என்பது எனது கருத்தாகும். நூலை மதிப்பீடு செய்யும்போது அந்த நூலைத் தேடிப் பிடித்து படிக்க வேண்டுமே என்ற ஆவல் மேலெழ வேண்டும்.

உங்கள் படைப்புகளுக்கு களம் தந்த ஊடகங்கள் பற்றி?

எனது படைப்புகளுக்கு களம் தந்ததோடல்லாமல் ஆக்கமும் ஊக்கமும் கொடுத்த வளர்த்தெடுத்த பெருமை (அந்நாளைய) இலங்கை வானொலியையே சாரும். அத்துடன் மண் விடுதலை பற்றிய கவிதைகளுக்கு களம் தந்து, ஒலிபரப்பிய பெருமை பிலிப்பைன்ஸ் நாட்டின் குவிசோன் நகரில் இருந்து ஒலிபரப்பாகிய வெரித்தாஸ் வானொலியைச் சாரும். தொடர்ந்து ஏறக்குறைய 50 நூல்களுக்கு மேல் எழுதிய மதிப்பீடுகளை தனது மின்னிதழ்களில் பதிவு செய்து என்னை மேலும் ஊக்கப்படுத்திய பெருமை லண்டனில் இருந்து வெளியாகும் காற்றுவெளி மின்னிதழுக்கும் அதன் ஆசிரியர் தி. முல்லை அமுதன் அவர்களுக்கும் சாரும்.

விமர்சகர்கள் பக்கச் சார்பற்று நடுநிலையாக செயற்படுவதென்பது சாத்தியமாகுமா?

களத்துக்கு வந்த பின்னர் கருணை காட்டாதே. போற்றுவார் போற்றட்டும். புழுதி வாரித் தூற்றுவார் தூற்றட்டும். போகட்டும் கண்ணனுக்கே. இதனைத்தான் எனது பாணியில் இப்படி எழுதுவேன். முகஸ்துதி பாட வேண்டுமென்பதோ அல்லது மட்டம் தட்ட வேண்டும் என்பதுவோ எமது நோக்கமன்று!

மொழிபெயர்ப்பு நூல்களையும் விமர்சனம் செய்துள்ளீர்களா? ஏனைய இலக்கிய நூல்களை விமர்சனம் செய்வதிலிருந்து மொழிபெயர்ப்பு நூல்களை விமர்சனம் செய்யும் போது உங்களது கண்ணோட்டம் எப்படி அமைகிறது?

என்றாவது ஒரு நாள் என்ற கீதா மதிவாணன் எழுதிய ஒரு மொழிபெயர்ப்பு நூலுக்கு நான் எழுதிய மதிப்பீட்டில் பின்வருமாறு குறிப்பிட்டுள்ளேன். மொழிபெயர்ப்பு என்பது பளிங்குத்தரையில் நடனமாடும் ஒரு விதக் கலையாகும். இதன் பொருள், தடுமாறிக் கீழே விழாமல் இருப்பதுடன் அழகாகவும் ஆடத்தெரிய வேண்டும் என்பதாம். மொழிபெயர்ப்பின்போது கவனத்தில் கொள்ள வேண்டிய சில கூறுகளை அறிவது அவசியம். மூலமொழியின் இயல்புக்கும் நடைக்கும் ஏற்ப மொழிபெயர்ப்பு மொழியாகிய பெறுமொழியின் இயல்பும் நடையும் அமைதல் வேண்டும். ஷஷமொழிபெயர்ப்பாளர்கள் துரோகிகள்|| என்றும் வரையறை செய்கிறது ஒரு இத்தாலியப் பழமொழி. தழுவல், சுருக்கம், மொழியாக்கம், நேர்மொழிபெயர்ப்பு என்பவற்றை மொழிபெயர்ப்பின் வகைகளாகக் கொண்டாலும் நேர்மொழிபெயர்ப்பே இலக்கிய மொழிபெயர்ப்பாக அமைய முடியும்.

நூல்களை விமர்சனம் செய்யும் படைப்பாளிகளுக்கு நீங்கள் கூறும் அனுபவச் செய்தி என்ன?

ஒரு நூலைக் கையில் எடுத்தவுடன் அந்த நூலாசிரியரின் பெயரை மட்டுமல்ல அவரின் முகத்தையும் முற்றாக மறந்து விடுங்கள் என்பதையே கூறிக்கொள்ள விரும்புகின்றேன். 

பரந்து விரிந்த தமிழ் இலக்கியப் பரப்பில் நீங்கள் ஈடுபாடு காட்டும் ஏனைய துறைகள் பற்றியும் குறிப்பிடலாமே?

ஈழத்து தமிழ் இலக்கிய வரலாறு, தமிழிசையின் தோற்றமும் வரலாறும், இலகு முறையில் யாப்பிலக்கணம் போன்ற துறைகளில் எனக்கு அதிகமான ஈடுபாடுகள் இருக்கிறது.

இலக்கியத் துறையில் பயணிக்கும் நீங்கள் சமகாலப் படைப்பாளிகளின் போக்குத் தொடர்பாகவும் இளந்தலை முறையினரின் படைப்புகள் தொடர்பாகவும் கூற விழைவது?

எல்லோரும் எழுதுங்கள். தரமனதாக எழுதுங்கள். உனக்குத் தெரிந்ததை மட்டும் எழுது. தெரியாத அமெரிக்காவைப் பற்றி எழுதாதே. மேலும் ஒன்று சொல்லுகிறேன். வெறும் புனைவுகளில் கவனம் செலுத்தாதீர்கள். எப்போதும் யதார்த்தமான படைப்புகளே நிரந்தரமாகும்.

இலக்கியத் துறையில் உங்களுக்குக் கிடைத்த வரவேற்புகள் பற்றிக் கூற முடியுமா? 

அப்படி ஒன்றும் குறிப்பிடத்தக்களவில் பெரிதாக ஒன்றும் கிடைக்கவில்லை. எழுத்து உலகம் உடனேயே என்னை அங்கீகரிக்கவுமில்லை. எத்தனையோ தடவைகள் என்னை ஏமாற்றியது. மட்டம் தட்டியது. நான் அவற்றைக் கண்டுகொள்ளவில்லை. தற்போதுவரை எனது பயணத்தை சீராகத் தொடர்ந்து செல்கிறேன். 

இலக்கிய வாழ்வில் மறக்க முடியாத விடயம் ஒன்று பற்றிக் குறிப்பிடுங்கள்?

2018 - 2019  கொழும்புத் தமிழ்ச் சங்கத்தில், தமிழ்ப் பட்டயக் கற்கைநெறி பயின்றேன். தமிழிசையின் தற்காலச் செல்நெறி எனும் தலைப்பின்கீழ் ஆய்வுக் கட்டுரை சமர்ப்பித்தேன். அதனை மேலும் விரிவாக்கம் செய்து அடுத்த பதிப்பாகக் கொண்டுவர எண்ணியுள்ளேன்.

நிறைவாக என்ன கூற விரும்புகிறீர்கள்?

20 வருடங்கள் நான் செய்த தவமே தராசு முனைகள் என்ற நூலாக இன்று வரமாகக் கிடைத்திருக்கிறது. இந்த நூலில் இருக்கும் ஒவ்வொரு எழுத்தினையும் மிகவும் நுட்பமான உளிகொண்டு செதுக்கியிருக்கிறேன். செதுக்கலின்போது காயங்கள் பட்டிருக்கின்றேன். கல்லெறிகளும் வாங்கியிருக்கின்றேன். ஆனாலும் புறமுதுகு காட்டவில்லை. மாறாத தழும்புகளோடும் ஆறாத வடுக்களோடும் இன்றும் களத்தில் நிற்கின்றேன். என்னைப் புறந்தள்ளிய இந்த உலகத்தை நான் புறம்காண வேண்டும் என்ற வெறியில் வலிகளைத் தாங்கிக் கொண்டு எழுதுகிறேன். இது எனது முதல் முயற்சி. எனது எழுத்துக்கள் விமர்சன உலகில் தனக்கென்று ஒரு தடம் பதிக்கும் என்பதனை இவ்விடத்தில் மிகுந்த நம்பிக்கையோடு உறுதிபடக் கூறுகிறேன்!!!

நேர்கண்டவர்:- வெலிகம ரிம்ஸா முஹம்மத்

43. கவிஞர் மூதூர் கலைமேகம் (ஏ.எஸ். இப்றாகீம்) அவர்களுடனான நேர்காணல்

கவிஞர் மூதூர் கலைமேகம் (ஏ.எஸ். இப்றாகீம்) அவர்களுடனான நேர்காணல்

நேர்கண்டவர்:- வெலிகம ரிம்ஸா முஹம்மத்

உங்களைப் பற்றிய அறிமுகத்தை எமது வாசகர்களுக்காகக் கூறுங்கள்? 

நான் மூதூர் கலைமேகம் எனும் பெயரில் எழுதும் ஏ.எஸ். இப்றாகீம், முத்துக் குளிக்கும் மூதூர் என்னும் கிராமத்தில் 1943.07.09 ஆம் திகதி பிறந்தேன். எனது சிறுபராயத்தில் என் தந்தை இறந்த பிறகு என் வளர்ப்புத் தாயின் அனுசரணையில் வளர்ந்தேன். மூதூர் அன்றைய முஸ்லிம் மகா வித்தியாலயம் இன்றைய தேசிய கல்லூரியில் ஆரம்பக் கல்வியை உயர்தரம் வரை கற்க முடியாத நிலையில் விவசாயத் தொழிலில் ஈடுபட்டு, இடைநிலைக் கல்வியை 03 ஆண்டு காலம் வரை கொழும்பு றோகண வித்தியாலயத்தில் தபால் மூலம் கற்றேன். இப்படி கற்றது கை மண்ணளவு கல்லாதது உலகளவு என்ற ரீதியில் எழுந்தே சீவியம் எழிமையே வாழ்க்கை என்றே தாரக மந்திரத்துடன் தற்போது வரை இயங்கிக்கொண்டிருக்கின்றேன். 

தங்களுக்குள் ஓர் இலக்கியவாதி தோன்றுவதற்கான குடும்பப் பின்னணி, இளமைப் பருவம் போன்றவற்றை முதலில் கூறுங்கள்? 

எனது குடும்பப் பின்னனியை உற்று நோக்கும் போது எனது தந்தையின் தந்தை ஒரு புலவராகும். இவர் இந்திய நாட்டின் காயல் பட்டினத்ததில் பிறந்து வாழ்ந்தவரன்றாலும் மூதூரில் மறுதாரமாக எனது வாப்பும்மாவைத் திருமணம் செய்து இங்கும் வாழ்ந்திருக்கிறார். இவர் பெயர் கலிபா சாகிபு ஆகும். அந்தவகையில் புலவர் பரம்பரையில் தோன்றிய நானும் இன்று இலங்கையில் பேசப்படும் ஒரு கவிஞனாக மிளிர்கிறேன்.

உங்களது தொழில் அனுபவங்களைப் பகிர்ந்துகொள்வீர்களா? 

எனது தொழில் என்று பார்க்கும் போது அது பல்வேறு வகையான தொழில்களாகவே அமைந்தது. அதிலும் விவசாயம் மற்றும் வியாபாரம் போன்றவை குறிப்பிடடுச் சொல்லக் கூடியது. 

உங்களது முதற்படைப்பு எப்போது எதில் வெளியானது? அந்தப் படைப்பு பற்றியும் சுருக்கமாகக் குறிப்பிடுங்கள்? 

எனது முதல் படைப்பு தினகரன் சிறுவர் மலர், இளைஞர் உலகம் போன்ற பகுதிகளில் 1962 ஆண்டுகளில் சிறுபடைப்பாக வெளிவந்தது. இதன் பிற்பாடு இலங்கை தேசிய பத்திரிகையான தினபதி கவிதா மண்டலப் பகுதியில் பிரபல கவிஞர் ஈழமேகம் அவர்களின் சிபாரிசில் பிரசுரம் பெற்றது. முதல் கவிதையான பைங்கிளியே என்ற தலைப்பில் இடம்பெற்றதைத் தொடர்ந்து ஏராளமான கவிதைகள் எழுத நேர்ந்தது. இப்படிப்பட்ட முதுகவிஞர்களின் வழிகாட்டல்கள்தான் என்போன்ற கவிஞர்கள் உதயமாவதற்குக் காரணமாக அமைந்தது. 1967 இல் பைங்கிளியே என்ற கவிதை எனது முதல் கன்னிப் படைப்பாகும்.

'மூதூர் கலைமேகம்' இந்தப் புனைப் பெயரை எப்படித் தேர்வு செய்தீர்கள்? புனைப் பெயரின் பின்னணியை அறிந்துகொள்ளவே இதனைக் கேட்டேன்? 

கலைமேகம் என்ற புனைப் பெயர் திருமலை வள்ளுவர் கலை வட்டம் 1969 ஆம் ஆண்டு கிழக்கு மாகாண மட்டத்தில் நடாத்தப்பட்ட கவிதைப் போட்டியில் மனித வாழ்க்கை என்ற தலைப்பில் முதலாம் இடத்தைப் பெற்றதையிட்டு கலைமேகம் என்ற விருது வழங்கப்பட்டது. இதன்பிறகு தொடர்ந்து எனது ஆக்கங்கள் யாவும் மூதூர் கலைமேகம் என்ற பேரில் இடம்பெற்று இன்று வரை நிலைத்து நிற்கின்றன எனலாம். 

நீங்கள் எந்தெந்த இலக்கியத் துறைகளில் இயங்கி வருகிறீர்கள்? 

நான் அனேகமாக கவிதை, சிறுகதை, கட்டுரை, ஆகிய முத்துறைகளும் என்னைக் கவர்ந்தனவாகும். ஆகவே தான் இந்த இலக்கியத் துறைகளைத் தேர்ந்தெடுத்தேன். இதுவரை 30 க்கும் மேற்பட்ட சிறுகதைகள், நூற்றுக்கும் மேற்பட்ட கட்டுரைகள், ஆயிரத்துக்கும் அதிகமான மரபுக் கவிதைகள் போன்றவற்றைப் படைத்துள்ளேன். அத்தோடு காவியம், நாடகம் எனவும் எழுதியுள்ளேன் என்பது குறிப்பிடத்தக்கதாகும். 

உங்களைக் கவிதை எழுதத் தூண்டிய சம்பவம் பற்றிக் குறிப்பிடுங்கள்?

என்னைக் கவிதை எழுதத் தூண்டிய சம்பவம் அதாவது 1956 இல் எமது பகுதி 6 ஆம் வட்டாரத்தில் படித்த வாலிபர்கள் ஒன்று சேர்ந்து அமைத்த சங்கமானது சமூகசேவை, விளையாட்டு, வாசிகசாலை போன்ற பணிகளை ஆரம்பித்து இக்பால் சனசமூக நிலையம் என்ற பெயரிட்டு 25 வருட காலம் இயங்கியது. அதில் நானும் உறுப்பினராக இணைந்து நூலகர் பதவியை எடுத்து அதன் மூலம் பல வாசகர்களை உருவாக்கினேன். நானும் வாசிப்பை மேற்கொண்டு கவிதை நூல்கள், சிறுகதை நூல்கள், நாவல்கள் என்று வார, மாத சஞ்சிகைகளை வாசித்து இன்று ஒரு கலை இலக்கியவாதியாக வளர்ந்துள்ளேன். வாசிப்பே உயிர் மூச்சு. அதன் நேசிப்பே எழுத்து வன்மை. இதுவே நான் என்னை எழுத்தாளராக ஆகுவதற்குக் காரணமாக அமைந்தது. 

ஆயிரத்துக்கும் மேற்பட்ட கவிதைகளை எழுதியுள்ள நீங்கள் ஒரு சிறந்த கவிதை எவ்வாறு இருக்க வேண்டும் என்ற கேள்விக்கு எப்படிப் பதில் சொல்வீர்கள்? 

பல கவிதைகளை எழுதிய நான் ஒரு சிறந்த கவிதை எவ்வாறு இருக்க வேண்டும் என்பதை விளக்கும் போது அது முதலில் கவிதை கவிதையாகயிருக்க வேண்டும் என்றே கூறுகிறேன். அத்துடன் ஓசை, நயம், எதுகை, மோனை, அணிநடை என்ற அம்சங்கள் கவிதையில் இருக்க வேண்டும். அப்போதுதான் நல்ல கவிதை உருவாகும். வாசிக்க ஆசை ஏற்படும். இத்தன்மை இல்லாத எந்தக் கவிதையும் கவிதையாக இருக்கவே முடியாது. 

காதல் கவிதைகளை எண்ணிக்கையில் அதிகமாக எழுதியிருக்கிறீர்களே. இதற்கான காரணம் என்ன? 

மனித வாழ்க்கையில் காதலும் ஒரு அம்சமாககத் திணிக்கப்பட்டுள்ளது. கல்யானத்துக்கு முன் காதல் புரிவதும் கல்யாணம் செய்த பின்னர் காதல் புரிவதும் கண்ணியமான முறை என அக்கால நடிகர் என் எஸ் கிருஸ்ணண் ஒரு முறை கூறியுள்ளார். ஆகவே காதலுக்கு முக்கியத்துவம் வழங்குவது தவறில்லை என்றே நான் கூறுவேன். இருமனம் கலந்தால் திருமணம் நிறைவேறும். எனவே காதலும் வளர வேண்டும் கண்ணியமும் நிறைய வேண்டும் என்பதே நான் கண்ட காரணமாகும். 

மரபுக் கவிதைகளை மனதில் நிறுத்தி வைத்துக்கொள்வது மாதிரி புதுக் கவிதைகளை நினைவில் நிறுத்திக்கொள்ள முடியுமா? 

மரபுக் கவிதைகள் மனதில் நிச்சயம் பதியக் கூடியதாக இருக்கும். கவிஞர் கண்ணதாசன் பாரதியார் போன்றோரின் கவிதைகள், பாடல்கள், இன்றும் என்றும். மரபுதான் நினைவலையாக இருப்பதற்குச் சான்றாக அமைகிறது. இந்த அடிப்படையில்தான் நானும் ஏராளமான கவிதைகளை மரபு சார்ந்து எழுதுவதற்கு முக்கியத்துவம் கொடுத்துள்ளேன். தற்போதைய புதுக் கவிதைகளை மனதில் வைப்பது முடியாத காரியமாகும். என்னைப் பொறுத்தமட்டில் யாரும் தவறாக நினைக்க வேண்டாம் புதுக் கவிதை எனச்சொல்லி புது மொழிகள் சில வளர்கிறது. கவித்துவம் காணாதவர்கள் கூடிவிட்டார்கள் புதுக் கவிதையும் இதுபோல் பெருகிவிட்டது. எனவே இனிவரும் காலந்தான் மரபா புதுமையா? என்பதற்குப் பதில் சொல்லும். காத்திருப்போம். 

இதுவரை வெளிவந்த உங்களது நூல் அறுவடைகள் பற்றிச் சொல்லுங்கள்? 

இதுவரை நான் வெளியிட்ட நூல்கள் இரண்டு கவிதைத் தொகுப்புகள் மற்றும் ஒரு காவியம் குறுந்தொகுப்பு நூல். இன்னும்மொன்று முத்துறை சார்ந்த ஒரு ஆவண நூல். அவையாவன:-

01. தங்கப் பாளம் - கவிதை (2003) 

02. மகரந்தம் - கவிதை (2004)

03. வன்செயல் - காவியம் (2006)

04. கலைச்சரம் - ஆவண வகைத் தொகுப்பு (2022) 

என்ற 04 நூல்களையே இதுவரை வெளியுட்டுள்ளேன். இதுவே எனது நூல் அறுவடைகளாகும். 

தங்கப் பாளம் கவிதை நூல் பற்றி விசேடமாகக் குறிப்பிட விரும்புவது என்ன? 

தங்கப் பாளம் நூல் பற்றி நான் கூறுவதன்றால் அது ஒரு பெரிய கதையாகும். அதாவது 50, 60 செய்யுள்கள் இறைந்த கவிதைகளை சேகரித்து வைத்திருந்த நான் இதனை நூல் உருவாக்க எண்ணி முயர்ச்சித்த வேளை நிதி இன்மையினால் நூல் வெளியிடாத நிலையில் தத்தளித்தபோது என்னைப் பற்றி நவமணியில் உடதலவின்னையைச் சேர்ந்த புன்னியாமீன் அவர்கள் கலைஞர் அறிமுகம் பகுதியில் பிரசுரித்த வேளை அவர்கள் கேட்டுக்கொண்டதிற்கு இணங்க தங்கப் பாளம் நூலில் உள்ள கவிதைகளை அவரிடம் ஓப்படைத்தேன். சில மாதங்களின் பின் புன்னியாமீன் அவர்கள் தாமாக முன்வந்து எனது கவிதைகளை தங்கப் பாளம் என்ற கவிதை நூலாக அச்சிட்டு, எனக்கு 500 நூல் பிரதிகள் அவர் செலவில் அன்பளிப்பு செய்தார். அதனை அவரின் ஊரிலும் வெளியிட்டு பின்னர் நானும் எனது ஊரான மூதூரிலும் வெளியிட்டேன். இதன் மூலம் எனக்குப் பாரிய வரவேற்பும் கிடைத்தது. இந்த மகிழ்சியான நிகழ்வு 2003 ஆம் ஆண்டில் இடம்பெற்றது. 

மகரந்தம் கவிதை நூலில் உள்ளடங்கியுள்ள கருப்பொருட்கள் பற்றிக் குறிப்பிடுங்கள்?

மகரந்தம் கவிதை நூலில் உள்ள கருப்பொருட்கள் பற்றிக் குறிப்பிடுவதன்றால் இன்னும் ஒரு நூல் தயாரிக்க வேண்டும். என்றாலும் சுருக்கமாகக் கூறின் அதில் வரும் அம்சங்கள், சமூக கண்னோட்டம், காதல், தமிழ் வளர்ச்சி கல்வி, கலாசாரம் போன்றவற்றை மையமாகக் கொண்டது. 

உங்களது கவிதைகள் சிறுகதைகள் மற்றும் கட்டுரைகள் அடங்கிய தொகுப்பு நூலொன்று கலைச்சரம் என்ற பெயரில் அண்மையில் வெளியிடப்பட்டதாக அறிகின்றேன். இந்த நூல் பற்றியும் குறிப்பிடுங்கள்? 

எனது இறுதியாக வெளிவந்த சிறுகதைகள், கட்டுரைகள், கவிதைகள் அடங்கிய நூலே கலைச்சரம் என்பதாகும். இந்த நூல் கடந்த 2022 ஏப்ரல் மாதம் 26 ஆம் திகதி அன்று எமது குடும்ப நலநிதியம் மதார் நம்பிக்கை நிதியத்தின் மூலம் அதன் தற்போதைய தலைவர் எம்.எம். றபீக் அவர்களின் விடாமுயற்சின் காரணமாக என்னை கௌவரவிக்கும் நோக்கதில் என்னால் கடந்த காலங்களில் எழுதி பத்திரிகையில் பிரசுரிக்கப்பட்ட சில ஆக்கங்களைத் தேர்ந்தெடுத்து மேற்குறிப்பிட்ட கலைச்சரம் நூல் வெளியிடப்பட்டது. இக்குடும்ப நல உறவுகள் இணைந்த இந்நிதியம் சுமார் 15 வருடங்கள் நிறையுற்று இயங்குகிறது. இது ஒரு முத்துறை சார்ந்த புதுமைப் படைப்பாகும். இதுவே இதன் சரிதமாகும். 

உங்கள் நூல்களுக்குக் கிடைத்த விமர்சனங்களாக எவற்றை முன் வைப்பீர்கள்? 

நான் வெளிட்ட நூல்களில் வாசகர்கள் மத்தியில் இருந்து பாராட்டு விமர்சனங்களே பெரிதும் கிடைத்தன. கீழ்த்தரமாக எவரும் எனது நூல் பற்றிக் குறிப்பிடவில்லை. எனது நூல்கள் பெரும்பாலும் இலக்கியக் கண்ணோட்டத்தில் எழுதப்பட்டவையாகும். ஆகவே வாசகர்களால் எனது நூல்கள்பெரிதும் வரவேற்கப்பட்டன. 

நவீன வாழ்க்கையில் இவ்வளவு மாற்றங்களுக்குப் பிறகும் ஒரு கவிஞனுக்கும் இயற்கைக்கும் (நிலா, கடல், மழை, மரம்) இருக்கும் அல்லது உருவாகும் உறவு என்பது மட்டும் ஏன் அப்படியே இன்னும் மாறாமல் இருக்கிறது ?

நவீன வாழ்க்கையில் ஒரு கவிஞனுக்கும் இயற்கைக்கும் உள்ள ஒற்றுமை விளக்கப் போனால் கடலும் வானமும் எப்படி இனையாதோ அதுபோலவே என்றும் மாறாது அது அப்படியே இன்றும் இருக்கும். கவிஞனும் இயற்கைக்கும் உள்ள உறவு என்றுமே நிலைத்திருக்கும். இதனால்த்தான் இன்றும் இவை இரண்டும் சேர்ந்து இருப்பதற்குக் காரணமாகின்றது. 

இயற்கையை கவிஞர்கள் அளவுக்கு அதிகமாக நேசிக்கிறார்கள் என்ற சலிப்பு வாசகனுக்கு வந்துவிட்டதாக நினைக்கின்றேன். இதுபற்றி என்ன சொல்வீர்கள்?

இயற்கையோடு கலந்தவன்தான் கவிஞன். சுருக்கமாகக் கூறின் சந்திரனும் வெள்ளியும் எப்படி இனைந்து ஒழி பகர்கிறதோ அதுபோலவே இயற்கையும் கவிஞனும் இனைந்து சலிப்படையா பல்லாயிரக் கணக்கான கவிதைகளைப் படைக்கிறான். அந்தவகையில் இயற்கையில்லாது கவிதை இல்லை என்ற முடிவு நிச்சயம் உருவாகும். எனவே வாசகன் வளர வேண்டுமென்றால் கவிஞனையும் இயற்கையையும் நம்பித்தான் ஆகவேண்டும். இதுவே எனது அபிப்பிராயமாகும். 

இப்போதும் பத்திரிகைகளில் கவிதைகள், சிறுகதைகள் எழுதுவதுண்டா? 

நான் பத்திரிகைகளில் சுமார் ஒரு வருட காலமாக எனது சுகயீனம் காரணமாக எழுத முடியாத நிலையில் இருந்ததால் அதனைச் சற்று நிறுத்திக்கொண்டேன். என்றாலும் அவ்வப்போது பிறரின் உதவிகொண்டு ஆக்கங்களைத் தயாரித்து இடையிடையே பிரசுரத்திற்கு அனுப்பிக்கொண்டுதான் இருக்கிறேன். 

நீங்கள் எழுதிய சிறுகதைகள் குறித்தும் குறிப்பிடுங்கள்? சிறுகதைகளுக்கான கருப்பொருட்களை எப்படித் தேர்ந்தெடுக்கின்றீர்கள்? 

நான் அதிகமாக கவிதைகளையே எழுதியுள்ளேன். சிறுகதைகளைப் பொறுத்தமட்டில் கணிசமாகக் குறைவாகவே படைத்துள்ளேன். சிறுகதைகளில் எனக்குள்ள மோகம் தான் இந்த அளவாவது படைக்க முடிந்தது. இதன் கருப்பொருட்கள் மனித நடைமுறையில் ஏற்படும் சம்பவங்கள் மனதைத் தொடும் போது இதன் சாராம்சத்தை கற்பனை கொண்டு எழுத முற்படுகின்றேன். எந்த எழுத்தாளனும் கருவைத் தெளிவாக சிறுகதைகளில் பதிய வைக்கிறார். இது ஒரு அனுபவ ரீதியான தன்மையைக் குறிக்கும். இந்த அடிப்படையில்தான் ஒரு சில சிறுகதைகளை என்னால் படைக்க நேர்ந்தது.  

உங்களது எழுத்துக்களின் படி நிலை வளர்ச்சி பற்றிக் கூறுங்கள்?

நான் சிறுவயதிலிருந்தே வாசித்து பழக்கப்பட்டேன். அந்தவகையில் பல நூல்களை நுகர்ந்த படியால் எழுதும் நிலைக்கு உந்தப்பட்டேன். காலவட்டத்தில் அது ஒரு கலையாக வளர்ந்து. இன்று என்னை ஆட்கொண்டுவிட்டது. இதற்கு நான் எடுத்த பெரும் முயற்சிதான் காரணம். அத்தோடு சந்தர்ப்பமும் சூழ்நிலையும் பொருந்தியதால்தான் எனது படிநிலை வளர்ச்சி கண்டது. 

அக்காலங்களில் சமூக ஊடகங்களில் வெளிவருகின்ற கவிதைகளைப் பற்றி என்ன கூற விரும்புகின்றீர்கள்? 

அக்காலத்தில் வெளிவந்த ஏடுகள் இலக்கிய ரசம் மிகுந்தவைகளாக இருந்தது. நல்ல இலக்கியவாதிகளும் நிறைந்து காணப்பட்டதால் அக்காலத்தில் வெளிவந்த ஆக்கங்கள் எல்லோரையும் கவர்ந்தன. அத்தோடு சிறந்த கவிஞர்கள் படைத்த கவிதைகளும் மனதைத் தொட்டன. இதுவேதான் நானும் லயித்ததற்கு காரணமாகும். நல்ல மரபு சார்ந்த கவிதைகள் நிறைய வெளிவந்ததால் என்போன்ற வாசகர்கள் இன்று கவிஞர்களாகவும் திகழ நேர்ந்தது. 

வளர்ந்து வரும் இளம் படைப்பாளிகளுக்கு தாங்கள் கூறும் செய்தி என்ன? 

தற்போது வளர்ந்துவரும் இளம் படைப்பாளர்கள் பரந்து பெரிகிவிட்டன. கம்பெடுத்தவன் சண்டைக்காரன் போல் எவரையும் சரியாக இனங்கான முடியவில்லை. தற்போது வாசகர்கள் குறைவு. படைப்பாளிகள் அதிகம். எனவே இலக்கிய இரசனை இல்லாத ஆக்கம் உப்பில்லாப் பண்டம் போன்றது. இளம் படைப்பாளிகள் வளரவேண்டுமானால் இலக்கியம் சார்ந்த நூல்களையும் நிறைய வாசித்து எல்லோரையும் கவரும் வண்ணம் ஆக்கங்கள் படைக்க வேண்டும். இதுவே எனது அறிவுரையாகும். 

இலக்கிய உலகில் நீங்கள் கண்டறிந்த அல்லது உங்களுக்கு வெளிப்பட்ட உண்மையாக நீங்கள் கருதுவது எதை? 

இலக்கிய உலகில் நான் கண்டறிந்த நன்மைகள் ஏராளம். அதாவது அறிவு ஆற்றல், எழுத்து வன்மை, ஒற்றுமை உறவு இப்படி நீண்ட அனுபவங்களைக் கண்டறிய வைத்தது எனலாம். இன்னும் இதன்மூலம் ஏராளம் அறியவேண்டி உள்ளது. இலக்கியம் என்பது இனிமை தரும் தோட்டமாகும். இதை பின்பற்றியவர்கள் ஒருக்காலும் சோடை போக மாட்டார்கள். இதை விவரிக்க எழுத்தால் முடியாது. இதற்குள் சென்றால்தான் உண்மை விளங்கும். இதைவிட வேறு எதையும் நான் கூறுவதற்கில்லை. 

இலக்கியப் பங்களிப்புக்காக இதுவரை தாங்கள் பெற்ற கௌரவங்கள், பாராட்டுகள், பரிசுகள், விருதுகள் பற்றிக் கூறுங்கள்? (பட்டங்கள், விருதுகளைக் குறிப்பிடும் போது எந்த அமைப்பு எத்தனையாம் ஆண்டு தந்தது என்ற விபரத்தையும் கட்டாயம் சேருங்கள்) 

இலக்கியத் துறையில் இதுவரை எனக்கு கிடைத்த விருதுகள் பற்றி கூறுவதென்றால் 

01. கலைமேக விருது - திருகோணமலை வள்ளுவர் வட்டம் (1969)

02. பொற்கிழி - தேசிய மீலாத் விழா (2004)

03. கலாபூஷணம் - முஸ்லிம் கலாச்சாரத் திணைக்களம் (2007) 

04. ஆளுனர் விருது - கிழக்கு மாகாண சபை (2007)

05. கலாசூரி - தினகரன் தினமின விழா (2007)

06. கலாதீபம் - திருகோணமலை நகர நூலக சபை (2008)

07. கலைமுரசு - மதார் நம்பிக்கை நிதியம் (2008)

08. கலைநேசன் விருது - மூதூர் மதார் நம்பிக்கை நிதியம் (2009)

இவைதவிர கொழும்பு கலதாரி ஹோட்டலில் இடம்பெற்ற ஹாசிம் உமர் நூல் வெளியீட்டு நிகழ்வு மற்றும் இன்னும் பல கலை இலக்கியப் போட்டிகளிலும் கலந்து ஏராளமான பரிசில்களும் சான்றிதழ்களும் பெற்றுள்ளேன். 

இந்த நேர்காணல் மூலம் வேறு என்ன கூற விரும்புகிறீர்கள்? 

இந்த நேர்காணலில் என்னை சக்கை போட்டு வாட்டிவிட்டீர்கள். (எனது வயது அப்படி அதனால்தான் இப்படிக் குறிப்பிட்டேன்). இதனால் நான் சளைக்கவில்லை. என்றாலும் தங்களின் கேள்விகளுக்கு என்னால் முடிந்தமட்டில் பதில் அளித்துள்ளேன். இதில் வரும் சம்பவங்களை முடிந்தவரை எனது ஞாபகத்தின்படி தந்துள்னே;. என்னையும் ஒரு ஆளுமையாக இணங்கண்டு நேர்காணல் செய்தமைக்காக எனது நன்றிகைளையும் எத்தி வைக்கிறேன். அத்துடன் பத்திரிகை நிறுவனத்தார்களுக்கும் என் நன்றிகள் உரித்தாகட்டும். 

நேர்கண்டவர்:- வெலிகம ரிம்ஸா முஹம்மத்

42. கவிஞர் வி. மைக்கல் கொலின் அவர்களுடனான நேர்காணல்

 கவிஞர் வி. மைக்கல் கொலின் அவர்களுடனான நேர்காணல்

வெலிகம ரிம்ஸா முஹம்மத்

உங்களைப் பற்றிய அறிமுகத்தை எமது வாசகர்களுக்காகக் கூறுங்கள்? 

முதற்கண் எனது வணக்கங்களும் வாழ்த்துக்களும். என்னைப் பற்றிய அறிமுகம் கேட்கிறீர்கள். தமிழகத்தில் அண்மையில் வெளிவந்த  ஷஷகாக்கை வன கவிஞர்கள்' தொகுப்பில் என்னைப் பற்றி வெளிவந்துள்ள சிறு குறிப்பையே எனது அறிமுகமாகத் தருகிறேன். 

திருகோணமலையைப் பிறப்பிடமாகவும் மட்டக்களப்பை வசிப்பிடமாகவும் கொண்ட கவிஞர் வி. மைக்கல் கொலின் தனது மாணவப் பருவத்தில் (14 வயது) இருந்தே படைப்பாக்க முயற்சிகளில் ஈடுபட்டு வருகின்றார். கவிதை, சிறுகதை, நாவல், விமர்சனம், குறும்படம், பத்திரிகைத் துறை, சஞ்சிகை வெளியீடு, நூல் வெளியீடு என பல்துறை ஈடுபாடுடைய இவரது முதல் புதுக்கவிதைத்தொகுப்பு 

"என் பிரிய ராஜகுமாரிக்கு" 1992 இல் வெளிவந்தது. 2018 இல் இவரது "பரசுராம பூமி" என்ற சிறுகதைத் தொகுப்பும் 2019 இல் "சிலுவைகளே சிறகுகளாய்" என்ற கவிதை நூலும் 2021 இல் "வீணையடி நீ எனக்கு" என்ற நாவலும் மூன்றாவது கவிதை நூலான "இவனைச் சிலுவையில் அறையுங்கள்" என்ற நூலும் நான்காவது கவிதை நூலான "எழுதித் தீரா பிரியங்களும்" வெளிவந்துள்ளது. 

1985 - 1995 வரை திருகோணமலையில் "தாகம்" என்ற கலை இலக்கிய இதழை வெளியிட்டு வந்த இவர், 1995 இல் மட்டக்களப்பபில் "ஃபீனிக்ஸ்" நவீன தமிழ் கவிதா இதழையும் வெளியிட்டார். இவர் 2012 தொடக்கம் மட்டக்களப்பில் 'மகுடம்' என்ற  கலை இலக்கிய சமூக பண்பாட்டு காலாண்டிதழின் ஆசிரியராகவிருந்து வெளியிட்டு வருகிறார். 

இவர் 1998 இலும் - 2000 இலும் மட்டக்களப்பிலிருந்து வெளிவந்த முதல் வாரப் பத்திரிகையான 'தினக்கதிர்' வாரமலர், 'தினக்கதிர்' நாளிதழ் ஆகியவற்றின் பிரதம, இணை ஆசிரியராகவும் கடமையாற்றியுள்ளார்.

இவரது "பரசுராம பூமி" சிறுகதை நூல் 2018 ம் ஆண்டுக்கான கிழக்கு மாகாண சாகித்திய விருது பெற்றது குறிப்பிடத்தக்கது. இவர் மகுடம் பதிப்பகத்தின் மூலம் இதுவரை 60 நூல்களையும், தாகம் பதிப்பகத்தின் மூலம் 06 நூல்களையும் பதிப்பித்துள்ளார். இவர் கிழக்குப் பல்கலைக்கழக வியாபார நிர்வாகமாணி (BBA) பட்டதாரி என்பதும் குறிப்பிடத்தக்கது.

உங்கள் பாடசாலை வாழ்க்கை, தொழில் அனுபவம் பற்றியும் கூறுங்கள்? 

நான் திருகோணமலையை பிறப்பிடமாகக் கொண்டவன். எனது முதலாம் வகுப்பு தொடக்கம் உயர் தரம் வரை திருமலையின் புகழ் பூத்த பழம் பெரும் வரலாற்றைக் கொண்ட புனித சூசையப்பர் கல்லூரியில்தான் கல்வி கற்றேன். உயர் தரத்தில் வர்த்தக பிரிவில் கல்வி கற்ற நான், முகாமைத்துவ கற்கைக்கு தெரிவு செய்யப்பட்டு கிழக்குப் பல்கலையில் எனது உயர் கல்வியைக் கற்றேன். 

எனது தொழில் அனுபவம் மூன்று வகையானது. எனது பல்கலைக் கழகக் கல்வி முடிந்து வெளியேறியதும் மட்டக்களப்பின் முதல் வார வெளியீடாக வெளிவந்த தினக்கதிர் ஆசிரிய பீடத்தில் வேலை கிடைத்தது. அதன்பின்னர் 2004 ல் மட்டக்களப்பில் இயங்கிய நோர்வே நாட்டு நிதியில் இயங்கிய வேலைத் திட்டத்தில் சமூக உணர்வூட்டலாளராக ஒரு வருடம் கடமையாற்றினேன். 2005 இல் பட்டதாரிகளுக்கான அரச சேவையில் இணைந்து இன்றுவரை மனித வள அபிவிருத்தி உத்தியோகத்தராகப் பணிபுரிகிறேன்.

கலை இலக்கியத் துறைக்குள் எவ்வாறு ஈர்க்கப்பட்டீர்கள்? இத்துறையில் உங்களை ஊக்குவித்தவர்கள் பற்றி?

எனது பாடசாலை காலங்களிலேயே நான் எழுதத் தொடங்கிவிட்டேன். எனது எட்டாம் வகுப்பில் எமது தமிழ்ப் பாட ஆசிரியை திருமதி. கந்தையா அவர்களின் தூண்டுதலால் சிறுவர் வைரம் எனும் கை எழுத்துச் சஞ்சிகையை வெளியிட்டேன். அதன் தொடர்ச்சியாக தாகம் என்ற பெயரில் ஒரு இலக்கிய இதழை ரோணியோ அச்சில் வெளிக்கொணர்ந்தேன். பின்னர் தாகம் அச்சிதழாக வெளிவந்தது. இக் காலங்களில் எனது இலக்கிய ஆர்வத்தை எனது தமிழ் ஆசிரியர் திருமலை நவம் அவர்களும் தூண்டிவிட்டார்.

இற்றை வரைக்கும் எவ்வாறான ஆக்கங்களை எழுதியுள்ளீர்கள்?

கவிதை, சிறுகதை, நாவல், நாடகம், கட்டுரை என இலக்கியத்தின் பல வடிவங்களையும் தொட்டுள்ளேன்.

முதன் முதலாகக் கவிதை எழுதிய தருணம் எது?

ஆரம்ப காலங்களில் நான் கட்டுரையும், சிறுகதைகளும் எழுதிய காலத்தில் எனது தமிழ் ஆசிரியை திருமதி கந்தையா அவர்களின் தூண்டுதலால் கவிதை எழுதினேன். எனது முதல் கவிதை ஈழத்தில் இன்று மிக முக்கியமான பெண் கவிஞராக அறியப்படும் பாலையூற்று அஷ்ரபா நூர்டீன் அவர்களின் தினகரன் கவிதைச் சோலைப் பகுதியில் 1984.07.26 இல் வெளிவந்த 'மஜ்னூக்கள்' என்ற கவிதைக்கு பதில் கவிதையாக 'லைலாக்கள்' என்ற தலைப்பில் எழுதினேன். இந்தக் கவிதையே நான் எழுதிய முதலாவது கவிதை. இது தினகரன் பத்திரிகையின் கவிதைச் சோலைப் பகுதியில் 1984.08.09 இல் வெளியாகியிருந்தது. அத்துடன் இதுவே எனது முதல் கவிதைப் பிரசுரமாகவும் அமைந்தது. 

இதுவரை வெளிவந்த உங்களது நூல் அறுவடைகள் பற்றிக் குறிப்பிடுங்கள்?

இதுவரை வெளியிட்ட நூல்களாக பின்வரும் 06 நூல்களையும் குறிப்பிடலாம்.

01. என் பிரிய ராஜகுமாரிக்கு - கவிதை (1992)

02. பரசுராம பூமி - சிறுகதை (2018)

03. சிலுவைகளே சிறகுகளாய் - கவிதை (2019)

04. வீணையடி நீ எனக்கு - நாவல் (2021)

05. இவனைச் சிலுவையில் அறையுங்கள் - கவிதை (2021)

06. எழுதித் தீரா பிரியங்கள் - கவிதை (2021)

எனது முதலாவது நூல் வெளியீடும் கவிதை நூலுமான 'என் பிரிய ராஜகுமாரிக்கு' என்ற நூல் 1992 இல் வெளிவந்தது. அக்காலத்தில்தான் தமிழில் கணனி எழுத்துக்கள் அறிமுகமாகி, வீரகேசரி பத்திரிகையின் வார வெளியீடு கணனி மயப்படுத்தலோடு வெளிவந்தது. எனது கவிதை நூலின் அட்டையும் கணனி மூலமான வடிவமைப்பில் வெளிவந்தது குறிப்பிடத்தக்கது. அந்தவகையில் இது கணனி மூலமான அச்சில் வெளிவந்த முதல் கவிதை நூலானது. இதன் முன் பின் அட்டைப் படத்தினை நண்பர் கவிஞர் ஜபார் வடிவமைத்திருந்தார். பின் அட்டையில் என்னைப் பற்றிய குறிப்பினை நண்பரும் கலைஞருமான அமரர் ஸ்ரீதர் பிச்சையப்பா தனது அழகிய கையெழுத்தில் கவிதை வடிவில் எழுதியிருந்தார். முன் பின் அட்டைகள் இரு கவிஞர்களின் கை வண்ணத்தில் பெறுமதி சுமந்த இத்தொகுப்பு தாகம் பதிப்பகத்தின் ஐந்தாவது வெளியீடாக வெளிவந்தது. 

எனது இரண்டாவது கவிதை நூல் 'சிலுவைகளே சிறகுகளாய்' 2019 இல் கிட்டத்தட்ட 27 வருடங்களின் பின்னர் மகுடம் பதிப்பகத்தினால் மட்டக்களப்பில் வெளியிடப்பட்டது. இந்த நூலானது பேராசிரியர் செ. யோகராசாவின் அணிந்துரையுடனும் எழுத்தாளர் நந்தினிசேவியரின் பின்னுரையுடனும் வெளிவந்தது. மேலும் எனது சிலுவைகளே சிறகுகளாய் கவிதை நூல் 2000 ஆம் ஆண்டுக்கான தேசிய சாகித்திய விருதுக்கு பரிந்துரைக்கப்பட்ட மூன்று நூல்களில் ஒன்றாகத் தெரிவு செய்யப்பட்டதுடன் அந்த ஆண்டில் இந்திய திருப்பூர் இலக்கிய விருதுக்கும் தெரிவு செய்யப்பட்டது.

2021 ஆரம்ப காலத்தில் எனது 'வீணையடி நீ எனக்கு' என்ற நாவல் வெளியானது. 2021 இன் இறுதியில் எனது மூன்றாவது கவிதை நூலான 'இவனைச் சிலுவையில் அறையுங்கள்' என்ற நூல் தமிழகப் பேராசிரியர் அ. ராமசாமி, கிழக்குப் பல்கலைக்கழக சிரேஷ்ட விரிவுரையாளர் அருட் பணி அகுஸ்தின் நவரெட்ணம் ஆகியோரின் அணிந்துரைகளுடன் வெளிவந்தது. இதேகாலப் பகுதியில் எனது நான்காவது கவிதை நூலான 'எழுதித் தீரா பிரியங்கள்' வெளியானது குறிப்பிடத்தக்கது. 

நீங்கள் வெளியிட்ட "பரசுராம பூமி" சிறுகதை நூல் பற்றி?

பரசுராம பூமி 2018 இல் வெளிவந்த எனது முதலாவது சிறுகதைத் தொகுப்பாகும். அது வெளிவந்த ஆண்டுக்கான கிழக்கு மாகாண சாகித்திய விருதைப் பெற்றுக்கொண்டது. பரசுராம பூமியின் சிறுகதைகள் அனைத்தும் மறுவாசிப்புக் கதைகள் ஆகும். முழுக்க முழுக்க தொன்மங்களையும், இதிகாச, புராண, மறை நூல்களை மறுவாசிப்புக்கு உட்படுத்தும் தமிழின் முதல் சிறுகதைத் தொகுப்பு என்ற பிரகடனத்துடன் வெளிவந்த இந்தத் தொகுதி ஒன்பது சிறுகதைகளைக் கொண்டது. பேராசிரியர் சி. மௌனகுரு, பேராசிரியர் செ. யோகராசா, கவிஞர் ஜிப்ரி ஹசன் ஆகியோரின் அணிந்துரைகளுடன் வெளிவந்த இந்த நூலின் வெளியீடு மட்டக்களப்பிலும், அறிமுக நிகழ்வுகள் திருகோணமலையிலும், யாழ்ப்பாணத்திலும் நடைபெற்றது.

உங்கள் "சிலுவைகளே சிறகுகளாய்" கவிதை நூலின் வரவு பற்றி என்ன குறிப்பிடுவீர்கள்? இந்த நூலில் உள்ளடங்கியுள்ள கருப்பொருட்கள் பற்றியும் குறிப்பிடுங்கள்?

சிலுவைகளே சிறகுகளாய் எனது இரண்டாவது கவிதை நூலாகும். முப்பது வருடகாலமாக எமது மண்ணிலே நடைபெற்ற போராட்டம் தொடர்பான, அதன் இழப்புகள், வலிகள், வேதனைகள்  பற்றி நிறையவே பேசிய தொகுப்பு. தேசிய சாகித்திய விருதுக்கு பரிந்துரைக்கப்பட்ட மூன்று நூல்களில் (2019) முதல் நூல் இதுவாகும். இது இந்திய திருப்பூர் இலக்கிய விருதும் பெற்றது.

சமகாலமாக நாவல் இலக்கியங்களின் வரவு கணிசமாக குறைந்து வருகின்றது. அந்தவகையில் உங்களின் முதல் நாவலின் தனித்துவம் பற்றிக் குறிப்பிட முடியுமா?

"வீணையடி நீ எனக்கு" (2021) என்ற எனது முதல் நாவல் கிழக்குப் பல்கலைக்கழக வாழ்வியலை பேசும் முதல் நாவலும் ஈழத்தில் முழுக்க முழுக்க பல்கலைக்கழக வாழ்வியலைப் பேசி வெளிவந்த மூன்றாவது நாவலுமாகும். இதுவும் காதலையும், அரசியலையும் இணைத்த வகையில் திருகோணமலை, மட்டக்களப்பு என்ற இரு பிரதேசங்களையும் வைத்து எழுதப்பட்டதாகும்.

"வீணையடி நீ எனக்கு" நாவலின் மூலம் சமூகத்துக்குச் சொல்ல விரும்பும் விசேட செய்தி என்ன?

நான் எனது எழுத்துக்கள் மூலம் போதனை செய்வதில்லை. சமூகத்தில் இருந்து பெற்றதை, எடுத்ததை சமூகத்திற்கே திருப்பிக் கொடுக்கின்றேன். அந்தவகையில் "வீணையடி நீ எனக்கு" என்ற நாவல் எனது பல்கலைக்கழக வாழ்வின் அனுபவங்கள். அங்கு நான் பெற்றதையும், எடுத்ததம் எனது நாவலில் திருப்பிக் கொடுத்துள்ளேன்.

உங்களது படைப்புகள் பெண்களின் பிரச்சினைகளைப் பேசியிருக்கின்றதா?

நிறையவே பேசி இருக்கின்றது. "வீணையடி நீ எனக்கு" நாவலே முழுக்க முழுக்க பெண்களின் வாழ்வியலுடன் தொடர்புபட்ட அவர்களது பிரச்சனைகளைச் சொல்லும் நாவலாகவும்  கொள்ளலாம். இராணுவத்தால் பாதிக்கப்பட்ட ஒரு இளம் பெண்ணின் கதையாகவும் கொள்ளலாம். மேலும் இதுவரை யாருமே எழுதாத ஊர்மிளையைப் பற்றி எனது ஓர்மம் சிறுகதையில் பேசியுள்ளேன். 

ஊர்மிளை ராமாயணத்தில் இலக்குவனனின் மனைவி. 14 வருடங்கள் கட்டில் வசித்த அண்ணன் ராமனுக்கு துணையாக இலக்குவன் சென்றுவிடுகிறான். காட்டில் ராமன் சீதையுடன் இணைந்தே இருந்தான். ஆனால் 14 வருடங்கள் இலக்குவனனும், ஊர்மிளையும் பிரிந்தே வாழ்ந்தனர். யாருமே ஊர்மிளையைப் பற்றிப் பேசுவதில்லை. பலருக்கு ஊர்மிளையின் பெயரே தெரியாது. 14 வருடங்கள் கணவனைப் பிரிந்து வாழ்ந்த அவளது மன உணர்வுகளை எனது ஓர்மம் கதையில் சொல்கிறேன்.

இன்னும் யாருமே அணுகாத புதிய பார்வையில் அகலிகையை வைத்து எழுதிய வரம் என்ற சிறுகதை முக்கியமானது. இப்படி இன்னும் பல கதைகளைக் கூறலாம்.

ஒரு சஞ்சிகையாசிரியராக "மகுடம்" சஞ்சிகையின் வரவு பற்றி என்ன சொல்வீர்கள்?

முதன் முதலாக மகுடம் சஞ்சிகை 2012 இல் வெளிவந்தது. மகுடம் கலை இலக்கிய சமூக பண்பாட்டு காலாண்டிதழாக இன்றுவரை தொடர்ந்து வெளிவருகிறது. இதுவரை 13 சஞ்சிகைகள் காலாண்டு இதழ்களாக வெளிவந்துள்ளது. எமது மகுடம் சஞ்சிகை பழமைக்கும் நவீனத்துவத்துக்குமான ஒரு பாலமாக, தொன்மங்களுக்கூடான எம் வரலாற்றைப் பேசும் இலக்கிய முயற்சிகளுக்கு களம் அமைத்துக் கொடுக்கிறது. அண்மையில் ஞானம் சஞ்சிகை ஆசிரியரின் பவள விழாப் நிகழ்வில் சஞ்சிகைக்களுக்கிடையிலான போட்டியில் மகுடம் சஞ்சிகை தேசிய ரீதியில் இரண்டாம் இடம் பெற்று 15,000 ரூபாய் பரிசினைப் பெற்றுக்கொண்டது

"மகுடம்" சஞ்சிகையின் சிறப்பம்சங்கள் குறித்தும் அதன் சமூகப் பயன்பாடுகள் குறித்தும் கூறுங்கள்?

மகுடம் ஏனைய கலை இலக்கிய சஞ்சிகைகளிலிருந்து வேறுபடுவதற்கு காரணம் அது தனது ஒவ்வொரு இதழையும் சிறப்பிதழாக வெளியிடுவதாகும். இதுவரை மகுடம், தமிழ்த் தூது தனிநாயகம் அடிகள் சிறப்பிதழ், மலையகச் சிறப்பிதழ் சிறுகதைச் சிறப்பிதழ், பிரமிள் சிறப்பிதழ் எஸ்.பொ. சிறப்பிதழ், கனடா சிறப்பிதழ், பேராசிரியர் மௌனகுரு இரட்டைச் சிறப்பிதழ், மருதூர்க் கொத்தன் சிறப்பிதழ், என பல சிறப்பிதழ்களை அதுவும் மலையகத்துக்கு எந்தவொரு சஞ்சிகையும் செய்யாத விடயமாக இரண்டு முறை (04 ஆவது, 08 ஆவது) சிறப்பிதழ்களை வெளியிட்டுள்ளது. மேலும் மகுடம் கலை இலக்கிய வட்டத்தினை ஆரம்பித்து இதுவரை 42 நிகழ்வுக்கும் மேலான பௌர்ணமி கலை இலக்கிய நிகழ்வுகளை நடாத்தியுள்ளது.

மகுடம் 09 ஆவது இதழ் ஈழத்தில் மட்டுமல்லாது இந்திய அளவில் புகழ்பெற்ற கவிஞர் பிரமிள் என்கிற தர்மு சிவராமுவுக்கு சிறப்பிதழ் வெளியிட்டது. இதன் 50 பிரதிகள் தமிழகத்திற்கு அனுப்பப்பட்டது. ஆனால் இந்த பிரதிகள் போதாமையின் காரணமாக மகுடம் பிரமிள் சிறப்பிதழ் தமிழ் நாட்டில் மறுபதிப்பு  (Reprint) செய்யப்பட்டு வெளியிடப்பட்டது குறிப்பிடத்தக்கது. ஈழத்தின் சிற்றிதழ் ஒன்று தமிழகத்தில் விற்பனைக்கு சென்றதும், அங்கு மறுபதிப்பு செய்யப்பட்டதும் சிற்றிதழ் வரலாற்றில் இது ஓர் சரித்திர நிகழ்வாகும். ஈழத்து இதழிற்கு கிடைத்த பெறுமையாகும்.

மகுடம் பதிப்பகம் மூலம் இதுவரை 60 க்கும் மேற்பட்ட நூல்களை வெளியிட்டுள்ளது. இன்றைய கொரோனா பேரிடர் காலத்திலும் 2021 இல் 20 க்கும் மேற்பட்ட நூல்களை வெளியிட்டு சாதனை படைத்துள்ளது. 2022 இல் இதுவரை 12 நூல்களை வெளியிட்டுள்ளது. இவ்வருட இறுதிக்குள் இது 20 நூல்களாகும். 

புலம் பெயர் படைப்பாளிகள் பலர் தாயகத்தில் தமது நூல்கள் வெளிவர வேண்டும் என்றும், அவர்கள் இல்லாவிட்டாலும் அதற்கான விழாக்கள், அங்கு நடைபெற வேண்டும் என்றும் விரும்புகின்றனர். மகுடம் அதற்கான ஏற்பாடுகளை செய்வதனாலும், அச்சுத் தொழில் நுட்பம், வடிவமைப்பு போன்றவற்றில் மகுடம் ஒரு வித்தியாசத்தைக் கடைப் பிடிப்பதினாலும் மகுடம் மூலம் தமது நூல்களை வெளிக்கொணர அவர்கள் விரும்புகின்றனர். மகுடம் கடந்த ஆண்டு வெளியிட்ட 20 நூல்களில் 10 நூல்கள் புலம்பெயர்ந்து வாழும் படைப்பாளர்களது நூல்கள் என்பது குறிப்பிடத்தக்கது. அத்துடன் கடந்த ஆண்டிலும் இந்த ஆண்டிலும் தாயகத்தில் அதிக தமிழ் நூல்களை வெளியிட்டது மகுடமாகத்தான் இருக்கும் என்பதை மிகுந்த மன நிறைவோடு குறிப்பிடுகின்றேன்.

இணையப் பாவணை அதிகரித்துள்ள தற்காலத்தில் சஞ்சிகைக்கான வாசகர்கள் போதியளவு காணப்படுகின்றார்களா?

இல்லை என்றுதான் சொல்ல வேண்டும். ஆனால் எழுத்தை கண்களால் தடவி அச்சு வாசனையை நுகர்ந்தபடி கையில் சஞ்சிகையை வைத்து வாசிக்கும் அந்த உணர்வு இணையத்தில் இல்லை. அந்த உணர்வு உள்ளவரை சஞ்சிகைகள் வெளிவந்து கொண்டுதான் இருக்கும்.

சஞ்சிகைகளைத் தொடர்ந்து வெளியீடு செய்வது சிரமமான பணியாகத் தோன்றவில்லையா?

இன்றைய அச்சகப் பொருட்களின் விலை ஏற்றம் சஞ்சிகைகளை மட்டுமல்ல நூல்கள் வெளியிடுவதையும் கேள்விக் குறியாக்கியுள்ளது.

எழுத்துத் துறையில் உங்களை வியப்பில் ஆழ்த்தியவர்கள் யார்? ஏன்?

பலர் உண்டு. தொடர்ச்சியான அவர்களது எழுத்தால் பிரமித்து போய் உள்ளேன்.

நீங்கள் அண்மையில் வாசித்த படைப்புகளில் உங்கள் மனதில் பதிந்துள்ள ஒரு படைப்பு பற்றிச் சொல்வீர்களா?

1992 - 1993 காலப் பகுதி எனது பல்கலைக்கழக வாழ்வியலின் முதலாம் வருடம். இக்காலப் பகுதியில் கண்டி சத்தியோதய நிறுவனத்தின் சார்பில் தமிழில் முதல் முறையாக நடாத்திய தமிழ் மொழி மூலத் தொலைக்காட்சிப் பாடநெறியில் கிழக்கில் இருந்து நான் தெரிவு செய்யப்பட்டிருந்தேன். மூன்று மாத காலம் நடைபெற்ற இந்த டிப்ளோமாப் பயிற்சி நெறியில் இயக்கம் - திரைக் கதை எழுதல் ஆகிய துறைகளில் நான் பயிற்சி பெற்றேன். பிரபல சிங்கள திரைப்பட இயக்குனர்கள் பலர் இப்பயிற்சி நெறியின் வளவாளராகக் கலந்து கொண்டனர். 

இக்காலப் பகுதியில் தேசிய இளைஞர் சேவைகள் மன்றம் நடாத்திய தொலைக்காட்சி நாடகப் பிரதியாக்கல் போட்டியில் தேசிய ரீதியாக பரிசு பெற்ற 'மரபை மீறும் மானுடம்' என்ற தொலைக்காட்சி நாடகப் பிரதியை எனது தொலைக்காட்சி பயிற்சி நெறி முடிந்தவுடன் திருகோணமலையில் குறும்படமாக எடுத்தேன். அதில் திருமலையைச் சேர்ந்த எனது  பல்கலைக்கழக நுண்கலைத் துறை மாணவி கதாநாயகியாக நடித்ததும், தென்றலும் புயலும் திரைப்படப் புகழ் பிரபல திருமலை நாடக நடிகர் அமரர் சித்தி அமரசிங்கம் நடித்திருந்ததும் குறிப்பிடத்தக்கது. அதன்பின்னர் நான் அதிகம் கலை இலக்கிய ரீதியாக செயற்பட்டதும், வெளியீட்டு முயற்சிகளில் இறங்கியதும் குறும்பட முயற்சிகளில் ஒரு தேக்க நிலையை ஏற்படுத்திவிட்டது.

நீங்கள் மிகப் பெரிய பலமாக எதனைக் கருதுகின்றீர்கள்?

நான் எதனையும் சவாலாக எடுப்பதில்லை. தடைக் கற்களையும் படிக் கட்டுக்களாக மாற்றியபடி எனது பயணம் தொடர்ந்து கொண்டேயிருக்கிறது. பதவி, பட்டங்கள் என நின்று நிதானித்தாலே சில சிக்கல்களும் மன அவஸ்தைகளும் ஏற்படும். நான் தொடர்ந்து இயங்கிக் கொண்டிருக்கிறேன். இயங்குவேன். அதுவே நான். இயங்குதலே எனது வெற்றி. கலைப் பணி என்னைப் பொறுத்தவரை ஒரு தவம். இது வரங்களை எதிர்பார்த்த தவம் அல்ல. வரங்களை வழங்கும் தவம். இதுவே எனது பலம்.

படைப்புகளை நீங்கள் பார்க்கும் பார்வை திறனாய்வா அல்லது விமர்சனமா?

இரண்டும் இல்லை. ஒரு வாசகனாக குறித்த படைப்பாளி தனது படைப்பின் மூலம் என்ன சொல்ல வருகின்றான் என்பதையே பார்க்கிறேன். விமர்சன, திறனாய்வு பார்வைகளால் பார்த்தால் படைப்பை ருசித்து அனுபவிக்க முடியாது.

உங்கள் இலக்கிய வாழ்வில் உங்களால் மறக்க முடியாத சம்பவம் ஒன்றைக் குறிப்பிடுங்கள்?

1988 காலப் பகுதியில் உயர் தரம் படித்துக்கொண்டிருந்தேன். இக்காலத்தில் தாகம் சஞ்சிகையின் ஆசிரியராகவும் இருந்தேன். எமது மண்ணிலே இந்திய ராணுவம் குடி கொண்டிருந்த காலம் அது. தாகத்தில் வெளிவந்த எனது ஆட்டாமா ரொட்டியும் ஆட்டிறைச்சி கறியும் என்ற கவிதைக்காக இந்திய ராணுவம் கைது செய்து ஒரு வாரம் வைத்திருந்தார்கள். எனது கவிதை இந்திய வல்லாதிக்கத்தையே அசைத்ததை என்னால் இன்றும் மறக்க முடியாது

எதிர்கால எழுத்து முயற்சிகள் பற்றிக் குறிப்பிடுங்கள்?

2022 ஜுன் மாதம் 26 ஆம் திகதி எனது ஏழாவது நூலும் ஐந்தாவது கவிதை நூலுமான "என் இனிய பட்டாம் பூச்சிக்கு" கவிதை நூல் வெளிவருகிறது. எனது காதல் மனைவியின் பிறந்த நாளை முன்னிட்டு தினம் ஒரு கவிதையாக எழுதிய 44 கவிதைகளின் தொகுதியாகவே இந்த நூல் அமைகிறது. இது வெறும் காதல் கவிதைகள் அல்ல. காதலுக்கூடாக எமது மண்ணைப் பற்றியும், எமது பெருமை பற்றியும், எமது தொன்மம் பற்றியும் பேசும் நூலாகும். அத்துடன் 2023 இல் எனது "அன்பின் முத்தங்கள்" என்ற கவிதை நூலும் 'பொஞ்சியூ பிலாத்து" என்ற குறுநாவலும் வெளிவரும்.

கலை இலக்கியத் துறையில் உங்களுக்கு அல்லது உங்கள் படைப்புகளுக்கு கிடைத்த பாராட்டுக்கள், கௌரவங்கள், பட்டங்கள், விருதுகள் பற்றிக் கூறுங்கள்?

பல கலை இலக்கியப் போட்டிகளில் பிரதேச, மாவட்ட, மாகாண, தேசிய மட்டங்களிலும் விருதுகள் பெற்றுள்ளேன். பாடசாலை காலத்தில் இருந்து விருதுகளை வரிசைப் படுத்தினால் இந்த நேர்காணலைப் போல் அது இன்னுமொரு நேர்காணலாக நீண்டுவிடும். ஆனாலும் ஒன்றிரண்டை மட்டும் குறிப்பிடுகிறேன். 

1) 2014 இல் கதிரவன் கலைக் கழகம் லண்டன் அம்மா நிறுவனத்துடன் நடாத்திய விருது விழாவில் இயக்குனர் பாரதி ராஜாவினால் விருது வழங்கப்பட்டது.

2) 2015 இல் தடாகம் பன்னாட்டு நிறுவனம், மலேசியா தமிழ் எழுத்தாளர் ஒன்றியம், கனடா  படைப்பாளிகள் நிறுவனம் இணைந்து நடாத்திய விழாவில் "தமிழ்மணி" விருது வழங்கப்பட்டது.

3) 2019 இல் எனது பரசுராம பூமி சிறுகதைத் தொகுப்புக்கான கிழக்கு மாகாண சாகித்திய விருது

4) 2019 இல் தேசிய ஒருமைப்பாடு, அரச கரும மொழிகள், சமூக முன்னேற்றம், மற்றும் இந்து சமய அலுவல்கள் அமைச்சின் கௌரவ அமைச்சர் மனோ கணேசன் வழங்கிய 'கலைச்சுடர்" விருது.

எனக்கு கிடைத்த முக்கியமான விருதுகளை மட்டுமே மேலே குறிப்பிட்டுள்ளேன். கலை இலக்கியப் போட்டிகளில் பெற்ற பரிசில்களைக் குறிப்பிடவில்லை. பொதுவாக பல கலை இலக்கிய போட்டிகளில் பரிசில்களைப் பெற்றுள்ளேன். அவற்றை முழுமையாகக் குறிப்பிட இந்த நேர்காணல் பக்கங்கள் இடம் தராது என்று நினைக்கின்றேன்.

இந்த நேர்காணல் மூலம் வேறு என்ன கூற விரும்புகிறீகள்?

கலை இலக்கிய உலகில் அறிவுரைகள் தேவையில்லை. தேடலே முக்கியம். நான் இன்னமும் கற்றுக் கொண்டிருக்கும் மாணவனே. கலை இலக்கியம் மட்டுமல்ல எந்தத் துறையிலும் தொடர்ந்து இயங்குதலே முக்கியம். விமர்சனங்களை புறந்தள்ளி தொடர்ந்து இயங்குதல் முக்கியமானது. இங்கும் தக்கன பிழைக்கும் தகாதன மறையும்.  

வெலிகம ரிம்ஸா முஹம்மத்

41. எழுத்தாளர் சூசை எட்வேட் அவர்களுடனான நேர்காணல்

 எழுத்தாளர் சூசை எட்வேட் அவர்களுடனான நேர்காணல்

நேர்கண்டவர்:- வெலிகம ரிம்ஸா முஹம்மத்

உங்களைப் பற்றிய அறிமுகம், பாடசாலை வாழ்க்கை, தொழில் அனுபவம் பற்றிய தகவல்களை எமது வாசகர்களுக்காகக் கூறுங்கள்?

எனது சொந்தப் பெயரே சூசை எட்வேட் தான். சொந்த இடம் திருகோணமலை. விவாக சம்பந்தம் யாழ்ப்பாணம். அங்கும் சில காலம் வாழ்ந்திருக்கிறேன். திருமலை சென் சேவியர் பாடசாலையில் கல்வி கற்றேன். க.பொ.த. சாதாரண தரத்தில் திறமைச் சித்தியடைந்தேன். உயர் தரத்திலும் சேர்ந்து படித்தேன். மூன்று நான்கு புத்தகங்களையே உருப்போட்டுப் படிக்கும் கல்வி முறை எனக்கு அலுப்புத் தட்டியது. பின்னர் என் தந்தையாரின் சிகையலங்கரிப்பு நிலையத்தில் தொழில் பழகி நானுமொரு சிகையலங்கரிப்பாளன் ஆனேன்.

உங்களுக்கு இலக்கியத் துறையில் ஆர்வம் வந்தது எப்படி?  

நான் சிறுவனாக இருந்தபோது அம்மாவின் சகோதரரங்களின் குடும்பங்களும் அங்கு இருந்தனர். படித்தவர்கள், நூல்களை வாசிப்பவர்களும் அங்கிருந்தார்கள். பத்திரிகைகள், சஞ்சிகைகள், அம்புலி மாமாவிலிருந்து ஆனந்த விகடன், கல்கி, குமுதம் என்று இலக்கிய இதழ்கள் வந்து குவியும். வாசிகசாலைக்குப் போயும் வாசிக்கும் பழக்கமும் எனக்கு இருந்தது. அந்த வாசிப்புகளின் மீதான ஈர்ப்பே எனது இலக்கிய ஆர்வத்துக்குக் காரணமாக அமைந்தது.

உங்களிடையே வாசிப்புப் பழக்கம்; எப்படித் தொடங்கியது?  

எமக்குப் பிடித்த ஆசிரியர் தன் சுய முயற்சியால் நூல்களை சேகரித்து பாடசாலையில் நூல் நிலையத்தை சிறிதளவாக ஆரம்பித்தார். எம்மை வாசிக்கத் தூண்டினார். அவர் ஒரு நாள் படிப்பிக்கும் போது, ஒரு கதை சொன்னார். அப்போது அவர், ஷஷபேரறிஞர் பேர்னாட்ஷா இளம் பராயத்திலேயே நாளாந்தம் ஐந்து பக்கம் எழுதிவிட்டுத்தான் சாப்பிட, தூங்கப் போவாராம். அப்படி எழுதி எழுதி பயிற்சி பெற்றுத்தான் அவர் உலகமே போற்றும் பேரறிஞர் ஆனார்|| என்ற தகவலைச் சொன்னார். இது என் நெஞ்சில் தடம் பதித்தது. அவ்வாறே நானும் எழுதிப் பயன் பெற்று வந்தேன். அந்தப் பழக்கமே இந்தளவாவது என்னை உயர்த்திவிட்டது.

உங்களை இத்துறையில் ஊக்குவித்தவர்கள் பற்றிக் குறிப்பிடுங்கள்?  

படிப்பை கைவிட்ட பிறகு நான் திருமலை நூல் நிலையத்தில் அதிக நேரத்தைச் செலவிட்டேன். நூல் நிலையத்தில் அங்கத்தவராக சேர்ந்து, புத்தகங்களை வீட்டுக்குக் கொண்டு வந்து வாசிப்பதிலும் ஆர்வமாயிருந்தேன். அப்போது திரு. அரியநாயகம் நூலகப் பொறுப்பாளராக இருந்தார். அந்தக் காலத்தில் அவரின் சிறுகதைகள் பத்திரிகைகளில் அடிக்கடி வரும். அவர் நன்கு பிரபலமாகியிருந்தார். நான் அடிக்கடி நூல் நிலையம் வருவதும் புத்தகங்கள் எடுப்பதும் படிப்பதுமாக இருப்பதால் என்னில் அவருக்கும், அவரில் எனக்கும் ஒரு ஈர்ப்பு, பிடிப்பு ஏற்பட்டு சினேகிதமாகியது. அவர்தான் எனக்கு நல்ல எழுத்தாளர்களை, கதாசிரியர்களை அறிமுகப்படுத்தி என்னை முதன் முதலில் ஊக்குவித்தார். என்னோடு பழகிய அனுபவத்தில் அவர் ஒரு நாள் என்னிடம், "நீயும் ஒரு நாள் பெரிய எழுத்தாளனாவாய்" என்று சொன்னார். அப்போது நான் கட்டைக் கால்ச் சட்டைதான் போட்டிருந்தேன்.

இலக்கிய நூல்களை தீவிர வாசிப்புக்கு உட்படுத்தி வரும் நீங்கள், உங்களை மிகவும் கவர்ந்த நூலாக எந்த நூலைக் குறிப்பிடுவீர்கள்? அந்த நூலைப் பற்றி கொஞ்சம் சொல்லுங்கள்?

நான் சின்ன வயதிலிருந்து முதுமைப் பிராயத்திலும் நூல்களை வாசித்து வருபவன்தான். ஆனால் திருக்குறள், நாலடியார், கம்பராமாயணம், சிலப்பதிகாரம் என்று சித்தர் பாடவென்று நம் பழந்தமிழ் புலவர்கள் எழுதி வைத்தது போன்று நம் தலைமுறையில் எத்தனை எத்தனை வெளியீடுகள் செய்தாலும் அவைகளுக்கு கிட்ட நிற்க முடியாது. காலம் கடந்தும் வாழும் இலக்கியங்கள் அவைதாம். 

நான் வாசிக்கும் காலத்தில் கூடுதலாக டாக்டர். மு. வரதனாரின் கதைகளையே விரும்பி வாசிப்பேன். அவர் கருத்தில்லாமல் ஒரு கதையும் எழுத மாட்டார். நானும் கருத்தில்லாமல் ஒரு கதையும் எழுதுவதில்லை. அவருக்கு கருத்துப் பிரசாரம் செய்பவர் என்ற ஒரு குற்றச் சாட்டும் உண்டு.

நீங்கள் இதுவரை எழுதிய சிறுகதைகள் பற்றி பொதுவாகக் குறிப்பிடுங்கள்?

என்னைப் பொறுத்தவரையில் வெறும் பொழுது போக்குக்காக, உல்லாச சல்லாபங்களுக்காக ஒரு கதையும் எழுதமாட்டேன். மக்களின் நல் வாழ்வுக்கான கருத்துக்களை இருத்தியே கதைகளை எழுதி வருகிறேன். சுமார் 20 வருடங்களாக 200 சிறுகதைகளுக்கும் மேல் எழுதியிருக்கின்றேன். அத்தனையும் எங்கள் மக்களின் துயரங்களையும் பிரச்சினைகளையும் சொல்லி, அதற்கான காரணங்களையும் சொல்லி, எல்லாவற்றையும் தீர்க்கும் வழிமுறைகளையும் சொல்லியே எனது கதைகளை சித்தரித்து வருகிறேன். இதற்குமேலும், தான் எழுதிய சிறுகதைகளைப் பற்றி அந்தக் கதாசிரியரே சொல்வதைவிட வாசகர்களின் அபிப்பிராயத்துக்கே அதனை விட்டு விடுகிறேன். 

சிறுகதைகளை எழுதும் போது உங்கள் மனநிலை எப்படி இருக்கும்?

கதைகள் எழுத ஆரம்பிக்கும் போது, ஷஷஆண்டவா! மக்கள் நல் வாழ்வுக்காக நல்லதைச் சொல்ல எனக்கு அருள் தாரும்|| என்று வேண்டிக் கொண்டே எழுத ஆரம்பிப்பேன். ஷஷமனம் ஒரு நிலைப்படும்|| என்றும் உச்சரித்துக்கொள்வேன்.

இதுவரை வெளிவந்த உங்கள் நூல் அறுவடைகள் பற்றிக் குறிப்பிடுங்கள்?

'கருத்துக் கலசம்' (2010) இது ஈற்றிசை வெண்பாவில் (குறள் நடை) எழுதியது. இந்த நூலில் ஆயிரத்து நூறு பாக்கள் உள்ளன. வாழ்க்கை அனுபவத்தால் அவ்வப்போது தோன்றும் கருத்துக்களைக் குறித்து வைத்து எழுதியவை. 

'இவன்தான் மனிதன்' (2013) என்னும் சிறுகதைத் தொகுதியையும் 'இங்கு வீசியது ஒரு சமாதான காற்று' (2019) எனும் தொகுதியையும் வெளியீடு செய்துள்ளேன். பத்திரிகைகளிலும் சஞ்சிகைகளிலும்  வெளிவந்த சிறுகதைகளே இந்த இரண்டு நூல்களிலும் இடம் பிடித்துள்ளன. இதுவரை நான் எழுதி வைத்துள்ள கதைகளில் கால் பகுதிக்கும் குறைவானவைதான் பத்திரிகைகளில், சஞ்சிகைகளில் பிரசுரமாகியிருக்கின்றன. அப்படிப் பிரசுரமானவற்றில் கால் பகுதிக்கும் குறைவானவையே நூலுருப் பெற்றுள்ளன. அச்சிடப்பட்ட எனது நூல்களும் தேங்கிக் கிடக்கின்றன. இதுவே என் பலவீனமான நிலையாகும்.

'கருத்துக் கலசம்' நூல் பற்றி விசேடமாகக் குறிப்பிட விரும்புவது என்ன?

இந்த உலகத்திலே மக்கள் வாழ்வு நலன் சார்ந்த அறிவு பூர்வமான நல் கருத்துக்;களை ஏழு சொற்களில் எழுதி முதல் தரமான சாதனை படைத்தவர் திருவள்ளுவர் தான். எனக்குக் கிடைத்த அனுபவங்களாலும், கற்ற அறிவுரைகளாலும், பொன் மொழிகளாலும் பெறப்பட்ட கருத்துக்கள் என் சிந்தனையில் ஓடிக்கொண்டிருக்கும். அவற்றை அவ்வப்போது குறித்து வைப்பேன். அப்படிக் குறித்து வைத்தவை தான் \கருத்துக் கலசம்\ ஆக உருவானது. இந்த நூலில் உள்ள ஈற்றிசை வெண்பாக்கள் (குறள் நடை), ஷநீங்களும் எழுதலாம்| கவிதை இதழிலேதான் கூடுதலாக வெளிவந்துள்ளது. இதே பாணியில் இன்னும் எழுதி வருகிறேன். விரைவில் இதே பாணியில் இன்னொரு நூல் வெளியீடு வரும் என்று சொல்லலாம்.

"இவன்தான் மனிதன்'" என்ற சிறுகதை நூலில் உள்ளடக்கம் பெற்றுள்ள கதைக் கருக்கள் பற்றி சுருக்கமாகக் கூறுங்கள்?

நான் யாழ்ப்பாணத்தில் குடியிருந்த போது பெற்ற அனுபவங்களால் எழுந்த சிறுகதைகளே இதில் அதிகமாக இந்த நூலில் இடம் பிடித்துள்ளன. ஈழத் தமிழரின் கலாசார பூமி யாழ்ப்பாணம்தான். இது நன்கு படித்தவர்கள், பெரிய மனிதர்கள் உள்ள இடம். ஆனால் அங்குள்ளவர்கள் சாதிக் கொடுமையை  ஒழிக்கவியலாமல் இன்னமும் கட்டிப்பிடித்துக்கொண்டு இருக்கிறார்கள். இவன்தான் மனிதன் என்ற சிறுகதைத் தொகுதியில் உள்ள கதைகளில் அனேகமானவை யாழ்ப்பாண சூழ்நிலையை மையமாகக் கொண்டு எழுதப்பட்டவையாகும்.

"இங்கு வீசியது ஒரு சமாதானக் காற்று" சிறுகதைத் தொகுதி பற்றியும் குறிப்பிடுங்கள்?

நான் திருகோணமலை வந்த பின்னர் தான் எழுத்தாளனானேன். இந்தச் சிறுகதைத் தொகுதியில் இடம்பெற்றுள்ளவை பெரும்பாலும் திருகோணமலைச் சூழலைச் சார்ந்தவையே. மூவின மக்களும் சேர்ந்து வாழும் இடம் திருகோணமலை. எனவே சமாதானம், ஐக்கியத்தை வலியுறுத்தி எழுதிய கதைகளையே, ஷஇங்கு வீசியது ஒரு சமாதானக் காற்று| என்ற இந்தச் சிறுகதை நூலில் சேர்த்துள்ளேன்.

சமுகத்தில் ஒடுக்கப்பட்ட மக்களுக்காக உங்கள் சிறுகதை முலம் குரல் கொடுப்பதாக அறிகின்றேன். அது பற்றியும் சொல்லலாமே?

இனவாத அரசுகளால் சிறுபான்மை இனங்கள் பாதிப்புறுகின்றன. அதற்காகக் கிளர்த்தெழும் இயக்கங்கள், கட்சிகள் தமக்குள் ஒற்றுமையில்லாமல் பிளவுபட்டு அடிபட்டு பலவீனமாகின்றன. எந்தப் போராட்டமும் பயனின்றி போகின்றன. சமுகத்துக்கு விமோசனம் கிடைப்பதாயில்லை. எது எப்படி இருந்தாலும் சமுகத் தலைவர்களாயிருந்தாலென்ன, சாதாரண பொதுமகனாயிருந்தாலென்ன அவர்கள் ஒருவருக்கொருவர் நல்லெண்ணமாய், மனத் தூய்மையாய் இருந்தாலே போதும். இதனாலே மனிதர்கள் எல்லாம், சமூகங்கன் எல்லாம் சுவீட்சம் பெற முடியும். என் எழுத்தின் ஆதார சுருதியே இதுதான்.  

உங்களுடைய படைப்புகள் குறித்து உங்கள் மதிப்பீடு என்ன? அது உங்களுக்குத் திருப்தி அளிக்கின்றதா?

எந்தப் படைப்பாளியும் தனது ஆக்கங்களைக் குறைவாக மதிப்பிடவே மாட்டான். குறை சொன்னால் சினப் படவும் செய்வான். இந்தப் பலவீனம் என்னிடமும் தொற்றிக்கொள்ளாமல் இல்லை. என்னை சுதாகரித்து மற்றவரின் அபிப்பிராயங்களுக்கு மதிப்பளித்து இன்னும் என்னை நான், புனர் நிர்மாணம் செய்துதான் வருகிறேன். இதுவரை எழுதி வெளியாகிய ஆக்கங்களைவிட சிறந்த படைப்புகளை உருவாக்க வேண்டும் என்ற ஆர்வத்திலேயே உள்ளேன். என்றாலும் நான் எழுதிக் குவித்தவற்றில் பெரும்பாலானவை இன்னும் பிரசுரிக்கப்படாமல், வெளியீடு செய்யப்படாமல் தேங்கிக் கிடக்கின்றன. அவற்றையெல்லாம் காலப்போக்கில் ஒவ்வொன்றாகப் பிரசுரித்து, வெளியீடு செய்து அறிமுகமாக்கினாலே போதும், எனக்கு ஆத்ம திருப்தி ஏற்பட்டுவிடும்.

ஒரு சிறுகதையின் மையக் கருவாக எவற்றையெல்லாம் நீங்கள் கருதுகிறீர்கள்?

நான் கட்சி கொள்கைக் கோட்பாட்டு ரீதியில் நின்று ஒரு பக்கச் சார்பாக எழுதுபவனல்ல. மக்களின் மேலான வாழ்வுக்காக எனக்குத் தெரிந்த சிறந்த கருத்துக்களை மையப்படுத்தியே ஆக்கங்களைப் படைக்கிறேன். அவற்றையே வாசகர்கள் எனது கதைகளில் காண முடியும்.

புற உணர்வுகளை விட அக உணர்வுகளை அதிகமாகப் பேசும் கதா பாத்திரங்களை உங்கள் சிறுகதைகளில் அதிகமாகக் காணலாமே. இதற்கான விசேட காரணம் என்ன?

சகல சீவராசிகளிலும் மனிதனுக்கு மட்டுமே மனம் உண்டு. ஒவ்வொரு மனிதனும் மனதாலேயே வாழ்கிறான். சிந்தனை இல்லாமல் ஒரு நிமிடம் கூட இரான். அனேகர் தம் எதிரிகளைப் போட்டி பொறாமையின் அடிப்படையில், கஷ்ட துன்பங்களின் அடிப்படையிலேயே நினைவுகளால் இழுபட்டு வாழ்கின்றனர். இந்த நினைவலைகளே மனம் போல வாழ்வென்று அவர்கள் வாழ்வை தீர்மானித்து குப்பைத் தொட்டியாக்கும். ஆகையால்தான் நற்சிந்தனையோடும் நல்ல அக உணர்வுகளோடும் இருந்தால்தான் சீராக வாழலாம். எனவே நான் அக உணர்வுகளுக்கு முக்கியத்துவம் கொடுத்து கதைகளை எழுதி வருகிறேன்.  

அதிகமான  சிறுகதைகளை எழுதியுள்ள நீங்கள் நாவல்களையும் எழுதலாமே. இதுவரை ஏன் நாவல்கள் எழுதுவது பற்றி சிந்தித்துப் பார்க்கவில்லை?

ஒவ்வொரு சிறுகதைகளிலுமே பல்வேறு விதமான வாழ்க்கைப் பிரச்சினைகளையும், அதற்கான தீர்வுகள் மற்றும் நல்லாலோசனைகளையும் சொல்லி வருகிறேன். இதுவே எனக்குத் திருப்தியாகிறது. ஆகையால் நாவல் எழுதுவது பற்றி நான் இதுவரை சிந்திக்கவில்லை. இனிமேல்த்தான் அதில் கவனம் எடுக்க வேண்டும். எதிர்காலத்தில் பார்க்கலாம்.

இப்போதுள்ள சில இலக்கியக் குழுக்களின் செயற்பாடுகள் சமூக மாற்றத்திற்கு எந்தளவில் பங்களிப்புக்களைச் செய்து வருவதாக நினைக்கிறீர்கள்? இலக்கியக் குழுக்களின் மீதான உங்கள் மதிப்பீடு என்ன?

இப்போதுள்ள இலக்கியக் குழுக்களானது கட்சி மற்றும் கொள்கைக் கோட்பாட்டு ரீதியில்த்தான் இயங்கி வருகின்றன. அவை பெரும்பாலும் தங்களைச் சார்ந்தவர்களை மட்டுமே வளர்த்து, புகழடையச் செய்கின்றன. இலக்கியவாதியாக இருந்தாலென்ன, குழுவாக இருந்தாலென்ன, அவை நடுநிலமையில் நின்று இயங்க வேண்டும். அதுவே ஆரோக்கியமான இலக்கியச் சேவையாகும் என்பதே எனது கருத்து.

உங்களது தற்போதய இலக்கிய முயற்சி பற்றி?

எழுதிக் கொண்டே இருக்கின்றேன். ஆனால் எழுதிக் குவித்தவைகளை பிரசுரமாக்குவது, நூலுருவாக்குவது போன்ற விடயங்களில் பெரும் சிக்கலில், பலவீனத்தில் உள்ளேன். எந்தவிதமான இலக்கியக் குழுக்களிலும் எனக்கு உதவுவார் இல்லை.

இந்தக் கொரோனாக் காலத்தில் இலக்கிய நூல் பதிப்புச் செயற்பாடுகள் எப்படி உள்ளது?

கொரோனாத் தாக்கம் எந்த மனிதரையும் விட்டு வைக்கவில்லையே. எழுத்தாளர்கள், இலக்கியவாதிகள் மட்டும் எப்படித் தப்ப முடியும்? எழுதிய பல சிறுகதைகளை பத்திரிகைகளுக்கும் சஞ்சிகைகளுக்கும் அனுப்பவே படாதபாடு படவேண்டி இருக்கிறது. அவைகளும் சிரமத்துக்குள்ளாகி மிகவும் தாமதித்தே பிரசுரிக்கிறார்கள். இப்போதெல்லாம் இலக்கிய ஆக்கங்கள் வெளிவருவதே அருமையாகிவிட்டது.

புத்தகக் கண்காட்சிகளும் அவ்வப்போது நடைபெற்று வருவதாகவே அறிகிறேன். இந்த கண்காட்சிகளில் புத்தகங்களும் விற்பனையாவது தெரிகிறது. வாசகர்களது இரசனை எந்த மட்டத்தில் இருப்பதாக நினைக்கிறீர்கள்?

புத்தகக் கண்காட்சி பற்றி குறிப்பிட்டீர்கள். இவையெல்லாம் எனக்கு எட்டாக் கனியே ஆகும். வாசகர்களின் தற்போதைய இரசனையும் எம் போன்றவர்களைவிட்டு எட்டியே போய்விட்டன. இப்போதெல்லாம் தொலைக்காட்சி, இணையத்தளம், முகநூல். என்று இளைய தலைமுறையின் இரசனை அதற்குத் தாவிப் போய்விட்டது. ஒரு புத்தகத்தை எடுத்து பொறுமையாக இருந்து வாசிப்பார் இல்லை. இந்த நிலையில் ஆக்க இலக்கியப் படைப்பாளிகளின் நிலை சங்கடம்தான். ஆனாலும் ஷபுத்தகம்தான் காலம் கடந்தும் வாழும்| என்பதை எல்லோரும் ஒத்துக்கொள்ளவே வேண்டும்.

நீங்கள் ஆக்கங்களை எழுதுவது, புத்தகங்களை வாசிப்பது இவற்றையெல்லாம் உங்களது வீட்டார்கள் எப்படி எடுத்துக் கொள்கிறார்கள்?

வயதான காலத்தில் நானும் மனைவியும் வீட்டில் தனியாகத்தான் இருக்கிறோம். என் மனைவி ஆக்கிப் படைத்து, வேளா வேளைக்கு சாப்பாடு தந்து போசிப்பா. நான் நிம்மதியாக இருந்து வாசிக்கிறேன்;, எழுதுகிறேன், இலக்கியப் பணி புரிகிறேன்.

மற்ற எழுத்தாளர்களோடு உங்களுக்குத் தோழமையான உறவுகள் இருக்கிறதா? அவர்களது படைப்புகளை நீங்கள் எப்படிப் பார்க்கிறீர்கள்?

மற்ற எழுத்தாளர்களோடும், படைப்பாளிகளோடும் எனக்குச் சுமூகமான உறவுண்டு. யாரையும் விரோதித்துக்கொள்ள நான் விரும்புவதில்லை. ஒரு படைப்பாளி எவ்வளவு பாடுபட்டு ஆக்கங்களை ஆக்கி அளிக்கிறான் என்று எனக்குத் தெரியும். குறை சொல்லி மனதைக் காயப்படுத்தலாகாது. ஓவ்வொருவரும் ஒவ்வொரு கோணத்தில் எழுதுவார்கள். அதைக் குறை சொல்ல நமக்கென்ன தகுதி இருக்கிறது? நமக்கு மட்டும் எல்லாம் தெரிந்த மேதையென்ற நினைப்பா!

உங்கள் இலக்கிய நண்பர்கள் பற்றி குறிப்பிடுங்கள்?

'நீங்களும் எழுதலாம்' கவிதை இதழாசிரியரோடு பதினைந்து வருடங்களுக்கும் மேலாக நல்லுறவுண்டு. அவர் இதழை ஆரம்பித்ததிலிருந்கே ஷதெருக் குரல்| என்னும் தலைப்பில் என் ஈற்றிசை வெண்பாவை தவறாமல் வெளியீடு செய்து வருகிறார். அதுவே காலப்போக்கில் கருத்துக் கலசம் நூலாகியது. அவர்தான் என்னை முதல் முதலாக மேடையேற்றி கௌரவிப்புச் செய்திருக்கிறார். அடிக்கடி சந்தித்து கலந்துரையாடுவார். 

அடுத்ததாக கவிஞர் செ. ஞானராசாவைக் குறிப்பிட வேண்டும். அவர் அடிக்கடி என்னைத் தேடி வந்து இலக்கியம் பற்றியும் உலக நடப்புகள் பற்றியும் கலந்துரையாடிச் செல்வார். நல்லாலோசனைகளும் சொல்வார். அவரோடு சேர்ந்து நல்ல ஆராய்ச்சி நூல்கள் எழுதிய திரு. சரவணபவன் அவர்களும் வந்து கலந்துரையாடுவார். இந்த இருவரும் சேர்ந்து இங்கே அன்புவளிபுரம் வாசிகசாலையால் எனக்கு கௌரவிப்புச் செய்திருக்கிறார்கள். 

அத்துடன் ஞானம் ஆசிரியர் தி. ஞானசேகரன் அவர்கள் தனது மாத வெளியீடான ஞானம் இதழில் எனது அதிகமான சிறுகதைகளைப் பிரசுரமாக்கியிருக்கிறார். அட்டைப் பட அதிதியாக்கி என்னை கௌரவித்திருக்கிறார். தொலைபேசியின் ஊடாக நல்லாலோசனைகளைச் சொல்வார். 

அடுத்ததாக 'பூங்காவனம்' சஞ்சிகை ஆசிரியர் ரிம்ஸா முஹம்மத் அவர்கள் ஒவ்வொரு இதழிலும் எனது கதைகளைப் பிரசுரித்து, எனக்கு ஊக்கம் கொடுத்து வருகிறார். இப்போது இந்த நேர்காணலைச் செய்து என்னை வெளியுலகுக்கு அறிமுகமாக்கியிருக்கிறார். எப்படி நன்றி சொல்வதென்றே தெரியவில்லை.

தற்காலத்தில் வெளிவரும் படைப்புகளின் தரம் பற்றி என்ன சொல்வீர்கள்?

தற்கால வாழ்க்கையே நவீன சாதனங்களால் மற்றும் கருவிகளால்த்தான் இயங்கி வருகின்றது. இளம் மட்டங்கள் உல்லாச சல்லாபங்களைத் தேடி வாழ்கின்றார்கள். தற்கால படைப்பாளிகளும் அவற்றுக்கு முன்னுரிமை கொடுத்தே எழுதுகிறார்கள். காலத்துக்கேற்ற மாதிரியாகப் படைக்க வேண்டும்தான். ஆனால் நீதி, நியாயம், தர்மம் என்றும் வாழ வேண்டியது கட்டாயமான ஒரு விடயமாக இருக்கிறது. அதன் வழியில் நின்று பிசகாமல் எழுதவும் வேண்டும். நம் பழந் தமிழ் இலக்கியங்களின் வழிகாட்டலை மறக்காமல் இருக்க வேண்டும்.

கலை இலக்கியத் துறையில் இதுவரை உங்கள் படைப்புகளுக்குக் கிடைத்த பாராட்டுகள், பரிசுகள், விருதுகள் பற்றிக் குறிப்பிடுவீர்களா?

எனக்கு வித்தகர் விருது, முதல்வர் விருது, கலாபூஷணம் விருது போன்றவை கிடைத்துள்ளன. இவைதவிர கௌரவிப்பு நிகழ்வுகள் நடந்துள்ளன. விருதுகளைத் தேடி நான் ஒருபோதும் அலைவதில்லை. இலக்கிய உலகம் என்னை எங்கே வைக்குமோ அங்கே வைக்கட்டும்.

உங்களது அடுத்த நூல் வெளியீட்டை விரைவில் எதிர்பார்க்க முடியுமா?

நான் வயதான காலத்தில் தனித்திருந்து எழுதி வருகிறேன். எழுதியவற்றில் கால் பகுதி கூட ஊடகங்களில் பிரசுரமாகவில்லை. ஒரு கதையை பிரசுரமாக்கவே படாதபாடு படவேண்டியிருக்கிறது. இந்த இலட்சணத்தில் அடுத்த நூல் வெளியீட்டை இப்போது நினைத்துப் பார்க்கவியலாமல் இருக்கிறது. எதிர்காலத்தில் பார்க்கலாம்.

இன்றைய இனந்தலைமுறைப் படைப்பாளிகளுக்கு கூற விரும்புவது?

அவர்கள் நவீன காலத்துக்குரிய முறையில் எழுதி வருகிறார்கள். ஆனால் பழந்தமிழ்   எழுத்தாளர்களை; வழிகாட்டியாய் கொள்ள மறவாதீர்கள். நீதியின் பக்கம் தர்மத்தின் பக்கம் சார்ந்து நிற்கட்டும் அவர்களது படைப்பு. ஒரு கதையோ, கவிதையோ எழுதி அனுப்பி அது பிரசுரமான பின்னரே அடுத்ததை எழுதுவதாக இருந்தால் உங்கள் ஆற்றல் வளராது. அதற்கு நா'ளாந்தம் பயிற்சி வேண்டும். அப்போது தான் ஆற்றல் வளரும். இது சம்பந்தமாக 'கருத்துக் கலசத்தில்' இருக்கும் ஒரு கவிதையைத் தருகிறேன். 

'முயற்சி பயிற்சி அயர்ச்சியின்றி இருந்தால்

உயர்ச்சி உச்சத்தில் இருக்கும்'.

இறுதியாக என்ன சொல்ல விரும்புகிறீர்கள்?

வெறும் புகழுக்காக அதையும் இதையும் எழுதக் கூடாது. மக்கள் வாழ்வு மேம்பட தர்மம் நீதியின் அடிப்படையில் நின்று எழுத வேண்டும். எழுத்தாளர்கள் உட்பட சாதாரண மக்கள் வரை ஷமனம் போல வாழ்வு| என்ற பழமொழியைப் பின்பற்றினாலே போதும், சுபீட்சம் பெறலாம்.

நேர்கண்டவர்:- வெலிகம ரிம்ஸா முஹம்மத்