42. கவிஞர் வி. மைக்கல் கொலின் அவர்களுடனான நேர்காணல்

 கவிஞர் வி. மைக்கல் கொலின் அவர்களுடனான நேர்காணல்

வெலிகம ரிம்ஸா முஹம்மத்

உங்களைப் பற்றிய அறிமுகத்தை எமது வாசகர்களுக்காகக் கூறுங்கள்? 

முதற்கண் எனது வணக்கங்களும் வாழ்த்துக்களும். என்னைப் பற்றிய அறிமுகம் கேட்கிறீர்கள். தமிழகத்தில் அண்மையில் வெளிவந்த  ஷஷகாக்கை வன கவிஞர்கள்' தொகுப்பில் என்னைப் பற்றி வெளிவந்துள்ள சிறு குறிப்பையே எனது அறிமுகமாகத் தருகிறேன். 

திருகோணமலையைப் பிறப்பிடமாகவும் மட்டக்களப்பை வசிப்பிடமாகவும் கொண்ட கவிஞர் வி. மைக்கல் கொலின் தனது மாணவப் பருவத்தில் (14 வயது) இருந்தே படைப்பாக்க முயற்சிகளில் ஈடுபட்டு வருகின்றார். கவிதை, சிறுகதை, நாவல், விமர்சனம், குறும்படம், பத்திரிகைத் துறை, சஞ்சிகை வெளியீடு, நூல் வெளியீடு என பல்துறை ஈடுபாடுடைய இவரது முதல் புதுக்கவிதைத்தொகுப்பு 

"என் பிரிய ராஜகுமாரிக்கு" 1992 இல் வெளிவந்தது. 2018 இல் இவரது "பரசுராம பூமி" என்ற சிறுகதைத் தொகுப்பும் 2019 இல் "சிலுவைகளே சிறகுகளாய்" என்ற கவிதை நூலும் 2021 இல் "வீணையடி நீ எனக்கு" என்ற நாவலும் மூன்றாவது கவிதை நூலான "இவனைச் சிலுவையில் அறையுங்கள்" என்ற நூலும் நான்காவது கவிதை நூலான "எழுதித் தீரா பிரியங்களும்" வெளிவந்துள்ளது. 

1985 - 1995 வரை திருகோணமலையில் "தாகம்" என்ற கலை இலக்கிய இதழை வெளியிட்டு வந்த இவர், 1995 இல் மட்டக்களப்பபில் "ஃபீனிக்ஸ்" நவீன தமிழ் கவிதா இதழையும் வெளியிட்டார். இவர் 2012 தொடக்கம் மட்டக்களப்பில் 'மகுடம்' என்ற  கலை இலக்கிய சமூக பண்பாட்டு காலாண்டிதழின் ஆசிரியராகவிருந்து வெளியிட்டு வருகிறார். 

இவர் 1998 இலும் - 2000 இலும் மட்டக்களப்பிலிருந்து வெளிவந்த முதல் வாரப் பத்திரிகையான 'தினக்கதிர்' வாரமலர், 'தினக்கதிர்' நாளிதழ் ஆகியவற்றின் பிரதம, இணை ஆசிரியராகவும் கடமையாற்றியுள்ளார்.

இவரது "பரசுராம பூமி" சிறுகதை நூல் 2018 ம் ஆண்டுக்கான கிழக்கு மாகாண சாகித்திய விருது பெற்றது குறிப்பிடத்தக்கது. இவர் மகுடம் பதிப்பகத்தின் மூலம் இதுவரை 60 நூல்களையும், தாகம் பதிப்பகத்தின் மூலம் 06 நூல்களையும் பதிப்பித்துள்ளார். இவர் கிழக்குப் பல்கலைக்கழக வியாபார நிர்வாகமாணி (BBA) பட்டதாரி என்பதும் குறிப்பிடத்தக்கது.

உங்கள் பாடசாலை வாழ்க்கை, தொழில் அனுபவம் பற்றியும் கூறுங்கள்? 

நான் திருகோணமலையை பிறப்பிடமாகக் கொண்டவன். எனது முதலாம் வகுப்பு தொடக்கம் உயர் தரம் வரை திருமலையின் புகழ் பூத்த பழம் பெரும் வரலாற்றைக் கொண்ட புனித சூசையப்பர் கல்லூரியில்தான் கல்வி கற்றேன். உயர் தரத்தில் வர்த்தக பிரிவில் கல்வி கற்ற நான், முகாமைத்துவ கற்கைக்கு தெரிவு செய்யப்பட்டு கிழக்குப் பல்கலையில் எனது உயர் கல்வியைக் கற்றேன். 

எனது தொழில் அனுபவம் மூன்று வகையானது. எனது பல்கலைக் கழகக் கல்வி முடிந்து வெளியேறியதும் மட்டக்களப்பின் முதல் வார வெளியீடாக வெளிவந்த தினக்கதிர் ஆசிரிய பீடத்தில் வேலை கிடைத்தது. அதன்பின்னர் 2004 ல் மட்டக்களப்பில் இயங்கிய நோர்வே நாட்டு நிதியில் இயங்கிய வேலைத் திட்டத்தில் சமூக உணர்வூட்டலாளராக ஒரு வருடம் கடமையாற்றினேன். 2005 இல் பட்டதாரிகளுக்கான அரச சேவையில் இணைந்து இன்றுவரை மனித வள அபிவிருத்தி உத்தியோகத்தராகப் பணிபுரிகிறேன்.

கலை இலக்கியத் துறைக்குள் எவ்வாறு ஈர்க்கப்பட்டீர்கள்? இத்துறையில் உங்களை ஊக்குவித்தவர்கள் பற்றி?

எனது பாடசாலை காலங்களிலேயே நான் எழுதத் தொடங்கிவிட்டேன். எனது எட்டாம் வகுப்பில் எமது தமிழ்ப் பாட ஆசிரியை திருமதி. கந்தையா அவர்களின் தூண்டுதலால் சிறுவர் வைரம் எனும் கை எழுத்துச் சஞ்சிகையை வெளியிட்டேன். அதன் தொடர்ச்சியாக தாகம் என்ற பெயரில் ஒரு இலக்கிய இதழை ரோணியோ அச்சில் வெளிக்கொணர்ந்தேன். பின்னர் தாகம் அச்சிதழாக வெளிவந்தது. இக் காலங்களில் எனது இலக்கிய ஆர்வத்தை எனது தமிழ் ஆசிரியர் திருமலை நவம் அவர்களும் தூண்டிவிட்டார்.

இற்றை வரைக்கும் எவ்வாறான ஆக்கங்களை எழுதியுள்ளீர்கள்?

கவிதை, சிறுகதை, நாவல், நாடகம், கட்டுரை என இலக்கியத்தின் பல வடிவங்களையும் தொட்டுள்ளேன்.

முதன் முதலாகக் கவிதை எழுதிய தருணம் எது?

ஆரம்ப காலங்களில் நான் கட்டுரையும், சிறுகதைகளும் எழுதிய காலத்தில் எனது தமிழ் ஆசிரியை திருமதி கந்தையா அவர்களின் தூண்டுதலால் கவிதை எழுதினேன். எனது முதல் கவிதை ஈழத்தில் இன்று மிக முக்கியமான பெண் கவிஞராக அறியப்படும் பாலையூற்று அஷ்ரபா நூர்டீன் அவர்களின் தினகரன் கவிதைச் சோலைப் பகுதியில் 1984.07.26 இல் வெளிவந்த 'மஜ்னூக்கள்' என்ற கவிதைக்கு பதில் கவிதையாக 'லைலாக்கள்' என்ற தலைப்பில் எழுதினேன். இந்தக் கவிதையே நான் எழுதிய முதலாவது கவிதை. இது தினகரன் பத்திரிகையின் கவிதைச் சோலைப் பகுதியில் 1984.08.09 இல் வெளியாகியிருந்தது. அத்துடன் இதுவே எனது முதல் கவிதைப் பிரசுரமாகவும் அமைந்தது. 

இதுவரை வெளிவந்த உங்களது நூல் அறுவடைகள் பற்றிக் குறிப்பிடுங்கள்?

இதுவரை வெளியிட்ட நூல்களாக பின்வரும் 06 நூல்களையும் குறிப்பிடலாம்.

01. என் பிரிய ராஜகுமாரிக்கு - கவிதை (1992)

02. பரசுராம பூமி - சிறுகதை (2018)

03. சிலுவைகளே சிறகுகளாய் - கவிதை (2019)

04. வீணையடி நீ எனக்கு - நாவல் (2021)

05. இவனைச் சிலுவையில் அறையுங்கள் - கவிதை (2021)

06. எழுதித் தீரா பிரியங்கள் - கவிதை (2021)

எனது முதலாவது நூல் வெளியீடும் கவிதை நூலுமான 'என் பிரிய ராஜகுமாரிக்கு' என்ற நூல் 1992 இல் வெளிவந்தது. அக்காலத்தில்தான் தமிழில் கணனி எழுத்துக்கள் அறிமுகமாகி, வீரகேசரி பத்திரிகையின் வார வெளியீடு கணனி மயப்படுத்தலோடு வெளிவந்தது. எனது கவிதை நூலின் அட்டையும் கணனி மூலமான வடிவமைப்பில் வெளிவந்தது குறிப்பிடத்தக்கது. அந்தவகையில் இது கணனி மூலமான அச்சில் வெளிவந்த முதல் கவிதை நூலானது. இதன் முன் பின் அட்டைப் படத்தினை நண்பர் கவிஞர் ஜபார் வடிவமைத்திருந்தார். பின் அட்டையில் என்னைப் பற்றிய குறிப்பினை நண்பரும் கலைஞருமான அமரர் ஸ்ரீதர் பிச்சையப்பா தனது அழகிய கையெழுத்தில் கவிதை வடிவில் எழுதியிருந்தார். முன் பின் அட்டைகள் இரு கவிஞர்களின் கை வண்ணத்தில் பெறுமதி சுமந்த இத்தொகுப்பு தாகம் பதிப்பகத்தின் ஐந்தாவது வெளியீடாக வெளிவந்தது. 

எனது இரண்டாவது கவிதை நூல் 'சிலுவைகளே சிறகுகளாய்' 2019 இல் கிட்டத்தட்ட 27 வருடங்களின் பின்னர் மகுடம் பதிப்பகத்தினால் மட்டக்களப்பில் வெளியிடப்பட்டது. இந்த நூலானது பேராசிரியர் செ. யோகராசாவின் அணிந்துரையுடனும் எழுத்தாளர் நந்தினிசேவியரின் பின்னுரையுடனும் வெளிவந்தது. மேலும் எனது சிலுவைகளே சிறகுகளாய் கவிதை நூல் 2000 ஆம் ஆண்டுக்கான தேசிய சாகித்திய விருதுக்கு பரிந்துரைக்கப்பட்ட மூன்று நூல்களில் ஒன்றாகத் தெரிவு செய்யப்பட்டதுடன் அந்த ஆண்டில் இந்திய திருப்பூர் இலக்கிய விருதுக்கும் தெரிவு செய்யப்பட்டது.

2021 ஆரம்ப காலத்தில் எனது 'வீணையடி நீ எனக்கு' என்ற நாவல் வெளியானது. 2021 இன் இறுதியில் எனது மூன்றாவது கவிதை நூலான 'இவனைச் சிலுவையில் அறையுங்கள்' என்ற நூல் தமிழகப் பேராசிரியர் அ. ராமசாமி, கிழக்குப் பல்கலைக்கழக சிரேஷ்ட விரிவுரையாளர் அருட் பணி அகுஸ்தின் நவரெட்ணம் ஆகியோரின் அணிந்துரைகளுடன் வெளிவந்தது. இதேகாலப் பகுதியில் எனது நான்காவது கவிதை நூலான 'எழுதித் தீரா பிரியங்கள்' வெளியானது குறிப்பிடத்தக்கது. 

நீங்கள் வெளியிட்ட "பரசுராம பூமி" சிறுகதை நூல் பற்றி?

பரசுராம பூமி 2018 இல் வெளிவந்த எனது முதலாவது சிறுகதைத் தொகுப்பாகும். அது வெளிவந்த ஆண்டுக்கான கிழக்கு மாகாண சாகித்திய விருதைப் பெற்றுக்கொண்டது. பரசுராம பூமியின் சிறுகதைகள் அனைத்தும் மறுவாசிப்புக் கதைகள் ஆகும். முழுக்க முழுக்க தொன்மங்களையும், இதிகாச, புராண, மறை நூல்களை மறுவாசிப்புக்கு உட்படுத்தும் தமிழின் முதல் சிறுகதைத் தொகுப்பு என்ற பிரகடனத்துடன் வெளிவந்த இந்தத் தொகுதி ஒன்பது சிறுகதைகளைக் கொண்டது. பேராசிரியர் சி. மௌனகுரு, பேராசிரியர் செ. யோகராசா, கவிஞர் ஜிப்ரி ஹசன் ஆகியோரின் அணிந்துரைகளுடன் வெளிவந்த இந்த நூலின் வெளியீடு மட்டக்களப்பிலும், அறிமுக நிகழ்வுகள் திருகோணமலையிலும், யாழ்ப்பாணத்திலும் நடைபெற்றது.

உங்கள் "சிலுவைகளே சிறகுகளாய்" கவிதை நூலின் வரவு பற்றி என்ன குறிப்பிடுவீர்கள்? இந்த நூலில் உள்ளடங்கியுள்ள கருப்பொருட்கள் பற்றியும் குறிப்பிடுங்கள்?

சிலுவைகளே சிறகுகளாய் எனது இரண்டாவது கவிதை நூலாகும். முப்பது வருடகாலமாக எமது மண்ணிலே நடைபெற்ற போராட்டம் தொடர்பான, அதன் இழப்புகள், வலிகள், வேதனைகள்  பற்றி நிறையவே பேசிய தொகுப்பு. தேசிய சாகித்திய விருதுக்கு பரிந்துரைக்கப்பட்ட மூன்று நூல்களில் (2019) முதல் நூல் இதுவாகும். இது இந்திய திருப்பூர் இலக்கிய விருதும் பெற்றது.

சமகாலமாக நாவல் இலக்கியங்களின் வரவு கணிசமாக குறைந்து வருகின்றது. அந்தவகையில் உங்களின் முதல் நாவலின் தனித்துவம் பற்றிக் குறிப்பிட முடியுமா?

"வீணையடி நீ எனக்கு" (2021) என்ற எனது முதல் நாவல் கிழக்குப் பல்கலைக்கழக வாழ்வியலை பேசும் முதல் நாவலும் ஈழத்தில் முழுக்க முழுக்க பல்கலைக்கழக வாழ்வியலைப் பேசி வெளிவந்த மூன்றாவது நாவலுமாகும். இதுவும் காதலையும், அரசியலையும் இணைத்த வகையில் திருகோணமலை, மட்டக்களப்பு என்ற இரு பிரதேசங்களையும் வைத்து எழுதப்பட்டதாகும்.

"வீணையடி நீ எனக்கு" நாவலின் மூலம் சமூகத்துக்குச் சொல்ல விரும்பும் விசேட செய்தி என்ன?

நான் எனது எழுத்துக்கள் மூலம் போதனை செய்வதில்லை. சமூகத்தில் இருந்து பெற்றதை, எடுத்ததை சமூகத்திற்கே திருப்பிக் கொடுக்கின்றேன். அந்தவகையில் "வீணையடி நீ எனக்கு" என்ற நாவல் எனது பல்கலைக்கழக வாழ்வின் அனுபவங்கள். அங்கு நான் பெற்றதையும், எடுத்ததம் எனது நாவலில் திருப்பிக் கொடுத்துள்ளேன்.

உங்களது படைப்புகள் பெண்களின் பிரச்சினைகளைப் பேசியிருக்கின்றதா?

நிறையவே பேசி இருக்கின்றது. "வீணையடி நீ எனக்கு" நாவலே முழுக்க முழுக்க பெண்களின் வாழ்வியலுடன் தொடர்புபட்ட அவர்களது பிரச்சனைகளைச் சொல்லும் நாவலாகவும்  கொள்ளலாம். இராணுவத்தால் பாதிக்கப்பட்ட ஒரு இளம் பெண்ணின் கதையாகவும் கொள்ளலாம். மேலும் இதுவரை யாருமே எழுதாத ஊர்மிளையைப் பற்றி எனது ஓர்மம் சிறுகதையில் பேசியுள்ளேன். 

ஊர்மிளை ராமாயணத்தில் இலக்குவனனின் மனைவி. 14 வருடங்கள் கட்டில் வசித்த அண்ணன் ராமனுக்கு துணையாக இலக்குவன் சென்றுவிடுகிறான். காட்டில் ராமன் சீதையுடன் இணைந்தே இருந்தான். ஆனால் 14 வருடங்கள் இலக்குவனனும், ஊர்மிளையும் பிரிந்தே வாழ்ந்தனர். யாருமே ஊர்மிளையைப் பற்றிப் பேசுவதில்லை. பலருக்கு ஊர்மிளையின் பெயரே தெரியாது. 14 வருடங்கள் கணவனைப் பிரிந்து வாழ்ந்த அவளது மன உணர்வுகளை எனது ஓர்மம் கதையில் சொல்கிறேன்.

இன்னும் யாருமே அணுகாத புதிய பார்வையில் அகலிகையை வைத்து எழுதிய வரம் என்ற சிறுகதை முக்கியமானது. இப்படி இன்னும் பல கதைகளைக் கூறலாம்.

ஒரு சஞ்சிகையாசிரியராக "மகுடம்" சஞ்சிகையின் வரவு பற்றி என்ன சொல்வீர்கள்?

முதன் முதலாக மகுடம் சஞ்சிகை 2012 இல் வெளிவந்தது. மகுடம் கலை இலக்கிய சமூக பண்பாட்டு காலாண்டிதழாக இன்றுவரை தொடர்ந்து வெளிவருகிறது. இதுவரை 13 சஞ்சிகைகள் காலாண்டு இதழ்களாக வெளிவந்துள்ளது. எமது மகுடம் சஞ்சிகை பழமைக்கும் நவீனத்துவத்துக்குமான ஒரு பாலமாக, தொன்மங்களுக்கூடான எம் வரலாற்றைப் பேசும் இலக்கிய முயற்சிகளுக்கு களம் அமைத்துக் கொடுக்கிறது. அண்மையில் ஞானம் சஞ்சிகை ஆசிரியரின் பவள விழாப் நிகழ்வில் சஞ்சிகைக்களுக்கிடையிலான போட்டியில் மகுடம் சஞ்சிகை தேசிய ரீதியில் இரண்டாம் இடம் பெற்று 15,000 ரூபாய் பரிசினைப் பெற்றுக்கொண்டது

"மகுடம்" சஞ்சிகையின் சிறப்பம்சங்கள் குறித்தும் அதன் சமூகப் பயன்பாடுகள் குறித்தும் கூறுங்கள்?

மகுடம் ஏனைய கலை இலக்கிய சஞ்சிகைகளிலிருந்து வேறுபடுவதற்கு காரணம் அது தனது ஒவ்வொரு இதழையும் சிறப்பிதழாக வெளியிடுவதாகும். இதுவரை மகுடம், தமிழ்த் தூது தனிநாயகம் அடிகள் சிறப்பிதழ், மலையகச் சிறப்பிதழ் சிறுகதைச் சிறப்பிதழ், பிரமிள் சிறப்பிதழ் எஸ்.பொ. சிறப்பிதழ், கனடா சிறப்பிதழ், பேராசிரியர் மௌனகுரு இரட்டைச் சிறப்பிதழ், மருதூர்க் கொத்தன் சிறப்பிதழ், என பல சிறப்பிதழ்களை அதுவும் மலையகத்துக்கு எந்தவொரு சஞ்சிகையும் செய்யாத விடயமாக இரண்டு முறை (04 ஆவது, 08 ஆவது) சிறப்பிதழ்களை வெளியிட்டுள்ளது. மேலும் மகுடம் கலை இலக்கிய வட்டத்தினை ஆரம்பித்து இதுவரை 42 நிகழ்வுக்கும் மேலான பௌர்ணமி கலை இலக்கிய நிகழ்வுகளை நடாத்தியுள்ளது.

மகுடம் 09 ஆவது இதழ் ஈழத்தில் மட்டுமல்லாது இந்திய அளவில் புகழ்பெற்ற கவிஞர் பிரமிள் என்கிற தர்மு சிவராமுவுக்கு சிறப்பிதழ் வெளியிட்டது. இதன் 50 பிரதிகள் தமிழகத்திற்கு அனுப்பப்பட்டது. ஆனால் இந்த பிரதிகள் போதாமையின் காரணமாக மகுடம் பிரமிள் சிறப்பிதழ் தமிழ் நாட்டில் மறுபதிப்பு  (Reprint) செய்யப்பட்டு வெளியிடப்பட்டது குறிப்பிடத்தக்கது. ஈழத்தின் சிற்றிதழ் ஒன்று தமிழகத்தில் விற்பனைக்கு சென்றதும், அங்கு மறுபதிப்பு செய்யப்பட்டதும் சிற்றிதழ் வரலாற்றில் இது ஓர் சரித்திர நிகழ்வாகும். ஈழத்து இதழிற்கு கிடைத்த பெறுமையாகும்.

மகுடம் பதிப்பகம் மூலம் இதுவரை 60 க்கும் மேற்பட்ட நூல்களை வெளியிட்டுள்ளது. இன்றைய கொரோனா பேரிடர் காலத்திலும் 2021 இல் 20 க்கும் மேற்பட்ட நூல்களை வெளியிட்டு சாதனை படைத்துள்ளது. 2022 இல் இதுவரை 12 நூல்களை வெளியிட்டுள்ளது. இவ்வருட இறுதிக்குள் இது 20 நூல்களாகும். 

புலம் பெயர் படைப்பாளிகள் பலர் தாயகத்தில் தமது நூல்கள் வெளிவர வேண்டும் என்றும், அவர்கள் இல்லாவிட்டாலும் அதற்கான விழாக்கள், அங்கு நடைபெற வேண்டும் என்றும் விரும்புகின்றனர். மகுடம் அதற்கான ஏற்பாடுகளை செய்வதனாலும், அச்சுத் தொழில் நுட்பம், வடிவமைப்பு போன்றவற்றில் மகுடம் ஒரு வித்தியாசத்தைக் கடைப் பிடிப்பதினாலும் மகுடம் மூலம் தமது நூல்களை வெளிக்கொணர அவர்கள் விரும்புகின்றனர். மகுடம் கடந்த ஆண்டு வெளியிட்ட 20 நூல்களில் 10 நூல்கள் புலம்பெயர்ந்து வாழும் படைப்பாளர்களது நூல்கள் என்பது குறிப்பிடத்தக்கது. அத்துடன் கடந்த ஆண்டிலும் இந்த ஆண்டிலும் தாயகத்தில் அதிக தமிழ் நூல்களை வெளியிட்டது மகுடமாகத்தான் இருக்கும் என்பதை மிகுந்த மன நிறைவோடு குறிப்பிடுகின்றேன்.

இணையப் பாவணை அதிகரித்துள்ள தற்காலத்தில் சஞ்சிகைக்கான வாசகர்கள் போதியளவு காணப்படுகின்றார்களா?

இல்லை என்றுதான் சொல்ல வேண்டும். ஆனால் எழுத்தை கண்களால் தடவி அச்சு வாசனையை நுகர்ந்தபடி கையில் சஞ்சிகையை வைத்து வாசிக்கும் அந்த உணர்வு இணையத்தில் இல்லை. அந்த உணர்வு உள்ளவரை சஞ்சிகைகள் வெளிவந்து கொண்டுதான் இருக்கும்.

சஞ்சிகைகளைத் தொடர்ந்து வெளியீடு செய்வது சிரமமான பணியாகத் தோன்றவில்லையா?

இன்றைய அச்சகப் பொருட்களின் விலை ஏற்றம் சஞ்சிகைகளை மட்டுமல்ல நூல்கள் வெளியிடுவதையும் கேள்விக் குறியாக்கியுள்ளது.

எழுத்துத் துறையில் உங்களை வியப்பில் ஆழ்த்தியவர்கள் யார்? ஏன்?

பலர் உண்டு. தொடர்ச்சியான அவர்களது எழுத்தால் பிரமித்து போய் உள்ளேன்.

நீங்கள் அண்மையில் வாசித்த படைப்புகளில் உங்கள் மனதில் பதிந்துள்ள ஒரு படைப்பு பற்றிச் சொல்வீர்களா?

1992 - 1993 காலப் பகுதி எனது பல்கலைக்கழக வாழ்வியலின் முதலாம் வருடம். இக்காலப் பகுதியில் கண்டி சத்தியோதய நிறுவனத்தின் சார்பில் தமிழில் முதல் முறையாக நடாத்திய தமிழ் மொழி மூலத் தொலைக்காட்சிப் பாடநெறியில் கிழக்கில் இருந்து நான் தெரிவு செய்யப்பட்டிருந்தேன். மூன்று மாத காலம் நடைபெற்ற இந்த டிப்ளோமாப் பயிற்சி நெறியில் இயக்கம் - திரைக் கதை எழுதல் ஆகிய துறைகளில் நான் பயிற்சி பெற்றேன். பிரபல சிங்கள திரைப்பட இயக்குனர்கள் பலர் இப்பயிற்சி நெறியின் வளவாளராகக் கலந்து கொண்டனர். 

இக்காலப் பகுதியில் தேசிய இளைஞர் சேவைகள் மன்றம் நடாத்திய தொலைக்காட்சி நாடகப் பிரதியாக்கல் போட்டியில் தேசிய ரீதியாக பரிசு பெற்ற 'மரபை மீறும் மானுடம்' என்ற தொலைக்காட்சி நாடகப் பிரதியை எனது தொலைக்காட்சி பயிற்சி நெறி முடிந்தவுடன் திருகோணமலையில் குறும்படமாக எடுத்தேன். அதில் திருமலையைச் சேர்ந்த எனது  பல்கலைக்கழக நுண்கலைத் துறை மாணவி கதாநாயகியாக நடித்ததும், தென்றலும் புயலும் திரைப்படப் புகழ் பிரபல திருமலை நாடக நடிகர் அமரர் சித்தி அமரசிங்கம் நடித்திருந்ததும் குறிப்பிடத்தக்கது. அதன்பின்னர் நான் அதிகம் கலை இலக்கிய ரீதியாக செயற்பட்டதும், வெளியீட்டு முயற்சிகளில் இறங்கியதும் குறும்பட முயற்சிகளில் ஒரு தேக்க நிலையை ஏற்படுத்திவிட்டது.

நீங்கள் மிகப் பெரிய பலமாக எதனைக் கருதுகின்றீர்கள்?

நான் எதனையும் சவாலாக எடுப்பதில்லை. தடைக் கற்களையும் படிக் கட்டுக்களாக மாற்றியபடி எனது பயணம் தொடர்ந்து கொண்டேயிருக்கிறது. பதவி, பட்டங்கள் என நின்று நிதானித்தாலே சில சிக்கல்களும் மன அவஸ்தைகளும் ஏற்படும். நான் தொடர்ந்து இயங்கிக் கொண்டிருக்கிறேன். இயங்குவேன். அதுவே நான். இயங்குதலே எனது வெற்றி. கலைப் பணி என்னைப் பொறுத்தவரை ஒரு தவம். இது வரங்களை எதிர்பார்த்த தவம் அல்ல. வரங்களை வழங்கும் தவம். இதுவே எனது பலம்.

படைப்புகளை நீங்கள் பார்க்கும் பார்வை திறனாய்வா அல்லது விமர்சனமா?

இரண்டும் இல்லை. ஒரு வாசகனாக குறித்த படைப்பாளி தனது படைப்பின் மூலம் என்ன சொல்ல வருகின்றான் என்பதையே பார்க்கிறேன். விமர்சன, திறனாய்வு பார்வைகளால் பார்த்தால் படைப்பை ருசித்து அனுபவிக்க முடியாது.

உங்கள் இலக்கிய வாழ்வில் உங்களால் மறக்க முடியாத சம்பவம் ஒன்றைக் குறிப்பிடுங்கள்?

1988 காலப் பகுதியில் உயர் தரம் படித்துக்கொண்டிருந்தேன். இக்காலத்தில் தாகம் சஞ்சிகையின் ஆசிரியராகவும் இருந்தேன். எமது மண்ணிலே இந்திய ராணுவம் குடி கொண்டிருந்த காலம் அது. தாகத்தில் வெளிவந்த எனது ஆட்டாமா ரொட்டியும் ஆட்டிறைச்சி கறியும் என்ற கவிதைக்காக இந்திய ராணுவம் கைது செய்து ஒரு வாரம் வைத்திருந்தார்கள். எனது கவிதை இந்திய வல்லாதிக்கத்தையே அசைத்ததை என்னால் இன்றும் மறக்க முடியாது

எதிர்கால எழுத்து முயற்சிகள் பற்றிக் குறிப்பிடுங்கள்?

2022 ஜுன் மாதம் 26 ஆம் திகதி எனது ஏழாவது நூலும் ஐந்தாவது கவிதை நூலுமான "என் இனிய பட்டாம் பூச்சிக்கு" கவிதை நூல் வெளிவருகிறது. எனது காதல் மனைவியின் பிறந்த நாளை முன்னிட்டு தினம் ஒரு கவிதையாக எழுதிய 44 கவிதைகளின் தொகுதியாகவே இந்த நூல் அமைகிறது. இது வெறும் காதல் கவிதைகள் அல்ல. காதலுக்கூடாக எமது மண்ணைப் பற்றியும், எமது பெருமை பற்றியும், எமது தொன்மம் பற்றியும் பேசும் நூலாகும். அத்துடன் 2023 இல் எனது "அன்பின் முத்தங்கள்" என்ற கவிதை நூலும் 'பொஞ்சியூ பிலாத்து" என்ற குறுநாவலும் வெளிவரும்.

கலை இலக்கியத் துறையில் உங்களுக்கு அல்லது உங்கள் படைப்புகளுக்கு கிடைத்த பாராட்டுக்கள், கௌரவங்கள், பட்டங்கள், விருதுகள் பற்றிக் கூறுங்கள்?

பல கலை இலக்கியப் போட்டிகளில் பிரதேச, மாவட்ட, மாகாண, தேசிய மட்டங்களிலும் விருதுகள் பெற்றுள்ளேன். பாடசாலை காலத்தில் இருந்து விருதுகளை வரிசைப் படுத்தினால் இந்த நேர்காணலைப் போல் அது இன்னுமொரு நேர்காணலாக நீண்டுவிடும். ஆனாலும் ஒன்றிரண்டை மட்டும் குறிப்பிடுகிறேன். 

1) 2014 இல் கதிரவன் கலைக் கழகம் லண்டன் அம்மா நிறுவனத்துடன் நடாத்திய விருது விழாவில் இயக்குனர் பாரதி ராஜாவினால் விருது வழங்கப்பட்டது.

2) 2015 இல் தடாகம் பன்னாட்டு நிறுவனம், மலேசியா தமிழ் எழுத்தாளர் ஒன்றியம், கனடா  படைப்பாளிகள் நிறுவனம் இணைந்து நடாத்திய விழாவில் "தமிழ்மணி" விருது வழங்கப்பட்டது.

3) 2019 இல் எனது பரசுராம பூமி சிறுகதைத் தொகுப்புக்கான கிழக்கு மாகாண சாகித்திய விருது

4) 2019 இல் தேசிய ஒருமைப்பாடு, அரச கரும மொழிகள், சமூக முன்னேற்றம், மற்றும் இந்து சமய அலுவல்கள் அமைச்சின் கௌரவ அமைச்சர் மனோ கணேசன் வழங்கிய 'கலைச்சுடர்" விருது.

எனக்கு கிடைத்த முக்கியமான விருதுகளை மட்டுமே மேலே குறிப்பிட்டுள்ளேன். கலை இலக்கியப் போட்டிகளில் பெற்ற பரிசில்களைக் குறிப்பிடவில்லை. பொதுவாக பல கலை இலக்கிய போட்டிகளில் பரிசில்களைப் பெற்றுள்ளேன். அவற்றை முழுமையாகக் குறிப்பிட இந்த நேர்காணல் பக்கங்கள் இடம் தராது என்று நினைக்கின்றேன்.

இந்த நேர்காணல் மூலம் வேறு என்ன கூற விரும்புகிறீகள்?

கலை இலக்கிய உலகில் அறிவுரைகள் தேவையில்லை. தேடலே முக்கியம். நான் இன்னமும் கற்றுக் கொண்டிருக்கும் மாணவனே. கலை இலக்கியம் மட்டுமல்ல எந்தத் துறையிலும் தொடர்ந்து இயங்குதலே முக்கியம். விமர்சனங்களை புறந்தள்ளி தொடர்ந்து இயங்குதல் முக்கியமானது. இங்கும் தக்கன பிழைக்கும் தகாதன மறையும்.  

வெலிகம ரிம்ஸா முஹம்மத்

41. எழுத்தாளர் சூசை எட்வேட் அவர்களுடனான நேர்காணல்

 எழுத்தாளர் சூசை எட்வேட் அவர்களுடனான நேர்காணல்

நேர்கண்டவர்:- வெலிகம ரிம்ஸா முஹம்மத்

உங்களைப் பற்றிய அறிமுகம், பாடசாலை வாழ்க்கை, தொழில் அனுபவம் பற்றிய தகவல்களை எமது வாசகர்களுக்காகக் கூறுங்கள்?

எனது சொந்தப் பெயரே சூசை எட்வேட் தான். சொந்த இடம் திருகோணமலை. விவாக சம்பந்தம் யாழ்ப்பாணம். அங்கும் சில காலம் வாழ்ந்திருக்கிறேன். திருமலை சென் சேவியர் பாடசாலையில் கல்வி கற்றேன். க.பொ.த. சாதாரண தரத்தில் திறமைச் சித்தியடைந்தேன். உயர் தரத்திலும் சேர்ந்து படித்தேன். மூன்று நான்கு புத்தகங்களையே உருப்போட்டுப் படிக்கும் கல்வி முறை எனக்கு அலுப்புத் தட்டியது. பின்னர் என் தந்தையாரின் சிகையலங்கரிப்பு நிலையத்தில் தொழில் பழகி நானுமொரு சிகையலங்கரிப்பாளன் ஆனேன்.

உங்களுக்கு இலக்கியத் துறையில் ஆர்வம் வந்தது எப்படி?  

நான் சிறுவனாக இருந்தபோது அம்மாவின் சகோதரரங்களின் குடும்பங்களும் அங்கு இருந்தனர். படித்தவர்கள், நூல்களை வாசிப்பவர்களும் அங்கிருந்தார்கள். பத்திரிகைகள், சஞ்சிகைகள், அம்புலி மாமாவிலிருந்து ஆனந்த விகடன், கல்கி, குமுதம் என்று இலக்கிய இதழ்கள் வந்து குவியும். வாசிகசாலைக்குப் போயும் வாசிக்கும் பழக்கமும் எனக்கு இருந்தது. அந்த வாசிப்புகளின் மீதான ஈர்ப்பே எனது இலக்கிய ஆர்வத்துக்குக் காரணமாக அமைந்தது.

உங்களிடையே வாசிப்புப் பழக்கம்; எப்படித் தொடங்கியது?  

எமக்குப் பிடித்த ஆசிரியர் தன் சுய முயற்சியால் நூல்களை சேகரித்து பாடசாலையில் நூல் நிலையத்தை சிறிதளவாக ஆரம்பித்தார். எம்மை வாசிக்கத் தூண்டினார். அவர் ஒரு நாள் படிப்பிக்கும் போது, ஒரு கதை சொன்னார். அப்போது அவர், ஷஷபேரறிஞர் பேர்னாட்ஷா இளம் பராயத்திலேயே நாளாந்தம் ஐந்து பக்கம் எழுதிவிட்டுத்தான் சாப்பிட, தூங்கப் போவாராம். அப்படி எழுதி எழுதி பயிற்சி பெற்றுத்தான் அவர் உலகமே போற்றும் பேரறிஞர் ஆனார்|| என்ற தகவலைச் சொன்னார். இது என் நெஞ்சில் தடம் பதித்தது. அவ்வாறே நானும் எழுதிப் பயன் பெற்று வந்தேன். அந்தப் பழக்கமே இந்தளவாவது என்னை உயர்த்திவிட்டது.

உங்களை இத்துறையில் ஊக்குவித்தவர்கள் பற்றிக் குறிப்பிடுங்கள்?  

படிப்பை கைவிட்ட பிறகு நான் திருமலை நூல் நிலையத்தில் அதிக நேரத்தைச் செலவிட்டேன். நூல் நிலையத்தில் அங்கத்தவராக சேர்ந்து, புத்தகங்களை வீட்டுக்குக் கொண்டு வந்து வாசிப்பதிலும் ஆர்வமாயிருந்தேன். அப்போது திரு. அரியநாயகம் நூலகப் பொறுப்பாளராக இருந்தார். அந்தக் காலத்தில் அவரின் சிறுகதைகள் பத்திரிகைகளில் அடிக்கடி வரும். அவர் நன்கு பிரபலமாகியிருந்தார். நான் அடிக்கடி நூல் நிலையம் வருவதும் புத்தகங்கள் எடுப்பதும் படிப்பதுமாக இருப்பதால் என்னில் அவருக்கும், அவரில் எனக்கும் ஒரு ஈர்ப்பு, பிடிப்பு ஏற்பட்டு சினேகிதமாகியது. அவர்தான் எனக்கு நல்ல எழுத்தாளர்களை, கதாசிரியர்களை அறிமுகப்படுத்தி என்னை முதன் முதலில் ஊக்குவித்தார். என்னோடு பழகிய அனுபவத்தில் அவர் ஒரு நாள் என்னிடம், "நீயும் ஒரு நாள் பெரிய எழுத்தாளனாவாய்" என்று சொன்னார். அப்போது நான் கட்டைக் கால்ச் சட்டைதான் போட்டிருந்தேன்.

இலக்கிய நூல்களை தீவிர வாசிப்புக்கு உட்படுத்தி வரும் நீங்கள், உங்களை மிகவும் கவர்ந்த நூலாக எந்த நூலைக் குறிப்பிடுவீர்கள்? அந்த நூலைப் பற்றி கொஞ்சம் சொல்லுங்கள்?

நான் சின்ன வயதிலிருந்து முதுமைப் பிராயத்திலும் நூல்களை வாசித்து வருபவன்தான். ஆனால் திருக்குறள், நாலடியார், கம்பராமாயணம், சிலப்பதிகாரம் என்று சித்தர் பாடவென்று நம் பழந்தமிழ் புலவர்கள் எழுதி வைத்தது போன்று நம் தலைமுறையில் எத்தனை எத்தனை வெளியீடுகள் செய்தாலும் அவைகளுக்கு கிட்ட நிற்க முடியாது. காலம் கடந்தும் வாழும் இலக்கியங்கள் அவைதாம். 

நான் வாசிக்கும் காலத்தில் கூடுதலாக டாக்டர். மு. வரதனாரின் கதைகளையே விரும்பி வாசிப்பேன். அவர் கருத்தில்லாமல் ஒரு கதையும் எழுத மாட்டார். நானும் கருத்தில்லாமல் ஒரு கதையும் எழுதுவதில்லை. அவருக்கு கருத்துப் பிரசாரம் செய்பவர் என்ற ஒரு குற்றச் சாட்டும் உண்டு.

நீங்கள் இதுவரை எழுதிய சிறுகதைகள் பற்றி பொதுவாகக் குறிப்பிடுங்கள்?

என்னைப் பொறுத்தவரையில் வெறும் பொழுது போக்குக்காக, உல்லாச சல்லாபங்களுக்காக ஒரு கதையும் எழுதமாட்டேன். மக்களின் நல் வாழ்வுக்கான கருத்துக்களை இருத்தியே கதைகளை எழுதி வருகிறேன். சுமார் 20 வருடங்களாக 200 சிறுகதைகளுக்கும் மேல் எழுதியிருக்கின்றேன். அத்தனையும் எங்கள் மக்களின் துயரங்களையும் பிரச்சினைகளையும் சொல்லி, அதற்கான காரணங்களையும் சொல்லி, எல்லாவற்றையும் தீர்க்கும் வழிமுறைகளையும் சொல்லியே எனது கதைகளை சித்தரித்து வருகிறேன். இதற்குமேலும், தான் எழுதிய சிறுகதைகளைப் பற்றி அந்தக் கதாசிரியரே சொல்வதைவிட வாசகர்களின் அபிப்பிராயத்துக்கே அதனை விட்டு விடுகிறேன். 

சிறுகதைகளை எழுதும் போது உங்கள் மனநிலை எப்படி இருக்கும்?

கதைகள் எழுத ஆரம்பிக்கும் போது, ஷஷஆண்டவா! மக்கள் நல் வாழ்வுக்காக நல்லதைச் சொல்ல எனக்கு அருள் தாரும்|| என்று வேண்டிக் கொண்டே எழுத ஆரம்பிப்பேன். ஷஷமனம் ஒரு நிலைப்படும்|| என்றும் உச்சரித்துக்கொள்வேன்.

இதுவரை வெளிவந்த உங்கள் நூல் அறுவடைகள் பற்றிக் குறிப்பிடுங்கள்?

'கருத்துக் கலசம்' (2010) இது ஈற்றிசை வெண்பாவில் (குறள் நடை) எழுதியது. இந்த நூலில் ஆயிரத்து நூறு பாக்கள் உள்ளன. வாழ்க்கை அனுபவத்தால் அவ்வப்போது தோன்றும் கருத்துக்களைக் குறித்து வைத்து எழுதியவை. 

'இவன்தான் மனிதன்' (2013) என்னும் சிறுகதைத் தொகுதியையும் 'இங்கு வீசியது ஒரு சமாதான காற்று' (2019) எனும் தொகுதியையும் வெளியீடு செய்துள்ளேன். பத்திரிகைகளிலும் சஞ்சிகைகளிலும்  வெளிவந்த சிறுகதைகளே இந்த இரண்டு நூல்களிலும் இடம் பிடித்துள்ளன. இதுவரை நான் எழுதி வைத்துள்ள கதைகளில் கால் பகுதிக்கும் குறைவானவைதான் பத்திரிகைகளில், சஞ்சிகைகளில் பிரசுரமாகியிருக்கின்றன. அப்படிப் பிரசுரமானவற்றில் கால் பகுதிக்கும் குறைவானவையே நூலுருப் பெற்றுள்ளன. அச்சிடப்பட்ட எனது நூல்களும் தேங்கிக் கிடக்கின்றன. இதுவே என் பலவீனமான நிலையாகும்.

'கருத்துக் கலசம்' நூல் பற்றி விசேடமாகக் குறிப்பிட விரும்புவது என்ன?

இந்த உலகத்திலே மக்கள் வாழ்வு நலன் சார்ந்த அறிவு பூர்வமான நல் கருத்துக்;களை ஏழு சொற்களில் எழுதி முதல் தரமான சாதனை படைத்தவர் திருவள்ளுவர் தான். எனக்குக் கிடைத்த அனுபவங்களாலும், கற்ற அறிவுரைகளாலும், பொன் மொழிகளாலும் பெறப்பட்ட கருத்துக்கள் என் சிந்தனையில் ஓடிக்கொண்டிருக்கும். அவற்றை அவ்வப்போது குறித்து வைப்பேன். அப்படிக் குறித்து வைத்தவை தான் \கருத்துக் கலசம்\ ஆக உருவானது. இந்த நூலில் உள்ள ஈற்றிசை வெண்பாக்கள் (குறள் நடை), ஷநீங்களும் எழுதலாம்| கவிதை இதழிலேதான் கூடுதலாக வெளிவந்துள்ளது. இதே பாணியில் இன்னும் எழுதி வருகிறேன். விரைவில் இதே பாணியில் இன்னொரு நூல் வெளியீடு வரும் என்று சொல்லலாம்.

"இவன்தான் மனிதன்'" என்ற சிறுகதை நூலில் உள்ளடக்கம் பெற்றுள்ள கதைக் கருக்கள் பற்றி சுருக்கமாகக் கூறுங்கள்?

நான் யாழ்ப்பாணத்தில் குடியிருந்த போது பெற்ற அனுபவங்களால் எழுந்த சிறுகதைகளே இதில் அதிகமாக இந்த நூலில் இடம் பிடித்துள்ளன. ஈழத் தமிழரின் கலாசார பூமி யாழ்ப்பாணம்தான். இது நன்கு படித்தவர்கள், பெரிய மனிதர்கள் உள்ள இடம். ஆனால் அங்குள்ளவர்கள் சாதிக் கொடுமையை  ஒழிக்கவியலாமல் இன்னமும் கட்டிப்பிடித்துக்கொண்டு இருக்கிறார்கள். இவன்தான் மனிதன் என்ற சிறுகதைத் தொகுதியில் உள்ள கதைகளில் அனேகமானவை யாழ்ப்பாண சூழ்நிலையை மையமாகக் கொண்டு எழுதப்பட்டவையாகும்.

"இங்கு வீசியது ஒரு சமாதானக் காற்று" சிறுகதைத் தொகுதி பற்றியும் குறிப்பிடுங்கள்?

நான் திருகோணமலை வந்த பின்னர் தான் எழுத்தாளனானேன். இந்தச் சிறுகதைத் தொகுதியில் இடம்பெற்றுள்ளவை பெரும்பாலும் திருகோணமலைச் சூழலைச் சார்ந்தவையே. மூவின மக்களும் சேர்ந்து வாழும் இடம் திருகோணமலை. எனவே சமாதானம், ஐக்கியத்தை வலியுறுத்தி எழுதிய கதைகளையே, ஷஇங்கு வீசியது ஒரு சமாதானக் காற்று| என்ற இந்தச் சிறுகதை நூலில் சேர்த்துள்ளேன்.

சமுகத்தில் ஒடுக்கப்பட்ட மக்களுக்காக உங்கள் சிறுகதை முலம் குரல் கொடுப்பதாக அறிகின்றேன். அது பற்றியும் சொல்லலாமே?

இனவாத அரசுகளால் சிறுபான்மை இனங்கள் பாதிப்புறுகின்றன. அதற்காகக் கிளர்த்தெழும் இயக்கங்கள், கட்சிகள் தமக்குள் ஒற்றுமையில்லாமல் பிளவுபட்டு அடிபட்டு பலவீனமாகின்றன. எந்தப் போராட்டமும் பயனின்றி போகின்றன. சமுகத்துக்கு விமோசனம் கிடைப்பதாயில்லை. எது எப்படி இருந்தாலும் சமுகத் தலைவர்களாயிருந்தாலென்ன, சாதாரண பொதுமகனாயிருந்தாலென்ன அவர்கள் ஒருவருக்கொருவர் நல்லெண்ணமாய், மனத் தூய்மையாய் இருந்தாலே போதும். இதனாலே மனிதர்கள் எல்லாம், சமூகங்கன் எல்லாம் சுவீட்சம் பெற முடியும். என் எழுத்தின் ஆதார சுருதியே இதுதான்.  

உங்களுடைய படைப்புகள் குறித்து உங்கள் மதிப்பீடு என்ன? அது உங்களுக்குத் திருப்தி அளிக்கின்றதா?

எந்தப் படைப்பாளியும் தனது ஆக்கங்களைக் குறைவாக மதிப்பிடவே மாட்டான். குறை சொன்னால் சினப் படவும் செய்வான். இந்தப் பலவீனம் என்னிடமும் தொற்றிக்கொள்ளாமல் இல்லை. என்னை சுதாகரித்து மற்றவரின் அபிப்பிராயங்களுக்கு மதிப்பளித்து இன்னும் என்னை நான், புனர் நிர்மாணம் செய்துதான் வருகிறேன். இதுவரை எழுதி வெளியாகிய ஆக்கங்களைவிட சிறந்த படைப்புகளை உருவாக்க வேண்டும் என்ற ஆர்வத்திலேயே உள்ளேன். என்றாலும் நான் எழுதிக் குவித்தவற்றில் பெரும்பாலானவை இன்னும் பிரசுரிக்கப்படாமல், வெளியீடு செய்யப்படாமல் தேங்கிக் கிடக்கின்றன. அவற்றையெல்லாம் காலப்போக்கில் ஒவ்வொன்றாகப் பிரசுரித்து, வெளியீடு செய்து அறிமுகமாக்கினாலே போதும், எனக்கு ஆத்ம திருப்தி ஏற்பட்டுவிடும்.

ஒரு சிறுகதையின் மையக் கருவாக எவற்றையெல்லாம் நீங்கள் கருதுகிறீர்கள்?

நான் கட்சி கொள்கைக் கோட்பாட்டு ரீதியில் நின்று ஒரு பக்கச் சார்பாக எழுதுபவனல்ல. மக்களின் மேலான வாழ்வுக்காக எனக்குத் தெரிந்த சிறந்த கருத்துக்களை மையப்படுத்தியே ஆக்கங்களைப் படைக்கிறேன். அவற்றையே வாசகர்கள் எனது கதைகளில் காண முடியும்.

புற உணர்வுகளை விட அக உணர்வுகளை அதிகமாகப் பேசும் கதா பாத்திரங்களை உங்கள் சிறுகதைகளில் அதிகமாகக் காணலாமே. இதற்கான விசேட காரணம் என்ன?

சகல சீவராசிகளிலும் மனிதனுக்கு மட்டுமே மனம் உண்டு. ஒவ்வொரு மனிதனும் மனதாலேயே வாழ்கிறான். சிந்தனை இல்லாமல் ஒரு நிமிடம் கூட இரான். அனேகர் தம் எதிரிகளைப் போட்டி பொறாமையின் அடிப்படையில், கஷ்ட துன்பங்களின் அடிப்படையிலேயே நினைவுகளால் இழுபட்டு வாழ்கின்றனர். இந்த நினைவலைகளே மனம் போல வாழ்வென்று அவர்கள் வாழ்வை தீர்மானித்து குப்பைத் தொட்டியாக்கும். ஆகையால்தான் நற்சிந்தனையோடும் நல்ல அக உணர்வுகளோடும் இருந்தால்தான் சீராக வாழலாம். எனவே நான் அக உணர்வுகளுக்கு முக்கியத்துவம் கொடுத்து கதைகளை எழுதி வருகிறேன்.  

அதிகமான  சிறுகதைகளை எழுதியுள்ள நீங்கள் நாவல்களையும் எழுதலாமே. இதுவரை ஏன் நாவல்கள் எழுதுவது பற்றி சிந்தித்துப் பார்க்கவில்லை?

ஒவ்வொரு சிறுகதைகளிலுமே பல்வேறு விதமான வாழ்க்கைப் பிரச்சினைகளையும், அதற்கான தீர்வுகள் மற்றும் நல்லாலோசனைகளையும் சொல்லி வருகிறேன். இதுவே எனக்குத் திருப்தியாகிறது. ஆகையால் நாவல் எழுதுவது பற்றி நான் இதுவரை சிந்திக்கவில்லை. இனிமேல்த்தான் அதில் கவனம் எடுக்க வேண்டும். எதிர்காலத்தில் பார்க்கலாம்.

இப்போதுள்ள சில இலக்கியக் குழுக்களின் செயற்பாடுகள் சமூக மாற்றத்திற்கு எந்தளவில் பங்களிப்புக்களைச் செய்து வருவதாக நினைக்கிறீர்கள்? இலக்கியக் குழுக்களின் மீதான உங்கள் மதிப்பீடு என்ன?

இப்போதுள்ள இலக்கியக் குழுக்களானது கட்சி மற்றும் கொள்கைக் கோட்பாட்டு ரீதியில்த்தான் இயங்கி வருகின்றன. அவை பெரும்பாலும் தங்களைச் சார்ந்தவர்களை மட்டுமே வளர்த்து, புகழடையச் செய்கின்றன. இலக்கியவாதியாக இருந்தாலென்ன, குழுவாக இருந்தாலென்ன, அவை நடுநிலமையில் நின்று இயங்க வேண்டும். அதுவே ஆரோக்கியமான இலக்கியச் சேவையாகும் என்பதே எனது கருத்து.

உங்களது தற்போதய இலக்கிய முயற்சி பற்றி?

எழுதிக் கொண்டே இருக்கின்றேன். ஆனால் எழுதிக் குவித்தவைகளை பிரசுரமாக்குவது, நூலுருவாக்குவது போன்ற விடயங்களில் பெரும் சிக்கலில், பலவீனத்தில் உள்ளேன். எந்தவிதமான இலக்கியக் குழுக்களிலும் எனக்கு உதவுவார் இல்லை.

இந்தக் கொரோனாக் காலத்தில் இலக்கிய நூல் பதிப்புச் செயற்பாடுகள் எப்படி உள்ளது?

கொரோனாத் தாக்கம் எந்த மனிதரையும் விட்டு வைக்கவில்லையே. எழுத்தாளர்கள், இலக்கியவாதிகள் மட்டும் எப்படித் தப்ப முடியும்? எழுதிய பல சிறுகதைகளை பத்திரிகைகளுக்கும் சஞ்சிகைகளுக்கும் அனுப்பவே படாதபாடு படவேண்டி இருக்கிறது. அவைகளும் சிரமத்துக்குள்ளாகி மிகவும் தாமதித்தே பிரசுரிக்கிறார்கள். இப்போதெல்லாம் இலக்கிய ஆக்கங்கள் வெளிவருவதே அருமையாகிவிட்டது.

புத்தகக் கண்காட்சிகளும் அவ்வப்போது நடைபெற்று வருவதாகவே அறிகிறேன். இந்த கண்காட்சிகளில் புத்தகங்களும் விற்பனையாவது தெரிகிறது. வாசகர்களது இரசனை எந்த மட்டத்தில் இருப்பதாக நினைக்கிறீர்கள்?

புத்தகக் கண்காட்சி பற்றி குறிப்பிட்டீர்கள். இவையெல்லாம் எனக்கு எட்டாக் கனியே ஆகும். வாசகர்களின் தற்போதைய இரசனையும் எம் போன்றவர்களைவிட்டு எட்டியே போய்விட்டன. இப்போதெல்லாம் தொலைக்காட்சி, இணையத்தளம், முகநூல். என்று இளைய தலைமுறையின் இரசனை அதற்குத் தாவிப் போய்விட்டது. ஒரு புத்தகத்தை எடுத்து பொறுமையாக இருந்து வாசிப்பார் இல்லை. இந்த நிலையில் ஆக்க இலக்கியப் படைப்பாளிகளின் நிலை சங்கடம்தான். ஆனாலும் ஷபுத்தகம்தான் காலம் கடந்தும் வாழும்| என்பதை எல்லோரும் ஒத்துக்கொள்ளவே வேண்டும்.

நீங்கள் ஆக்கங்களை எழுதுவது, புத்தகங்களை வாசிப்பது இவற்றையெல்லாம் உங்களது வீட்டார்கள் எப்படி எடுத்துக் கொள்கிறார்கள்?

வயதான காலத்தில் நானும் மனைவியும் வீட்டில் தனியாகத்தான் இருக்கிறோம். என் மனைவி ஆக்கிப் படைத்து, வேளா வேளைக்கு சாப்பாடு தந்து போசிப்பா. நான் நிம்மதியாக இருந்து வாசிக்கிறேன்;, எழுதுகிறேன், இலக்கியப் பணி புரிகிறேன்.

மற்ற எழுத்தாளர்களோடு உங்களுக்குத் தோழமையான உறவுகள் இருக்கிறதா? அவர்களது படைப்புகளை நீங்கள் எப்படிப் பார்க்கிறீர்கள்?

மற்ற எழுத்தாளர்களோடும், படைப்பாளிகளோடும் எனக்குச் சுமூகமான உறவுண்டு. யாரையும் விரோதித்துக்கொள்ள நான் விரும்புவதில்லை. ஒரு படைப்பாளி எவ்வளவு பாடுபட்டு ஆக்கங்களை ஆக்கி அளிக்கிறான் என்று எனக்குத் தெரியும். குறை சொல்லி மனதைக் காயப்படுத்தலாகாது. ஓவ்வொருவரும் ஒவ்வொரு கோணத்தில் எழுதுவார்கள். அதைக் குறை சொல்ல நமக்கென்ன தகுதி இருக்கிறது? நமக்கு மட்டும் எல்லாம் தெரிந்த மேதையென்ற நினைப்பா!

உங்கள் இலக்கிய நண்பர்கள் பற்றி குறிப்பிடுங்கள்?

'நீங்களும் எழுதலாம்' கவிதை இதழாசிரியரோடு பதினைந்து வருடங்களுக்கும் மேலாக நல்லுறவுண்டு. அவர் இதழை ஆரம்பித்ததிலிருந்கே ஷதெருக் குரல்| என்னும் தலைப்பில் என் ஈற்றிசை வெண்பாவை தவறாமல் வெளியீடு செய்து வருகிறார். அதுவே காலப்போக்கில் கருத்துக் கலசம் நூலாகியது. அவர்தான் என்னை முதல் முதலாக மேடையேற்றி கௌரவிப்புச் செய்திருக்கிறார். அடிக்கடி சந்தித்து கலந்துரையாடுவார். 

அடுத்ததாக கவிஞர் செ. ஞானராசாவைக் குறிப்பிட வேண்டும். அவர் அடிக்கடி என்னைத் தேடி வந்து இலக்கியம் பற்றியும் உலக நடப்புகள் பற்றியும் கலந்துரையாடிச் செல்வார். நல்லாலோசனைகளும் சொல்வார். அவரோடு சேர்ந்து நல்ல ஆராய்ச்சி நூல்கள் எழுதிய திரு. சரவணபவன் அவர்களும் வந்து கலந்துரையாடுவார். இந்த இருவரும் சேர்ந்து இங்கே அன்புவளிபுரம் வாசிகசாலையால் எனக்கு கௌரவிப்புச் செய்திருக்கிறார்கள். 

அத்துடன் ஞானம் ஆசிரியர் தி. ஞானசேகரன் அவர்கள் தனது மாத வெளியீடான ஞானம் இதழில் எனது அதிகமான சிறுகதைகளைப் பிரசுரமாக்கியிருக்கிறார். அட்டைப் பட அதிதியாக்கி என்னை கௌரவித்திருக்கிறார். தொலைபேசியின் ஊடாக நல்லாலோசனைகளைச் சொல்வார். 

அடுத்ததாக 'பூங்காவனம்' சஞ்சிகை ஆசிரியர் ரிம்ஸா முஹம்மத் அவர்கள் ஒவ்வொரு இதழிலும் எனது கதைகளைப் பிரசுரித்து, எனக்கு ஊக்கம் கொடுத்து வருகிறார். இப்போது இந்த நேர்காணலைச் செய்து என்னை வெளியுலகுக்கு அறிமுகமாக்கியிருக்கிறார். எப்படி நன்றி சொல்வதென்றே தெரியவில்லை.

தற்காலத்தில் வெளிவரும் படைப்புகளின் தரம் பற்றி என்ன சொல்வீர்கள்?

தற்கால வாழ்க்கையே நவீன சாதனங்களால் மற்றும் கருவிகளால்த்தான் இயங்கி வருகின்றது. இளம் மட்டங்கள் உல்லாச சல்லாபங்களைத் தேடி வாழ்கின்றார்கள். தற்கால படைப்பாளிகளும் அவற்றுக்கு முன்னுரிமை கொடுத்தே எழுதுகிறார்கள். காலத்துக்கேற்ற மாதிரியாகப் படைக்க வேண்டும்தான். ஆனால் நீதி, நியாயம், தர்மம் என்றும் வாழ வேண்டியது கட்டாயமான ஒரு விடயமாக இருக்கிறது. அதன் வழியில் நின்று பிசகாமல் எழுதவும் வேண்டும். நம் பழந் தமிழ் இலக்கியங்களின் வழிகாட்டலை மறக்காமல் இருக்க வேண்டும்.

கலை இலக்கியத் துறையில் இதுவரை உங்கள் படைப்புகளுக்குக் கிடைத்த பாராட்டுகள், பரிசுகள், விருதுகள் பற்றிக் குறிப்பிடுவீர்களா?

எனக்கு வித்தகர் விருது, முதல்வர் விருது, கலாபூஷணம் விருது போன்றவை கிடைத்துள்ளன. இவைதவிர கௌரவிப்பு நிகழ்வுகள் நடந்துள்ளன. விருதுகளைத் தேடி நான் ஒருபோதும் அலைவதில்லை. இலக்கிய உலகம் என்னை எங்கே வைக்குமோ அங்கே வைக்கட்டும்.

உங்களது அடுத்த நூல் வெளியீட்டை விரைவில் எதிர்பார்க்க முடியுமா?

நான் வயதான காலத்தில் தனித்திருந்து எழுதி வருகிறேன். எழுதியவற்றில் கால் பகுதி கூட ஊடகங்களில் பிரசுரமாகவில்லை. ஒரு கதையை பிரசுரமாக்கவே படாதபாடு படவேண்டியிருக்கிறது. இந்த இலட்சணத்தில் அடுத்த நூல் வெளியீட்டை இப்போது நினைத்துப் பார்க்கவியலாமல் இருக்கிறது. எதிர்காலத்தில் பார்க்கலாம்.

இன்றைய இனந்தலைமுறைப் படைப்பாளிகளுக்கு கூற விரும்புவது?

அவர்கள் நவீன காலத்துக்குரிய முறையில் எழுதி வருகிறார்கள். ஆனால் பழந்தமிழ்   எழுத்தாளர்களை; வழிகாட்டியாய் கொள்ள மறவாதீர்கள். நீதியின் பக்கம் தர்மத்தின் பக்கம் சார்ந்து நிற்கட்டும் அவர்களது படைப்பு. ஒரு கதையோ, கவிதையோ எழுதி அனுப்பி அது பிரசுரமான பின்னரே அடுத்ததை எழுதுவதாக இருந்தால் உங்கள் ஆற்றல் வளராது. அதற்கு நா'ளாந்தம் பயிற்சி வேண்டும். அப்போது தான் ஆற்றல் வளரும். இது சம்பந்தமாக 'கருத்துக் கலசத்தில்' இருக்கும் ஒரு கவிதையைத் தருகிறேன். 

'முயற்சி பயிற்சி அயர்ச்சியின்றி இருந்தால்

உயர்ச்சி உச்சத்தில் இருக்கும்'.

இறுதியாக என்ன சொல்ல விரும்புகிறீர்கள்?

வெறும் புகழுக்காக அதையும் இதையும் எழுதக் கூடாது. மக்கள் வாழ்வு மேம்பட தர்மம் நீதியின் அடிப்படையில் நின்று எழுத வேண்டும். எழுத்தாளர்கள் உட்பட சாதாரண மக்கள் வரை ஷமனம் போல வாழ்வு| என்ற பழமொழியைப் பின்பற்றினாலே போதும், சுபீட்சம் பெறலாம்.

நேர்கண்டவர்:- வெலிகம ரிம்ஸா முஹம்மத்

40. பா.மோகனதாஸ் அவர்களுடனான நேர்காணல்

எழுத்தாளரும் ஊடகவியலாளருமான பா.மோகனதாஸ் அவர்களுடனான நேர்காணல்

நேர்கண்டவர்:- வெலிகம ரிம்ஸா முஹம்மத்

கலைகளும் கலைஞர்களும் போற்றப்பட வேண்டும். படைப்பாளர்கள் வெளியிடும் நூல்கள் மற்றும் படைப்புகள் சமூகத்திற்குத் தேவையானதாக இருக்க வேண்டும்.                                                  

கலை இலக்கியத்தின் பல துறைகளிலும் உங்களுக்கு ஒரு அனுபவம் இருக்கின்றது. பல துறைகளிலும் நீங்கள் தடம் பதித்திருக்கின்றீர்கள். உங்களது ஆரம்ப காலம் எழுத்துத் துறையாகத்தான் இருந்திருக்கின்றது. அந்தவகையில் எழுத்துத் துறைக்குள் எப்படியாக வந்தீர்கள்?

நான் கிழக்கிலங்கையின் மீன் பாடும் தேனாடு, கலைகளின் களஞ்சியம் எனப் போற்றப்படும் மட்டக்களப்பு மாநகரின் தென் எல்லைக் கிராமமான துறைநீலாவணையை பிறப்பிடமாகக் கொண்டவன். தரம் ஒன்று தொடக்கம் உயர் தர கலைப் பிரிவு வரை துறைநீலாவணை மகாவித்தியாலயத்தில் கல்வி பயின்று உயர் தரத்தில் தேறி, கிழக்குப் பல்கலைக்கழக சுவாமி விபுலானந்தா அழகியற் கற்கைகள் நிறுவகத்திற்கு தெரிவாகியிருந்தேன்.

அழகியற் கற்கைகள் நிறுவகத்தில் நான்கு வருட நுண்கலைமாணி, நாடகமும் அரங்கக் கலையினையும் கற்று நுண்கலைமாணி சிறப்பு பட்டத்தினைப் பூர்த்தி செய்து, தற்போது சம்மாந்துறை முஸ்லிம் மத்திய மகாவித்தியாலயத்தில் (தேசிய பாடசாலை) அரங்கற்கலை பாடத்திற்காக நியமனம் பெற்று ஆசிரியராக கடமையாற்றி வருகின்றேன்.

பாடசாலையில் படிக்கும் காலங்களில் தமிழ் மீது கொண்ட அதீத ஆர்வத்தினால் நிறைய புத்தகங்களை வாசித்து அலசி ஆராய்வதை நான் எனது பழக்கமாகக் கொண்டிருந்தேன். அதுவே என் எழுத்துத் துறைக்கு வித்திட்டது.

படிக்கும் காலங்களிலேயே சமூக சிந்தனை சார் செயற்பாடுகளில் இயல்பூக்கம் ஏற்பட்டது. சமூகம் சார்ந்த சிந்தனை என் குருதியோடு இரண்டறக் கலந்ததாக எண்ணத் தோன்றுகின்றது. எழுத்துத் துறை மிகவும் பிடித்த துறையாகவும் சுதந்திரமானதும் உண்மையானதும் பொதுமக்களுக்காக இயங்கும் துறையாகவும் சமூகத்துடன் சமூகம் சார்ந்து செயற்படக்கூடிய துறையாகவும் இருந்து கொண்டிருக்கின்றது.

உங்களுடைய குடும்பப் பின்னணியில், எழுத்துத் துறை சார்ந்து வேறு யாரும் இருக்கின்றார்களா?

இல்லை. எனது தந்தை ஏழு ஆண்டுகள் வரையுமே கல்வி கற்றவர். எனது தாய் சாதாரண தரம் வரை கல்வி கற்றவர். எனது அம்மப்பா தங்கராசா என்பவர் விச வைத்தியத் துறையில் சிறந்து விளங்கியவர். தான் எழுத்துத் துறையில் இயங்குவதற்கு ஏதுவாக இருந்தவை சமூகம் சார் எண்ணப்பாடும், வீட்டில் கிடைத்த பூரண சுதந்திரமும் இயல்பூக்கமுமேயாகும்.

வீட்டில் மூத்த ஆண் பிள்ளையாக தாலாட்டி சீராட்டி பெற்றோருக்கும் உறவினர்களுக்கும் செல்லப் பிள்ளையாகவே வளர்க்கப்பட்டேன். காலையில் வீட்டை விட்டுப் புறப்பட்டால் வீடு வந்து சேர இரவுப் பொழுதாகும். கலையிலக்கிய நிகழ்வுகள், இலக்கிய சந்திப்புகள், பாரம்பரிய ஆற்றுகைகளை கண்டுகளித்தல், இளைஞர் கழக பயிற்சிப் பட்டறைகள், கலை நிகழ்வுகள், ஊடகப் பயணங்கள் இவ்வாறு பல மணித்தியாலங்கள் வெளியிலேயே கடந்து செல்லும். சில வேளைகளில் இவற்றுக்காக வெளியில் தங்கி நிற்க வேண்டிய தேவையும் ஏற்படும்.

எனது வாழ்நாளில் முழுமையான நேரத்தை வாசிப்பதற்காகவும் எழுதுவதற்காகவும் ஊடகத்துக்காகவும் மற்றும் கலையிலக்கிய பயணங்களுக்காகவுமே செலவிட்டுள்ளேன். வீட்டில் இருக்கும் நேரத்தைவிட களத்தில், எழுத்தில் இருக்கும் நேரமே என்னை தொடர்ச்சியாக எழுதத் தூண்டியது.

எழுத்துத் துறை என்று பார்க்கின்ற போது எப்படியான, என்ன வகையான இலக்கியத் துறையில் அதிக நாட்டம் செலுத்தினீர்கள்?

கட்டுரைகள், திறனாய்வுகள், நேர்காணல்கள், மேடை நாடகங்கள், கவிதைகள், சிறுகதைகள் போன்றவற்றை எழுதியுள்ளேன்.

சமூகம், சமூக இலக்கியம், பாரம்பரியக் கலையிலக்கிய கலையாற்றுகைகள், ஆளுமையாளர்கள் சார்ந்த விடயங்களையே பெரும்பாலும் எழுதியுள்ளேன். விளிம்பு நிலை பாரம்பரியக் கலையிலக்கியங்கள் சமூக மட்டத்தில் எவ்வாறு உள்ளது, அதன் இருப்புகள், முக்கியத்துவம், அதனை மேம்படுத்தல், எவ்வாறு தக்க வைத்துக்கொள்வது, விளிம்பு நிலை கலைஞர்களின் தேவைப்பாடுகள் அவர்களது சவால்கள் ஆகிய விடயங்களையே எனது கட்டுரைகள் பேசுவதாகவுள்ளது.

திறனாய்வு, நேர்காணல், கட்டுரை என எழுத்திலக்கியத் துறை சார்ந்து எழுதும் நீங்கள் முதன் முதலாக எத்துறையினை தேர்ந்தெடுத்தீர்கள்?

பாரம்பரிய கலையின் இன்றைய நிலை, பாரம்பரியக் கட்டியக்காரன், இலக்கிய அரங்கப் பாரம்பரியம் ஆகிய மூன்று கட்டுரைகளை முறையே தினக்குரல், சுடர்ஒளி மற்றும் தினகரன் ஆகிய மூன்று செய்தித்தாள்களுக்கும் பா. தாஸன் (சஞ்சயன்) எனும் பெயரில் தபால் மூலம் அனுப்பி வைத்தேன். அனுப்பி ஒரு வாரங்களின் பின்னர் மூன்று பத்திரிகைகளிலும் பிரசுரமாகியது.

செய்தித் தாள்களில் பிரசுரமான கட்டுரைகளைப் பார்க்கும் போது எல்லையில்லா மகிழ்ச்சியடைந்தேன். எனது கட்டுரைக்கு கொடுக்கப்பட்ட முதல் வரவேற்பும் ஆதரவுமாக அப்பிரசுரங்கள் அமைந்திருந்தது. தினக்குரலில் பணி புரியும் பாரதி இராஜநாயகம், ந. லெப்ரின்ராஜ் மற்றும் சுடர்ஒளி, தினகரன் பத்திரிகை குழுமத்தினர் என்றும் மறக்க முடியாதவர்கள். என்னை முதன் முதலாக ஊக்கப்படுத்தியவர்கள் பத்திரிகை ஆசிரியர்களே, அவர்கள் இப்பொழுதும் என்னை ஊக்கப்படுத்திக்கொண்டிருக்கின்றார்கள்.

பிரசுரமான கட்டுரைகளை எனது பெற்றோரிடமும் உறவினர்களிடமும் நண்பர்களிடமும் காட்டி மகிழ்ந்தேன். அக்கட்டுரைகள் எனக்கு ஆத்ம திருப்தியை தந்தது. அதன் பின்னரே செய்தித் தாள்களுக்கு மேன்மேலும் கட்டுரைகள் எழுத வேண்டும், எனது கட்டுரைகள் தொடர்ச்சியாக பத்திரிகைகளில் பிரசுரமாக வேண்டும் என்ற சிந்தனை மேலேழுந்தது. நிறைய கட்டுரைகள் எழுதுவதற்கு என்னை ஊக்கப்படுத்தியவை பத்திரிகைகள்தான். ஒவ்வொரு கட்டுரைப் படைப்பும் எனக்கு ஒரு பிரசவமாகவே இருந்தது. பிரசுரமான கட்டுரைகளின் ஒவ்வொரு விடயங்களையும் பார்க்கும்போது பிஞ்சுக் குழந்தைகளைப் பார்ப்பது போன்று இருக்கும். இன்றுவரை கட்டுரைகளை ஆத்ம திருப்திக்காகவும் சமூகத்துக்காகவுமே எழுதி வருகின்றேன்.

ஊடகத்துறைக்குள் எப்பொழுது வந்தீர்கள், ஊடகத்துறையில் இருந்து எவ்வாறான செயற்பாடுகளை முன்னெடுத்து வருகின்றீர்கள்?

சமூகம் சார்ந்த சிந்தனை செயற்பாடே ஊடகத் துறைக்குள் என்னை தற்செயலாக இழுத்துவிட்டது. சமூகத்தில் பொது மக்கள் எதிர்நோக்கும் அடிப்படைப் பிரச்சினைகள், தேவைகள், உரிமைகள் மறுக்கப்படும் போது பொதுமக்களின் சவால்களை   வெளிக்கொணர்வதற்கு ஊடகமே மிகச்சரியான ஆயுதமாக எனக்குப்பட்டது. 

சமூகத்தின் உண்மையான பிரதிநிதிகளாக கலைஞர்களும் படைப்பாளர்களும் ஊடகவியலாளர்களுமே செயற்படுகின்றனர். சமூகத்தின் பிரதிநிதிகள், சமூகத்தின் பிரச்சினைகளை, சமூகம் எதிர்கொள்ளும் சவால்களை, அவர்களது உரிமைகளை, எழுத்தின் ஊடாக தட்டிக் கேட்பவர்களாக, பெற்றுக் கொடுப்பவர்களாக இருக்க வேண்டும்.

கடந்த ஏழு வருட காலத்துக்கும் மேலாக பத்திரிகைகளுக்கு கலையிலக்கிய, சமூக வரலாறு சார்ந்த கட்டுரைகளை எழுதிக்கொண்டிருக்கும் போது எழுத்தாற்றலினால் ஊடகத் துறைக்குள் நேர்மையான பாதையில் நுழைய முடிந்தது. எப்பொழுதும் நேர்மையாக பயணிப்பது சந்தோசமாகவே இருக்கும். அப்போது தான் மக்களின் பிரச்சினைகளை தைரியமாக எவருக்கும் பீதியடையாமல் வெளிப்படுத்த முடியும். மற்றவர்களின் தயவுடன் பயணிப்போமாக இருந்தால் சுதந்திரமாகவோ நேர்மையாகவோ செயற்பட முடியாது. மக்களுடன் வாழ்ந்து, மக்களது பிரச்சினைகளை வெளிப்படுத்துவதென்பது ஒருவித அனுபவம். ஊடகம் என்பது ஒரு தொழில் அல்ல. எம்மை நம்பியிருக்கும் மக்களுக்கு இருபத்திநான்கு மணி நேரமும் களத்தினின்று, ஒரு தியாக உணர்வோடு, சேவை செய்ய வேண்டிய சமூக சேவையாகும்.

உங்களுடைய பெரும்பாலான எழுத்துக்களை பத்திரிகைகளின் வாயிலாகத்தான் பார்க்கக்கூடியதாக இருக்கின்றது. அதையும் தாண்டி அண்மையில் வெளியிட்ட "படைப்பாக்க ஆளுமைகள்" நூல் பற்றி விசேடமாக என்ன குறிப்பிடுவீர்கள்?

எனது எழுத்துக்கள் கடந்த ஏழு வருட காலங்களுக்கும் மேலாக செய்தித் தாள்களில் பிரசுரமாகிக் கொண்டிருக்கின்றன. வாசகர்கள் செய்தித் தாள்களில் எனது படைப்புகளைப் பார்த்து, படைப்புகளுக்கான வரவேற்பையும் ஊக்கப்படுத்தலையும் தந்து கொண்டிருக்கின்றார்கள். எனது கட்டுரை, திறனாய்வு படைப்பு ஆகியவற்றினை தேவையேற்படின் என்னிடமிருந்தோ, என் உறவினர்களிடமிருந்தோ செய்தித் தாள்களில் பிரசுரமானவற்றைப் பெற்றுக்கொண்டு நூலுருவாக்க முடியும். சமூகத்திற்கு தேவையான நிறைய கட்டுரைகள் எழுத வேண்டுமே தவிர நூலுருவாக்க வேண்டும் என்ற எண்ணம் அப்போதுகளில் என்னிடம் பெரிதாக இருக்கவில்லை. இதற்கு விசேடமான காரணம் படைப்புகளை நூலுருவாக்கம் செய்ய பாரிய நிதி வசதி தேவை என்பதேயாகும்.                                                                                 

இருந்தாலும் நான் நேர்காணல் செய்து, செய்தித் தாள்களில் பிரசுரமான ஆளுமையாளர்களின் நேர்காணல்களில் சிலவற்றைத் தொகுத்து, ஷஷபடைப்பாக்க ஆளுமைகள்' எனும் நூலினை பிரசுரம் செய்து அண்மையில் வெளியிட்டுள்ளேன். இந்த நூல் வெளியீட்டுக்குத் தலைமை தாங்கியவர் நீங்களும் எழுதலாம் சஞ்சிகை ஆசிரியர் எஸ்.ஆர். தனபாலசிங்கம் அவர்களாவார். 

நூலைப் பொருத்தவரை இந்த நூலுக்கான ஆசியுரையை மட்டு. அம்பாறை மறை மாவட்ட ஆயர், பேரருட் தந்தை ஜோசப் பொன்னையா ஆண்டகை அவர்கள் வழங்கியுள்ளார். அவசியமானதொரு புதுவரவு என்ற தலைப்பில் கிழக்குப் பல்கலைக்கழக கேராசிரியர் செ. யோகராசா அவர்கள் சிறப்பானதொரு குறிப்பை வழங்கியிருக்கிறார். அத்துடன் என்னைப் பறிறிய குறிப்புக்களை சபா. மதன் அவர்களும் நூலுக்கான வாழ்த்துரையை கவிஞர், எழுத்தாளர், பாடலாசிரியர், மற்றும் பதிப்பாசிரியர் என்ற பல்வகை ஆற்றல்களை தன்னகத்தே கொண்ட தமிழ்நாட்டைச் சேர்ந்த அண்ணா வித்யாசாகர் அவர்கள் வழங்கி நூலுக்கு சிறப்புச் செய்துள்ளார்கள். 73 ஆளுமைகளுடன் நான் செய்த நேர்காணல்களைத் தொகுத்து, 426 பக்கங்களை உள்ளடக்கியதாக மட்டக்களப்பு, புதுக்குடியிருப்பு காந்தன் அச்சகம் இந்தப் புத்தகத்தை அச்சிட்டுத் தந்தது குறிப்பிடத்தக்கது. 

ஆய்வுத்துறை சார்ந்த தங்களின் ஈடுபாட்டைக் கூற முடியுமா?

யாழ்ப்பாண திருநெல்வேலியைச் சேர்ந்த முதுபெரும் நாடகாசிரியர் குழந்தை ம. சண்முகலிங்கத்தின் அன்னையிட்ட தீ மற்றும் எந்தையும் தாயும் ஆகிய இரு நாடகங்களை அடிப்படையாக வைத்து ஷஷபோர்க்கால உளவியல் நாடகங்கள்' எனும் பல்கலைக்கழக ஆய்வை முன்னெடுத்திருந்தேன். போர்க்காலத்திற்குள் யுத்தத்தினால் தமிழ் பேசும் மக்கள் எதிர்நோக்கிய துன்ப துயர சவால்கள், போர்ச் சூழலுக்குள் எவ்வாறு வாழ்ந்தார்கள், அவர்கள் ஒவ்வொருவரினதும் உள்ளக் குமுறல்களை நாடகாசிரியர் எவ்விதம் வெளிப்படுத்தியுள்ளார் என்பதை எனது ஆய்வு ஆராய்வதாக உள்ளது.

சுவாமி விபுலானந்தா அழகியற் கற்கைகள் நிறுவகத்தில் நாடகத்துறை சார்ந்து படிக்கும் காலங்களில் கூத்துக் கலைஞர் வேலாட்சி வல்லிபுரத்தின் கலையிலக்கிய ஆளுமையினை களத்திற்கு சென்று நேர்காணல் செய்து ஒரு தொகுப்பாக சமர்ப்பித்திருந்தேன். எனது ஒவ்வொரு கலை இலக்கிய கட்டுரைகளும் ஆய்வாகவே இருக்கும்.

எழுத்துத் துறையில் இருந்த உங்களுக்கு எப்படி மேடை நாடகக் கலைஞராக, மேடை நாடகத்தில் நடிக்கும் ஆர்வம் ஏற்பட்டது?

உயர் தரம் படிக்கும் காலங்களில், நாடகமும் அரங்கியலும் கற்கும் மாணவர்களையே கலையிலக்கிய நிகழ்வுகளில் மேடையேற்ற வைத்துவிடுவார்கள். ஏனையவர்கள் அதுபற்றித் தெரியாது நடிக்க வராது என்று தப்பித்துக் கொள்வார்கள். பாடசாலைக் காலங்களில் பதினைந்துக்கும் மேற்பட்ட நாடகங்களில் நடித்துள்ளேன். நிறைய விடயங்களை மனப்பாடம் செய்யும் முறைமையினை அரங்கியற் பாடமே கற்றுத் தந்தது.

உயர் தர கலைத் துறையில் நாடகமும் அரங்கியலும் பாடத்தில் ஏ தர சித்தியுடன் மூன்று பாடங்களிலும் சித்தியடைந்து தென்கிழக்கு பல்கலைக்கழகம் மற்றும் கிழக்குப் பல்கலைக்கழக சுவாமி விபுலானந்தா அழகியற் கற்கைகள் நிறுவகம் ஆகிய இரு பல்கலைக்கும் தெரிவாகியிருந்தேன். நாடகத் துறையின் மீது கொண்ட நாட்டத்தினால் தென்கிழக்கு பல்கலை செல்லாமல் அழகியற் கற்கைகள் நிறுவகத்தில் நான்கு வருட கற்கை நெறியை மேற்கொள்ளும் காலங்களில் நாடகச் செயற்பாட்டில் தானும் ஒருவனுமாக செயற்பாடு நாடகக் கொள்கைகள் சார்ந்து நிறைய விடயங்களை அறிந்து கொண்டேன். பல்கலை பரீட்சைக்காக தனியனாக நாடகங்களை எழுதி தயாரித்து நடித்து மேடையேற்றியுள்ளேன். அங்கு படித்த ஒவ்வொரு மாணவர்களும் இச்செயற்பாட்டில் ஈடுபட்டனர். ஒவ்வொரு மேடையேற்ற நாடகங்களும் ஒவ்வொரு அனுபவத்தையும் படிப்பினையையும் கற்றுத் தந்தது.

வளர்ந்து வருகின்ற எழுத்தாளர்களைப் பொறுத்தவரை ஒவ்வொருவரும் ஒவ்வொரு ஆளுமையாளர்களை முன்மாதிரியாகக் கொள்வார்கள். அவர்களுடைய சாயல், பாணி அவர்களது எழுத்துக்களில் இருக்கும். உங்களது எழுத்துக்களுக்கு ஏதாவது தனி அடையாயங்கள் இருக்கின்றனவா இல்லாவிட்டால் வேறு யாரும் எழுத்தாளர்களினுடைய சாயலை பின்பற்றுகின்றீர்களா?

தனியடையாளங்கள் இருக்கின்றது என்றுதான் சொல்ல வேண்டும். சமூகத்தில் கவனிக்கப்பட வேண்டிய ஆனால் பிறரால் கவனிக்கப்படாத விடயங்களையே எனது எழுத்துக்கள் வெளிப்படுத்துகின்றன. விளிம்பு நிலை கலை வடிவங்களின் தேவை, முக்கியத்துவ இருப்பு, சமூகப் பண்பாடு, பன்மைத்துவம் போன்ற விடயங்களை எனது கட்டுரைகளுக்கூடாக ஆராய்ந்துள்ளேன்.

சாதாரண சமூகங்கள் வாழ்கின்ற இடங்களுக்குச் சென்று அவர்களுடன் கலந்துரையாடி கலையிலக்கிய பண்பாட்டு மரபுகளை, சவால்களை, ஆதங்கங்களை கேட்டறிந்து அவர்களுக்கூடாகவே அல்லது அவர்களது விடயங்களுக்கூடாகவே ஒவ்வொரு ஆய்வு கட்டுரைகளும் என்னால் வெளிக்கொண்டு வரப்படுகின்றது.

பத்திரிகைகள் ஊடாகத்தான் உங்களது அதிகமான படைப்புகளை வெளியிட்டு வருகின்றீர்கள். உங்களது படைப்புகள் உங்களது பெயரிலா இல்லை புனைப்பெயரிலா வெளிவருகின்றது?

ஆரம்பகால கட்டுரைகள் பா. தாஸன் (சஞ்சயன்) எனும் பெயரில் பிரசுரமாகியிருந்தது. அதன் பிற்பாடு துறையூர் தாஸன், பாக்கியராஜா தாஸன் எனும் பெயரிலும் பிரசுரமாகியது. எழுதத் தொடங்கி மூன்று மாத காலம் கடந்ததும் அனைத்துக் கட்டுரைகளும் பாக்கியராஜா மோகனதாஸ் எனும் எனது முழுப்பெயரிலேயே வந்தது. இப்பொழுதும் அவ்வாறே வந்துகொண்டிருக்கின்றது.

வருங்கால இளந்தலைமுறையினருக்கு கூற விரும்புவது?

தமிழ்மொழியினை நேசியுங்கள், பரந்தளவில் ஆழமாக தேடியறிந்து கற்றுக் கொள்ளுங்கள். சாதிப்பவர்களாக தடம் பதிப்பவர்களாக நாளை வரலாற்றில் பேசப்படுபவர்களாக உருவாக வேண்டும். ஒவ்வொரு விடயங்களையும் வெகு ஆழமாக கற்க வேண்டும். தமிழர்களாகிய நாங்கள் தாய்மொழியாகிய தமிழ் பாடங்களுள் கவிதை, கட்டுரை, திறனாய்வு, நாடகம், நாவல், அழகியல், இலக்கியம் எனும் பல்வேறு விடயங்களை கற்கிறோம். கற்கும் காலத்திலயே அதுபற்றி ஆழ அகலமாக தேடுவதனுடன், ஆக்க இலக்கியப் படைப்புகளை பாடசாலைக் காலத்திலிருந்து படைக்க வேண்டும். 

அழகியற் பாடங்களை கற்கச் செய்வதற்கு, ஆக்க இலக்கிய படைப்புகளை உருவாக்குவதற்கு பாடசாலையில் ஆசிரியர்களும் வீட்டில் பெற்றோர்களும் துறைசார் பயிற்சியினை கற்பதற்கான பாதையினை மாணவர்களுக்கு அமைத்துக் கொடுக்க வேண்டும். ஒரு மாணவரை மருத்துவராகவும் படைப்பாளராகவும் உருவாக்கும் பொறுப்பு ஆசிரியர்களிடமும் பெற்றோர்களிடமுமே காணப்படுகின்றது.

கலைகளும் கலைஞர்களும் போற்றப்பட வேண்டும். படைப்பாளர்கள் வெளியிடும் நூல்கள் மற்றும் படைப்புகள் சமூகத்திற்குத் தேவையானதாக இருக்க வேண்டும். கலைஞர்கள் படைப்பாளர்கள் சமூகத்தின் பிரதிநிதிகளாக செயற்பட்டு பக்கச் சார்பற்றவர்களாக தமது படைப்புகளை படைக்க வேண்டும்.

தங்களுக்கு கிடைத்த விருதுகள் தொடர்பாக கூற விழைவது?

லக்ஸ்டோ, ஆர்.கே. ஊடக வலையமைப்பு மற்றும் இலங்கை தமிழ் எழுத்தாளர் சங்கம் இணைந்து நடாத்திய பல்துறை சார்ந்தோருக்கான திறமைக்கான தேடல் விருது விழாவில் 'கலைச்சுடர் விருது' (2019) வழங்கி கௌரவிக்கப்பட்டேன்.

கிழக்கு மாகாண பண்பாட்டலுவல்கள் திணைக்களத்தினால் நடாத்தப்பட்ட, கிழக்கு மாகாண தமிழ் இலக்கிய விழாவில் பல்துறைக்கான 'இளங்கலைஞர் விருது' (2018) கிடைக்கப் பெற்றது.

மலையக கலை கலாசார சங்கத்தினால் 'தேசபிமானி விஸ்வகீர்த்தி' (2019) எனும் தேசிய மட்ட கௌரவத்தினையும் பெற்றுக்கொண்டுள்ளேன்.

நேர்கண்டவர்:- வெலிகம ரிம்ஸா முஹம்மத்