34. கவிஞர் ஆ.லெ.மு. இர்ஷாத் உடனான நேர்காணல்

 கவிஞர் ஆ.லெ.மு. இர்ஷாத் உடனான நேர்காணல்

நேர்கண்டவர்:- வெலிகம ரிம்ஸா முஹம்மத்

உங்களைப் பற்றிய அறிமுகம் பாடசாலை மற்றும் பல்கலைக்கழக வாழ்க்கை பற்றிக் குறிப்பிடுங்கள்?

எனது பெயர் இர்ஷாத். நான் வாழைச்சேனையில் வசித்து வருகிறேன். பாடசாலைக் கல்வியை தரம் 01 – 13 வரை மட்/மம/ வாழைச்சேனை அந்நூர் தேசிய பாடசாலையில் கற்று கிழக்குப் பல்கலைக்கழகத்திற்குத் தெரிவு செய்யப்பட்டு அங்கு நான்கு ஆண்டுகளில் பட்டப்படிப்பை நிறைவு செய்தேன்.

உங்களுக்குள் ஓர் இலக்கியவாதி தோன்றுவதற்கான குடும்பப் பின்னணி பற்றிக் குறிப்பிடுங்கள்?

குடும்பப் பின்னணி எனும் போது நான் இலக்கியவாதியாக மலர்வதற்கு என் தாய்தான் அடிப்படையாக இருந்திருக்கிறார். அவர் இரண்டாம் தரம் வரை கற்றவர். என் தாய் படிப்பில் முதன்நிலை மாணவியாக இருந்தும் அவரின் பெற்றோர் தங்களது வியாபார நிலையத்தை பராமரிப்பதற்காக வேண்டி தாயாருடைய கல்வியை இடையில் நிறுத்திவிட்டனர். அவர் கடையில் இருந்த நேரங்களில் மித்திரன் பத்திரிகைகளில் வெளிவந்த கதைகள், கட்டுரைகள், கவிதைகளை வாசித்திருக்கிறார். அவர் வாசித்த அக்கருத்துக்கள் மரபணு ரீதியாக என்னை இலக்கியவாதியாக அடையாளம் காட்டியிருப்பதாகவே நான் உணர்கிறேன். எனது சிறுபருவத்தில் தினமுரசு, நவமணி போன்ற பத்திரிகைகளும் வீட்டில் வாங்கப்படும். அவற்றில் வருகின்ற பாப்பா முரசு, முளைவிடும் அரும்பு போன்ற பகுதிகளை வாசித்ததும் நான் இலக்கியவாதியாக பிரசவிப்பதற்கு ஒரு தூண்டியாக அமைந்திருக்கிறது.

உங்களது முதலாவது ஆக்கத்தை பத்திரிகையில் பார்த்தவுடன், உங்களது மனநிலை எப்படி இருந்தது?

மட்டில்லா மகிழ்ச்சியாக இருந்தது. பத்திரிகைக்கு அனுப்பிய ஆக்கங்கள் பத்திரிகையில் பிரசுரிக்கப்பட்டிருக்குமா? பிரசுரமாகி இருந்தால் அதனைப் பார்க்க வேண்டும் என்ற ஆவல் பத்திரிகைக் கடையை அடைந்து பத்திரிகையில் எனது கவிதைகளைக் கண் பார்க்கும் வரை இருக்கும். இப்போது இணையத்தின் மூலமாக பார்க்க முடிகிற படியினால் இந்த ஆர்வம் பெரிதாக இல்லை. 

உங்களது எழுத்துகளின் படிநிலை வளர்ச்சி பற்றிக் கூறுங்கள்?

2000 ஆம் ஆண்டில் நான் தரம் 07 இல் கல்வி கற்கும்போது என்னில் கவிதை வெளிப்பட்டது. அதனைத் தொடர்ந்து சில காலங்கள் உறங்கு நிலையில் இருந்தேன். பின் கவிதை எழுதுவதும் அவற்றைக் கிழித்து வீசிவிடுவதுமாக இருந்தேன். உயர் தரத்தில் கற்கும்போதே எழுதிய கவிதைகள் சிலவற்றை சேமிக்கத் தொடங்கினேன். பல்கலைக்கழகம் சென்ற பிற்பாடு கவிதை எழுதுவது தீவிரமானது. பல்கலைக்கழகத்தில் பேராசிரியர் செ. யோகராசா அவர்கள் என்னை எழுதும்படி தூண்டினார். பல்கலைக்கழகத்தில் இருந்து வெளியானதும் பத்திரிகைகளுக்கு கவிதைகளை அனுப்பத் தொடங்கினேன். பல்கலைக்கழகம் செல்வதற்கு முன்னர் 2008 ஆம் ஆண்டில் 'அவன் திருடனா?' என்ற தலைப்பில் சிறுகதையையும் எழுதி வைத்திருந்தேன். ஹைக்கூ வகைமைக் கவிதைகளோடு சிறுவர் கதைகளையும் எழுதி வருகிறேன். கவிதைக்காக காத்திருப்பதைவிட அவ்வப்போது உதிக்கின்ற வரிகளை எழுதிக்கொள்கிறேன். நாவல் எழுதுவதற்கான களம் இருக்கிறது. இறைவன் நாடினால் அதற்குரிய பக்குவம் வந்ததும் எதிர்காலத்தில் எழுதுவேன்.

வெளிவந்த உங்களது முதல் பிரசவம் 'ஒளி பூக்கும் இரவு' ஹைக்கூ கவிதை நூல் பற்றிக் கூறுங்கள்?

2017 – 2020 வரை என்னால் எழுதப்பட்ட ஹைக்கூ கவிதைகளில் இருந்து தேர்ந்தெடுக்கப்பட்ட ஹைக்கூகளைக் கொண்டு இந்நூலை வெளியிட்டேன். நிதி நிலையை ஒழுங்கு செய்யத் தாமதமானதால் நூல் பிரசுரமும் தாமதமானது. முதலில் வெளிவந்திருக்க வேண்டியது எனது புதுக்கவிதை நூலே. ஆனாலும் ஹைக்கூ அதனை முந்தி முதலில் வெளிவந்துவிட்டது. தமிழிலும் ஆங்கிலத்திலும் வெளிவந்த இந்த ஹைக்கூ நூலில் முனைவர் ம. ரமேஷ், முனைவர் வெ. புகழேந்தி, ராஜூ ஆரோக்கியசாமி, இளையபாரதி கந்தகப்பூக்கள் ஆகியோரின் அணிந்துரைகளும் கவிச்சக்கரவர்த்தி ஜின்னாஹ் சரிபுத்தீன், கவிச்சுடர் கா.ந. கல்யாணசுந்தரம் ஆகியோரின் வாழ்த்துரைகளும் இடம்பெற்றுள்ளன.

உங்களுடைய முதல் பிரசவம் 'ஒளி பூக்கும் இரவு' என்ற நூலின் தலைப்புக் குறித்துக் கூறுங்கள்?

எதேச்சையாக உள்ளத்தில் இருந்து உதித்த தலைப்புத்தான் இது. முன்னர் நான் இந்த நூலுக்கு வேறொரு தலைப்பையே தேர்ந்து வைத்திருந்தேன். இறைவன் இத்தலைப்பையே நாடிவிட்டான். முகநூலில் நூலின் தலைப்பைப் பதிவிட்டபோது கவிஞர்கள் தலைப்பைப் பாராட்டினர். விஜயகுமார் என்ற தமிழக கவிஞர் நூலின் தலைப்புக்காகவே விருது வழங்கலாம் என்று கூறினார். நூலின் தலைப்பு கவித்துவமானதென்று முனைவர் ம. ரமேஷ் அவர்கள் தனது அணிந்துரையில் சிறப்பாக விளக்கியுள்ளார். நூலின் வெளியீட்டு வைபவத்தின்போது அன்பர் ஒருவர் 'ஒளி பூக்கும் இரவு' என்பதை 'இரவு பூக்கும் ஒளி' என்று பின்னிருந்து வாசித்தார். எப்படிப் பார்த்தாலும் தலைப்பு கட்சிதமாக பொருந்திவிடுகிறது. 

நீங்கள் எழுதிய முதலாவது நூலை வெளியிடும்போது உங்களுக்கு ஏற்பட்ட மன உணர்வு எப்படி இருந்தது?

எப்படியாவது முதல் நூலை வெளியிட்டு இலக்கிய உலகில் தடம் பதிக்க வேண்டும் என்பது நீண்ட நாள் ஆசையாக மனதைக் குடைந்துகொண்டிருந்தது. நூலை வெளியிடுவதற்குத் தேவையான பணத்தைத் திரட்டுவதில் ஏற்பட்ட கால தாமதத்தின் காரணமாக நீண்டகாலக் காத்திருப்பின் பின்னரே எனது நூல் வெளியிடப்பட்டது. இலக்கிய வானில் சிறகடித்துப் பறக்க ஒரு நூல் பறவையையாவது வெளியிடவில்லையே என்ற ஏக்கம் இதன் மூலம் தீர்ந்தது. இந்த முயற்சிக்காக ஒத்துழைத்த யாவருக்கும் இவ்விடத்திலும் நன்றி கூறுகின்றேன்.

பொதுவாக ஹைக்கூவிற்கும் கவிதைக்கும் இடையில் எந்த மாதிரியான வித்தியாசம் உள்ளது?

மரபுக் கவிதை எழுத தேர்ந்த பயிற்சி அவசியம். எனினும் புதுக் கவிதை எழுதுவதற்கு பெரிதாக பயிற்சி அவசியமில்லை என்ற நிலையில் ஹைக்கூ எழுத பயிற்சி மிக மிக அவசியம்.

கவிதை மனித வாழ்வின் பல்வேறு கோணங்களையும், இயற்கை உட்பட யாவற்றையும் கூறும். ஹைக்கூ இயற்கையையும் மிகச் சிறிய உயிரினங்களையும் குறியீடு, படிமம் என்பவற்றின் உதவியோடு வெளிப்படுத்தும். 

கவிதை சுருக்கமாகவும் விரிவாகவும் அமையலாம். ஹைக்கூ மிகச் சுருக்கமாகவே அமையும்.

சின்னப் பொறிக்குள்

மின்னல் தெரிப்புகள்

ஹைக்கூ ஹைக்கூ

என்று வதிலை பிரபா ஹைக்கூவின் இலக்கணத்தை ஹைக்கூவாகவே கூறிவிடுகிறார். கடுகு சிறிதெனினும் காரம் பெரிதென்ற தமிழ்ப் பழமொழி ஹைக்கூவிற்கே மிகப்பொருந்துவதாக எழுத்தாளர் சுஜாதா கூறுவார்.

ஹைக்கூவிற்கும் கவிதைக்குமிடையிலான வேறுபாடுகளைப்பற்றி தமிழ்நாடன் பின்வருமாறு கூறுகிறார். 

கவிதை இல்லாததைக் கொண்டு வரும். ஹைக்கூ இருப்பதையே காட்டும். 

கவிதை சுவைநீர் என்றால் ஹைக்கூ தேன்.

கவிதை உற்பத்தி. ஹைக்கூ வெளிப்பாடு.

கவிதை புறமனம் தீட்டும் ஓவியம். ஹைக்கூ அடிமனத்தின் வெடிப்பு.

உங்களது நூல் வெளியீட்டுக்கு கைகொடுத்து உதவியவர்கள் பற்றிக் கூறுங்கள்?

எனது நூலை தானே வடிவமைக்க வேண்டும் என்று நண்பர் ஏ.ஆர். அப்ராஸ் என்னைச் சந்திக்கும் வேளைகளில் வேண்டிக்கொள்வார். நூலை சிறப்பாக வடிவமைத்து பிரசுரிப்பதற்கான ஏற்பாடுகளைச் செய்தவரும் அவரே. நாங்கள் நூல் வெளியீட்டு விழாவினைச் செய்வதற்கான ஏற்பாடுகளைச் செய்ய முனைந்தபோது இக்பால் சனசமூக நிலையத்தினர் தாமாகவே முன்வந்து அவர்களாகவே நூல் வெளியீட்டு விழாவினை ஏற்பாடு செய்து தந்தனர். கொரோனா சூழ்நிலை காரணமாக மட்டுப்படுத்தப்பட்ட அளவிலேயே விழா நிகழ்வு நடைபெற்றது. எதிர்கால நூல் வெளியீடுகளை வெகு சிறப்பாக வெளியிடுவதற்கு எதிர்பார்த்துள்ளோம்.

பல்வேறு வகையான இலக்கிய வடிவங்களில் ஹைக்கூ கவிதைகள் மேல் உங்களுக்கு நாட்டம் ஏற்பட விசேட காரணம் என்ன?

ஹைக்கூ சிறிய கவிதை வடிவம். குழந்தை சிறியதாக இருப்பதனால் அனைவருக்கும் அதனைப் பிடிப்பது போன்று ஹைக்கூ எனக்குப் பிடித்துப் போனது. ஹைக்கூ பற்றிய கவிக்கோ அப்துல் ரகுமான் அவர்களின் உரைகள், முகநூலில் இயங்கும் ஹைக்கூ குழுமங்களான ஹைக்கூ உலகம், ஹைக்கூ படர்பார்வை, நிலாவில் ஒரு ஹைக்கூ, போன்ற ஹைக்கூ குழுமங்களின் வழிகாட்டல்கள், அனைத்துக்கும் மேலாக க.பொ.த. சாதாரண தர மாணவர்களுக்கு தமிழ் இலக்கிய நயம் பாடத்தில் 'மின்மினிகளால் ஒரு தோரணம்' என்ற ஹைக்கூ தொடர்பாக எழுதப்பட்ட கட்டுரையை முன்வைத்து அதனை மாணவர்க்கு கற்பிப்பதற்காக மேற்கொண்ட தேடல்கள் என்பவற்றோடு ஹைக்கூவின் ஆழமான தன்மை, குறியீடு, படிமப்பாங்கு, இயற்கை ஒன்றிப்பு என்பவை என்னை ஹைக்கூ கவிஞனாக நிலை நிறுத்தின. 

சக இளம்படைப்பாளிகளுக்கு நீங்கள் கூறும் விசேட செய்தி என்ன?

படைப்பாளர்கள் தொடர்ந்து வாசித்துக்கொண்டும் எழுதிக்கொண்டும் இருக்க வேண்டும். எப்படியான சங்கடங்கள் வந்தபோதும் துணிவுடன் படைப்புகளை நூலாக வெளிக்கொணர முயல்தல் வேண்டும். இவ்விடத்தில் மௌலான ரூமியின் கவிதை நினைவில் வருகிறது. 'தாகம் கொண்டவர் மட்டும் தண்ணீரைத் தேடுவதில்லை. தண்ணீரும் தாகம் கொண்டவரைத் தேடிக்கொண்டிருக்கிறது.' தேடுங்கள், தேடல் உங்களை விடுதலையாக்கும். வெற்றிக்குத் தூரமில்லை. தோல்விக்கு நேரமில்லை.

நீங்கள் ஒரு தமிழ்ப் பாட ஆசிரியர் என்ற வகையில் வாசிப்புப் பழக்கத்தில் இருந்து தூர விலகும் இளைய தலைமுறையினரை வாசிப்பில் ஈடுபடுத்த என்ன ஆலோசனைகளை முன்வைப்பீர்கள்?

வாசிப்பானது போட்டி ரீதியாக ஊக்குவிக்கப்பட வேண்டியதொன்று. பெற்றோர், ஆசிரியர்கள் பாடப் புத்தகத்தோடு பயனுள்ள நூல்களையும் வாசிக்க குழந்தைகளை சிறுவயது முதலே ஆற்றுப்படுத்த வேண்டும். பரிசுப் பொருளாக புத்தகங்களை அன்பளிப்புச் செய்யலாம். வீட்டிலும் நூலகங்களை உருவாக்கலாம். வீட்டில் உள்ளவர்கள் எல்லோரும் சேர்ந்து நாளொன்றில் ஒரு மணிநேரம் வாசிக்கப் பழகி, பின் நேரத்தை அதிகரிக்கலாம். இன்று தொழில்நுட்ப வளர்ச்சிக்கு ஏற்ப இணைய நூல்களைப் படிக்கின்ற வாசகர்களை ஊக்குவிக்க, இணைய நூலகங்களும் பரவலாக்கப்பட வேண்டும். போட்டிகளை நடாத்துவது வாசிப்பை ஊக்குவிக்க உதவும்.

ஹைக்கூ தவிர வேறு எத்துறைகளில் ஈடுபாடு காட்டி வருகிறீர்கள்?

புதுக் கவிதை, கஸல் கவிதை, சிறுகதை, சிறுவர் கதை போன்ற துறைகளில் அதிகமாக ஈடுபாடு காட்டி வருகிறேன்.

உங்கள் சிறுகதைப் படைப்புகள் பற்றி கூற விளைவது?

இதுவரை சில சிறுகதைகளையே எழுதியுள்ளேன். ஓரிரண்டு கதைகள் பத்திரிகையிலும் சஞ்சிகையிலும் பிரசுரமாகி உள்ளன.  எழுதிய கவிதைகளை நூலுறுப்படுத்தும் ஏற்பாடுகள் முடிந்ததன் பின்னர் விரிந்த தளத்தில் சிறுகதைகளின் பக்கம் முழுக் கவனத்தைச் செலுத்த எண்ணியுள்ளேன்.

எவ்வகையான விடயங்களை ஆய்வாக ஆய்வுக் கட்டுரையாக எழுதியுள்ளீர்கள்?

உளவியல், சமூகவியல், சமயம்;, இலக்கியம், சூபித்துவம் போன்ற விடயங்கள் தொடர்பான ஆய்வுக் கட்டுரைகளை எழுதியுள்ளேன். அத்தோடு பேராய்வுகளாக 'பெரிய புராணத்தில் சைவ சித்தாந்த பதிக்கோட்பாடு ஓர் ஆய்வு' எனும் தலைப்பில் பல்கலைக்கழக பட்ட ஆய்வையும், 'சமூகவியல் நோக்கில் வை. அஹமதின் சிறுகதைகள் ஓர் ஆய்வு' எனும் தலைப்பில் கொழும்புத் தமிழ்ச் சங்க பட்டயக் கற்கையின் ஆய்வையும்; மேற்கொண்டிருக்கிறேன்.

எழுத்துத் துறையில் உங்களை வியப்பில் ஆழ்த்தியவர்கள் யார்? ஏன்?

கவிக்கோ அப்துல் ரகுமான், பெருமாள் முருகன், மு. மேத்தா, ஏ.பீ.எம். இத்ரீஸ், ராஜகவி ராஹில், நா. முத்துக்குமார், ஜெயகாந்தன், சுஜாதா போன்ற பலரையும் கூறலாம். அவர்கள் புதிது புதிதான கோணங்களில் சுவைபட படைப்புகளைப் படைத்திருப்பர். சிந்தனைகளை ஆழமாக்கி வைப்பனவாக இப்படைப்புகள் காணப்படும்.

நீங்கள் நேசித்து, வாசித்த படைப்பைப் பற்றியும் அதன் சுவாரஸ்யத் தன்மைகள் பற்றியும் குறிப்பிட முடியுமா?

கவிக்கோ அப்துல் ரகுமானின் 'மினிமினிகளால் ஒரு கடிதம்'. இந்நூல் முதன்முதலாக தமிழில் வெளிவந்த கஸல் கவிதைகளின் தொகுப்பு. கஸல் அரபியில் பிறந்து, பாரசீகத்தில் வளர்ந்து, உருதுவில் இருந்து தமிழுக்கு கவிக்கோவினால் அறிமுகம் செய்யப்பட்டது. கஸல் என்றால் காதலியுடன் பேசுதல் என பொருள்படுகிறது. உலகியல், ஆன்மிகம் சேர்ந்த கலவை. பெரும்பாலும் காதலின் சோகத்தைப் பாடுவது. 'சுவை புதிது, பொருள் புதிது சோதிமிக்க நவகவிதை' என்ற பாரதியின் கவிதை இலக்கணத்தை இக்கவிதை நூலில் காண முடிவது சிறப்பு. இக்கவிதைகளின் புதுமை நயம் கண்டு சினிமா பாடலாசிரியர்களும் கவிக்கோவின், கவி வரிகளைத் தமது பாடல்களில் எடுத்தாண்டுள்ளனர். 

காதல் என்பது

கண்ணாடியும் கல்லும்

ஆடும் ஆட்டம்

இந்தக் கவி வரிகளைப் பயன்படுத்தி நா. முத்துக்குமார் 'ஒரு கல் ஒரு கண்ணாடி' படத்தில் 'ஒரு கல் ஒரு கண்ணடி..| எனும் பாடலை எழுதி புகழ் பெற்றார். இப்படிப் பலரும் இந்நூலில் உள்ள கவிதைகளைப் பயன்கொண்டு பாடல்களை இயற்றியுள்ளனர். இதுதொடர்பாக கவிக்கோவும் தனது நூலில் குறிப்பிட்டுள்ளார். இந்நூலில் இருந்து சுவைமிக்க சில கஸல்களை வாசகரின் பார்வைக்கு வழங்கலாம் என்று நினைக்கிறேன்.

கூடுகட்டத்

தன் உதிர்ந்த

இறகுகளையே பொறுக்கும்

பறவையைப் போல

நான் உன்

நினைவுகளைப் பொறுக்குகிறேன்..

அரசு

முப்பத்துமூன்று சதவிகிதம்

சிவபெருமான் ஐம்பது சதவிகிதம்

நான் உனக்கு ஒதுக்கியதோ

நூறு சதவீதம்

இசையைப் போலவே

நீயும் எங்கிருந்து வருகிறாய்

என்பது தெரியவில்லை..

இலக்கியத் துறையில் உங்கள் எதிர்கால இலக்கு என்னவாக இருக்கும் என்பது குறித்துக் கூறுங்கள்?

வாசித்துக்கொண்டும் எழுதிக்கொண்டும் இறுதிவரை வாழ வேண்டும் என்பதே எனது தற்கால மற்றும் எதிர்கால இலக்காகும்.

உங்கள் கவிதைகளுக்கு கிடைத்த ஆதரவுகள் அல்லது வரவேற்புகள் பற்றிக் குறிப்பிட முடியுமா? 

எனது கவிதைகளைப் பத்திரிகைகள், சஞ்சிகைகள் உவந்தேற்று வெளியிட்டு உதவியுள்ளன. பலரும் பாராட்டி ஊக்குவித்துள்ளனர். முதல் நூலுக்கான கொடகே சாகித்திய விருது எனது ஹைக்கூ நூலுக்கு கிடைக்கப் பெற்றுள்ளது.

இந்நேர்காணல் மூலம் வேறு என்ன கூற விரும்புகிறீர்கள்?

என் இலக்கியப் பணிக்கு ஒத்துழைக்கும் அனைத்து உள்ளங்களுக்கும் நன்றிகளைத் தெரிவிக்கின்றேன். படைப்பாளர்கள் பொருளாதாரம் உட்பட பல தடங்கள்களுக்கு மத்தியிலேயே நூல்களை வெளியீடு செய்கின்றனர். அவர்கள் மனம் சோர்ந்து விடா வண்ணம் படைப்புகளுக்கு வாசகர்கள் என்றும் ஒத்துழைப்பாக இருக்க வேண்டும். எழுத்தாளுமை நிறைந்த சமூகமாக யாவரும் எழுர்ச்சி பெற வேண்டும். வெற்றி தலையையும் தோல்வி இதயத்தையும் தழுவாதிருக்கட்டும். (படித்ததில் பிடித்த சிந்தனை)

நேர்கண்டவர்:- வெலிகம ரிம்ஸா முஹம்மத்

33. கலாபூஷணம் பீ.ரீ. அஸீஸ் அவர்களுடனான நேர்காணல்

2021.10.31 செந்தூரம் இதழில் வெளிவந்த நேர்காணல் 

நேர்கண்டவர்:- வெலிகம ரிம்ஸா முஹம்மத்

இலங்கையின் சிரேஷ்ட எழுத்தாளர்களில் ஒருவரான கலாபூஷணம் பீ.ரீ. அஸீஸ் அவர்களுடனான நேர்காணல்

பீ.ரீ.அஸீஸ்:- எழுத்தாளர்கள் தமக்கான வாசகர்களை தக்கவைத்துக் கொள்வது அவசியமாகின்றது. அதற்கேற்ற வகையில் அவர்களின் எழுத்து நடை, கற்பனைத் திறன், யதார்த்த சிந்தனை, கருப்பொருள் என்பன சிறப்பாக அமைதல் அவசியமாகும்.

உங்களைப் பற்றிய அறிமுகத்தை எமது வாசகர்களிடம் பகிர்ந்து கொள்ளுங்கள்?

பீ.ரீ. அஸீஸ் என்ற பெயரில் இலக்கிய உலகிற்கு நன்கு பரீட்சயமான நான், கிழக்கு மாகாணம், திருகோணமலை மாவட்டம், கிண்ணியாவைப் பூர்வீகமாகவும் பிறப்பிடமாகவும் கொண்டுள்ளேன். பெரிய கிண்ணியா, ஆண்கள் பாடசாலை, கிண்ணியா மத்திய கல்லூரி என்பவற்றில் கல்வி பயின்று, அதன்பின்னர் உயர் தரக் கல்விகள் கற்று தேர்ச்சி பெற்றேன். 1981 ஆம் ஆண்டு சுகாதார சேவைகள் திணைக்களத்தின் தொழிநுட்பவியலாளர் சேவை பிரிவில் முதலாம் தர பொதுச் சுகாதார வெளியக உத்தியோகத்தராக பதவி வகித்தேன். 

எனது இளமைக் காலப்பகுதி இலக்கியத்தின்பால் பெரிதும் ஈர்ப்புக்கொள்ள வைத்தது. 1974 ஆம் ஆண்டில் 'பேசும் தெய்வம்' எனும் சிறுவர் பாடல் எனது முதலாவது படைப்பாக தினகரனில் வெளிவந்தது. 

2012 இல் கிழக்கு மாகாண சாகித்திய விருதும் 'சிறுவர் பாடல்கள்' என்ற எனது நூலுக்கே கிடைத்தது. இதுவரை சுமார் 20 க்குக் கிட்டிய நூல்களை வெளியீடு செய்திருக்கின்றேன். இவற்றில் சில மாகாண சாகித்திய விருதுகள் பெற்றுள்ளதோடு, தேசிய நூலக ஆவணவாக்கல் சேவைகள் சபை, கலாசார அலுவல்கள் திணைக்களம் என்பவற்றின் அங்கீகாரத்தையும் பெற்றுள்ளதுடன் நூலகங்களுக்குப் பொருத்தமான நூல் என்ற தரச் சான்றிதழும் கிடைக்கப் பெற்றுள்ளது. அத்தோடு பிரதேச, மாவட்ட, மாகாண மற்றும் தேசிய விருதுகள் பலவும் கிடைக்கப் பெற்றுள்ளன. 

ஈழத் தமிழ் இலக்கியத்துக்கு தங்களது பங்களிப்புகள் பற்றிக் குறிப்பிடுங்கள்?

ஈழத் தமிழ் இலக்கியத்தின் வளர்ச்சி, செழுமை என்பவற்றுக்கு என்னால் நிறையவே பங்களிப்புகள் செய்யப்பட்டுள்ளன. கவிதை, சிறுகதை, நாட்டாரியல், சிறுவர் படைப்புகள், சமய இலக்கியம், நூல் திறன் நோக்கு என்பன அவற்றில் சிலவாகும். ஒருவரது இலக்கியத்துக்கான பங்களிப்புகள் அதிகரித்துச் செல்லும் போது ஸ்தீரத் தன்மையும் வளர்ச்சிப் படிநிலையும் அதிகரித்துச் செல்லும்.

தாங்கள் எழுதும் கிராமியக் கவி, தாலாட்டுப் பாடல்கள் பற்றி..?

சுதந்திரத்துக்கு முந்திய காலப்பகுதியில் கிண்ணியாப் பிரதேசத்தை ஆக்கிரமித்திருந்த கிராமியக் கவிகள், தாலாட்டுப் பாடல்கள் என்பன காலப்போக்கில் மங்கி மறையத் தொடங்கியது. இதனால் அவைகளைத் தேடிப் பெற்று ஆவணப்படுத்தும் முயற்சியில் 2011 ஆம் ஆண்டளவில் நான் ஈடுபட்டு வந்த போது வாய்மொழி மூலக் கிராமியக் கவிகள் போல் எழுத்துருவிலான கவிகளும் எழுத வேண்டும் என்ற உந்துதல் எனக்குள் துளிர்விட்டது. 

ஆய்வாளர் அ. மார்க்ஸ் அவர்களின் கூற்று எனக்குள் ஒரு புதிய தோற்றப்பாட்டுக்கு காரணமாய் அமைந்தது. 'ஒரு சமூகம் எவ்வாறு பொருள் உற்பத்தி செய்யாதிருப்பது சாத்தியமில்லையோ அதேபோல் கலை இலக்கிய உற்பத்தி இல்லாமலும் இருக்க முடியாது' என்று அவர் குறிப்பிடுகிறார். இக்கூற்றினை நன்கு ஆராயும் போது வாய்மொழி நாட்டார் கவிகள் நிறைவு பெற்றுள்ளதென்றால் அதற்கு எழுத்துருவிலான புதிய வடிவம் கொடுப்பது அவசியமாகிறது. இதனடிப்படையிலேயே எனது நாட்டார் கவிகளும் தாலாட்டுப் பாடல்களும் தோற்றம் பெறத் தொடங்கின.

தாங்கள் இதுவரை எழுதி வெளியிட்ட நூல்கள் பற்றிக் குறிப்பிடுங்கள்?

நான் இதுவரை பின்வரும் நூல்களை வெளியிட்டுள்ளேன்.

        01.உணர்வூட்டும் முத்துக்கள் - 2011

02. சிறுவர் பாடல்கள் - 2011

03. அஸீஸ் கவிதைகள் - 2011

04. தாலாட்டுப் பாடல்கள் - 2012

05. நாட்டார் / கிராமியப் பாடல்கள் - 2012

06. உதயம் - 2012

07. மான்புறும் மாநபி - 2012

08. தென்றலே வீசி வா - 2014

09. சுட்ட பழமே சுவை அமுதே - 2014

10. மனசெல்லாம் மகிழ்கிறது - 2015

        11. துணிந்து நில் - 2015

12. சின்னப் பாப்பா - 2016

13. நினைவொன்றே போதும் - 2014

14. செவ்வானச் சித்திரம் - 2017

15. நபிகள் நாயகம் - 2017 (தொகுப்பு நூல்)

        16. மஞ்சள் குருவி - 2019

17. ஆரவுட்டுத் தேடுவதோ - 2020

போன்றனவாகும். இவைதவிர முதுமையில் விளைந்த புதுமைகள், நனவாகும் கனவுகள் போன்ற நூல்களும் விரைவில் வெளியிடப்பட்டுள்ளது. 

ஒருவரின் எழுத்தாற்றல் என்பது அவரின் அறிவு, ஆளுமை, புலமைத்துவம் என்பனவற்றை எடுத்துக் காட்டுவதாய் அமைகிறது. அந்தவகையில் தங்கள் எழுத்துக்களின் முக்கியத்துவம் எவ்வாறு அமைந்துள்ள? 

ஒருவரின் படைப்புகளை வாசிக்கும் போது அவருக்குள் இருக்கும் ஆற்றலின் கனதியைப் புரிந்து கொள்ளும் வாய்ப்பு ஏற்படுகிறது. யதார்த்தமாக அவை அமைகின்ற போது எழுத்துக்கள் ஜனரஞ்சகம் பெறுவதை உணரலாம். எனவே வாழும் தன்மையுடன் கூடிய சிறப்புக்குள்ளும் அவ்வெழுத்துக்கள் முக்கியத்தும் பெறத் தொடங்குகின்றன. 

அந்தவகையில் எனது எழுத்தாற்றல் கனதியும் கருத்தாழமும் கொண்டதாக அமைவதை என்னால் உணர முடிகிறது. குறிப்பாக நின்று நிலைத்திருக்கும் எழுத்துக்கள் சமூக ஆரோக்கியத்துக்கும் நலனுக்கும் வழிவகுக்கும் என்பதை அடிப்படையாகக் கொண்டே தற்போது எழுதி வருகின்றேன். உதாரணமாக 'முதுமையில் விளைந்த புதுமைகள்', 'நனவாகும் கனவுகள்' ஆகிய நூல்களில் உள்ள திறன் நோக்குகளை முகநூலில் பதிவு செய்த போது, அவை நல்ல வரவேற்பினையும் பாராட்டுக்களையும் பெற்றுத் தந்ததோடு வாசகர்கள் மத்தியில் பிரபல்யத்தையும் அறிமுகத்தையும் பெற்றுக் கொள்வதற்கு காரணமாய் அமைந்தது. இந்நூல்கள் தற்போது அச்சிடப்படுவதற்கான பூர்வாங்க ஏற்பாடுகள் நடைபெற்றுக் கொண்டிருக்கின்றன. 

தற்போதைய ஈழத்து கவிதை செல்நெறி பற்றிய உங்களது மதிப்பீடு?

தற்போதைய கால சூழல் கவிதைகளின் தோற்றத்திற்கும் அதன் வளர்ச்சிக்கும் காத்திரமானதாக அமைந்திருக்கிறது. பத்திரிகைகள், சஞ்சிகைகள், இனைய வழிகள் என கவிதைக்கான களமும் விரிந்து செல்கின்றது. இளம் தலைமுறைக் கவிஞர்கள் பெருமளவில் உருவாகியும் வருகின்றனர். அவர்களிடமிருந்து கனதியான படைப்புகள் உருவாக்கம் பெறுவதோடு, அவைகள் தேச, சர்வதேச ரீதியாக பேசப்படக் கூடியவையாகவும் இருக்கிறது. மூத்த எழுத்தாளர்கள் விட்டுச் சென்ற இலக்கிய இடைவெளியினை நிரப்புவதற்குரிய செயற்பாடுகள் இவர்களுடன் நிறைந்திருப்பதைக் காணக்கூடியதாக இருக்கிறது. 

உங்களது இலக்கிய முயற்சிகள் இன உறவுக்கு எத்தகைய பங்களிப்புகளை செய்யும் என்று நம்புகிறீர்கள்?

எனது இலக்கிய முயற்சிகள் இன, மத, குல வேறுபாடுகுளுக்கு அப்பாற்பட்ட விரிவு கொண்டவை. இன உறவுகளுக்கு என்றைக்குமே பக்கபலமாக இருப்பவை. நான் எழுதும் நூல் திறன் நோக்கிலும் முகநூலில் வெளிப்படுத்தும் ஆளுமைகளிலும் சகோதர சமூகத்தினருக்கே அதிக முக்கியத்துவம் கொடுத்து வருகிறேன். 

இலக்கியவாதிகளைப் பொருத்தவரை நான் அறிந்தவரையில் இன உறவுக்கு குந்தகமானவர்கள் இல்லை என்றே சொல்லலாம். அந்தளவு நல்ல குண இயல்புகளைக் கொண்டவர்கள் அவர்கள். இத்தகையவர்களுடன் இணைந்து எனது இலக்கியப் பணி தொடர்ந்து செல்கின்றபோது என்றைக்குமே இன உறவு பாதுகாக்கப்படும் என்று திடமாக நம்பலாம். 

சிறுவர் படைப்புகள் மீது உங்களுக்கு எவ்வாறு ஈடுபாடு வந்தது? சிறுவர் பாடல்கள் மற்றும் படைப்புகளை எழுதும்போது கவனிக்க வேண்டிய முக்கிய விடயங்கள் யாவை?

எனது தாயார் என்னை தூங்கச் செய்வதற்காக தாலாட்டும் போது அவை வந்ததாகக் கொள்ளலாம். ஏனெனில் தாயாரிடமிருந்து சிறுவர் பாடல்களையும் தாலாட்டையும் கற்றுக் கொண்டேன். இவைகள் காலப்போக்கில் எனது எழுத்து முயற்சிக்கு பெரிதும் துணைபுரிந்தன. சிறுவர் பாடல்கள் எழுதும்போது அவர்களின் மனோநிலை, செயற்பாடு மற்றும் விருப்பம் என்பன கவனத்திற் கொள்ளப்பட வேண்டும். அவர்கள் மீதான திணிப்புகள் இருக்கக் கூடாது. சிறுவர்கள் சுயமாக சிந்திப்பதற்கும் கற்பதற்கும் உரித்துடையவர்கள். இவற்றைக் கவனத்திற் கொண்டே சிறுவர் பாடல்கள் மற்றும் சிறுவர் படைப்புகள் அமைவது பொருத்தமானது. 

தமிழில் சிறுவர் இலக்கியத்தின் போக்குகள் பற்றி தாங்களின் கணிப்பீடு யாது?

தமிழில் சிறுவர் இலக்கியம் படைப்போர் குறைந்தளவிலே காணப்படுகின்றனர். இவர்களது எண்ணிக்கை 153 பேருடைய பெயர்கள் அடங்கிய பட்டியல் கலாநிதி ச. அருளானந்தம் எழுதிய 'ஈழத்தில் சிறுவர் இலக்கியம்' எனும் நூலில் குறிப்பிடப்பட்டுள்ளது. 

சிறுவர் என்போர் யார்? சிறுவர் இலக்கியம் எவ்வாறு அமைய வேண்டும்? அதன் போக்குகள், தனித்துவம் யாது? சிறுவர் இலக்கியம் படைப்போர் அறிந்திருக்க வேண்டிய திறன்கள், விடயதானங்கள் என்பது பற்றி சிறுவர் படைப்பிலக்கியவாதிகள் அறிந்திருக்க வேண்டியது அவசியமாகும். 

சிறுவர் இலக்கியம் பற்றி போதிய அறிவும் தெளிவும் உள்ளவர்களால் எழுதப்படும் சிறுவர் இலக்கியங்கள் அதிக வரவேற்பினைப் பெறுவதை அவதானிக்கலாம். சிறுவர் வாழ்வியலை மையமாகக் கொண்டு இவைகள் எழுதப்படுவதால் அதில் அதிக கவனம் செலுத்தப்படல் வேண்டும். இது புலமையும், தேர்ச்சியும் உள்ளவர்களால் மட்டுமே சாத்தியமாகும். 

ஈழத்து இலக்கியத்தின் இயங்கு நிலையும் நவீன இலக்கியத் திறனாய்வுப் போக்கும் வளர்ச்சிகளைக் காட்டுகிறதா? 

ஈழத்து இலக்கிய இயங்கு நிலையின் வளர்ச்சிப் போக்கு நன்றாகவே இருக்கிறது. யார் என்ன சொன்னாலும் சொல்லாவிட்டாலும் இலக்கியத்தின் வளர்ச்சிப் படிநிலை அதிகரித்தே காணப்படுகிறது. ஆங்காங்கே தொடர்ச்சியாக வெளிவந்து கொண்டிருக்கும் சஞ்சிகைகள், வலைத்தளப் பதிவுகளை இதற்கு ஓர் உதாரணமாகக் கொள்ளலாம். வாசகர் மத்தியில் இலக்கியத்தின் போக்கிற்கு மதிப்பும், ஆதரவும் இருக்கின்ற காரணத்தால்தான் இது சாத்தியமாகிறது.

இந்நிலையில் நவீன திறனாய்வுப் போக்கும் தற்போது வளர்ச்சி கண்டு வருவதை முகநூல் மற்றும் பத்திரிகைகள் வாயிலாக அவதானிக்கக் கூடியதாகவுள்ளது. இது ஆராக்கியமானதொரு வளர்ச்சிப் பாதையாகும். இவை பெரும்பாலும் பாராட்டு முறை விமர்சனம், நயவுரை விமர்சனம் என்ற அடிப்படையில் அமைந்திருப்பதும் கவனிக்கத்தக்கது. இவைகளை வைத்து நோக்கும்போது நவீன இலக்கியத் திறனாய்வுப் போக்கு வளர்ச்சி கண்டு வருகிறது என்று துணிந்து கூறலாம். 

கொரோனாக் கால ஓய்வு நேரங்களை எவ்வகையான இலக்கிய முயற்சிகளுக்குப் பயன்படுத்தினீர்கள்? 

கொரோனாக் கால ஓய்வு என்பது தொழிற் செயற்பாடுகளில் இருந்து ஓய்வு தருவதாக இருந்தாலும் மனதளவில் ஓய்வையோ, மகிழ்ச்சியையோ தருவதாக அமைந்திருக்கவில்லை. அதனால் பெருமளவில் இலக்கிய முயற்சிகளில் ஈடுபடும் வாய்ப்புகள் குறைவாகவே காணப்பட்டது. இருந்தும் பயமும் பீதியும் குறைந்திருந்த சிலவேளைகளில் நூல் திறனாய்வு, கிராமிய இலக்கிய ஆய்வு என்பன போன்ற இலக்கியப் பணிகளில் ஈடுபடும் வாய்ப்புகள் கிடைத்தது. அவற்றை சரியாகப் பயன்படுத்திக் கொண்டதில் முதுமையில் விளைந்த புதுமைகள், நனவாகும் கனவுகள் போன்ற நூல்கள் அச்சிடுவதற்குத் தயாராக உள்ளது.  கிடைத்த சந்தர்ப்பத்தை சரியாகப் பயன்படுத்திக் கொண்டதில் ஆய்வுகள் பற்றிய சரியான விளக்கங்களை தெரிந்து கொள்ளும் வாய்ப்பும் கிடைக்கப் பெற்றது.

இலக்கிய வாழ்வில் மறக்க முடியாத சம்பவம் ஒன்றைப் பகிர்ந்து கொள்ளுங்கள்?

1981 ஆம் ஆண்டு காலப் பகுதிகளில் இலக்கியத் துறையில் சிறப்புற்று விளங்கிய நான் பின்பு அதில் நின்று முற்றாக விழகியிருந்த போது சுமார் 30 வருடங்களின் பின்னர் 2011.06.04 ஆம் திகதி கிண்ணியா நகர சபையில் தனது பதவியேற்றல் வைபவத்தில் கவி பாடும் சந்தர்ப்பத்தை நகர பிதா டாக்டர். ஹில்மி மஃரூப் அவர்கள் எனக்கு வழங்கியிருந்தார். எதிர்பாராத அந்த சந்தர்ப்பம் காரணமாகவே எனது இலக்கிய உலக மீள் பிரவேசம் ஆரம்பமானது. அதிலிருந்து படிநிலை வளர்ச்சிகள் மேலோங்கி இன்று அனைவராலும் அறியப்பட்டதொரு எழுத்தாளராக விளங்கும் வாய்ப்புக் கிடைத்தது. இச்சம்பவம் என்னால் என்றைக்குமே மறக்க முடியாத ஒன்றாகும். 

இலக்கியத்தோடு சமூகப் பணிகளில் ஈடுபட்ட சந்தர்ப்பங்கள் பற்றி..?

இலக்கியத்தோடு மட்டும் நின்றுவிடாமல் சமூகப் பணிகளிலும் நிறையவே ஈடுபட்டிருக்கின்றேன். இளமைக் காலப்பகுதியில் முள்ளிப்பொத்தானையில் வாழ்ந்த சந்தர்ப்பத்தில் 1972 ஆம் ஆண்டு முற்போக்கு வாலிபர் மன்றம், முஹமதிய்யா கிராம அபிவிருத்திச் சங்கம் என்பவற்றில் தலைவராக இருந்து சிறப்பாக சமூக சேவைகள் பலவற்றைச் செய்துள்ளேன். மேலும் 1980, 1981 ஆம் ஆண்டு காலப் பகுதியில் வை.எம்.எம்.ஏ. இளைஞர் சேவைகள் மன்றத்தின் தலைவராக செயல்பட்டுள்ளதோடு, தற்போது சுமார் 10 வருட காலமாக விவசாய அமைப்பின் தலைவராகவும் இருந்து வருகின்றேன். 

2015 இல் முன்னோடிகள் கலை இலக்கிய வட்டத்தின் தலைவராகப் பதவியேற்று இலக்கியப் பணியாற்றி வரும் நிலையில் மாணவர்கள் மத்தியில் எழுத்துப் பயிற்சி, சித்திரம் வரைதல், வாசிப்பு என்பவற்றில் ஊக்கமளித்து பரிசில்களும் வழங்கி அவர்களை மேலும் உற்சாகப்படுத்தியுள்ளேன். இவைகளே எனது பொதுப் பணிகளின் செயற்பாடாக அமைந்துள்ளன. மேலும் பள்ளிவாயல் நம்பிக்கையாளர் சபையில் சுமார் 15 வருடங்களுக்கும் மேலாக தொடர்ச்சியாக செயற்பட்டு வந்துள்ளேன். 

இலக்கியத்தைப் பொறுத்தளவில் உங்களது நினைவில் பதிந்துள்ள மிக முக்கியமான நிகழ்வுகள் ஏதும் இருப்பின்?

எழுத்தாளர் வெலிகம ரிம்ஸா முகம்மத் எழுதிய 'விடியல்' நூல் வெளியீட்டு நிகழ்வு கொழும்பு தமிழ் சங்க சங்கரப்பிள்ளை மண்டபத்தில் நடைபெற்ற போது அதில் நானும் கௌரவ அதிதியாக கலந்து கொண்டு ரிம்ஸா முகம்மதின் இலக்கிய சேவைகளைக் கௌரவித்து பொன்னாடை போர்த்தி, "கலைமதி" பட்டம் வழங்கியமை, மேலும் எழுத்தாளர் பஸ்யால எஸ்.ஏ. இஸ்மத் பாத்திமா எழுதிய 'இரண்டும் ஒன்று', 'புதையல் தேடி' ஆகிய நூல் வெளியீட்டு நிகழ்வு கல்எலிய முஸ்லிம் மகா வித்தியாலயத்தில் நடைபெற்ற போது இரு நூல் வெளியீட்டு நிகழ்வுகளிலும் கௌரவ அதிதியாக பங்கேற்று எஸ்.ஏ. இஸ்மத் பாத்திமாவுக்கு எனது தலைமையிலான முன்னோடிகள் கலை இலக்கிய வட்டத்தினால் மாலையிட்டு "கவியரசி" பட்டம் வழங்கியதோடு, பொன்னாடை போர்த்தி வாழ்த்துப்பாவும் வாசித்த நிகழ்வுகள் என்னால் மறக்க முடியாத பதிவுகளாக இன்றும் மனத்திரையில் பதிந்திருக்கிறது. 

உங்களது இலக்கிய வாழ்வில் இதுவரை நீங்கள் பெற்ற பாராட்டுகள், பட்டங்கள், விருதுகள் யாவை?

எனது இலக்கிய வாழ்வில் பல்வேறு பட்டங்கள், பாராட்டுகள், விருதுகள் கிடைக்கப் பெற்றுள்ளன. இவைகள் எனது எழுத்து முயற்சிகளுக்குக் கிடைத்த அங்கீகாரமும் கௌரவமுமாகும். குறிப்பாக கலாபூஷணம், தேச கீர்த்தி, இலக்கிய வித்தகர், காவிய பிரதீபா, மக்கள் கவிஞர் போன்ற பல பட்டங்களும் அவற்றுக்கான விருதுகளும் கிடைக்கப் பெற்றுள்ளதுடன், கலை இலக்கியப் போட்டி நிகழ்வுகள் பலவற்றில் முதலாம், இரண்டாம், மூன்றாம் படிநிலை வெற்றி வாய்ப்புகளும் பாராட்டுகளும் பெறக்கூடிய சந்தர்ப்பங்கள் ஏராளமாகக் கிடைத்துள்ளன. 

அத்தோடு தேசிய மட்டத்தில் கவிதை, சிறுதை என்பவற்றுக்கு முதலாம், இரண்டாம் பரிசில்கள் கிடைத்ததுடன், தேசிய நூலக ஆவணவாக்கல் சேவைகள் சபையினால் நூலுருவாக்க வசதிகளும், நூலகங்களுக்குப் பொருத்தமான நூல் என்ற தரச் சான்றிதழ்களும் எனக்குக் கிடைக்கப் பெற்றுள்ளன. அத்தோடு மாகாண தேசிய மட்டங்களில் நூல் கொள்வனவும் என்னிடம் இருந்து பெற்றுக் கொள்ளப்பட்டது.

உங்களது பிரதேச இலக்கிய வளர்ச்சி பற்றிக் குறிப்பிடுங்கள்?

எங்களது பிரதேசமான கிண்ணியாவில் 1950 களில் இருந்துதான் எழுத்தாளர்கள் தோற்றம் பெறத் தொடங்கினர். அதற்கு முன்னைய காலப்பகுதியில் எண், எழுத்தறிவு உள்ளவர்கள் போதியளவு இல்லாமையால் படைப்பிலக்கியங்கள் தோற்றம் பெறுவதில் மந்த நிலை காணப்பட்டது. ஆனாலும் வாய்மொழி மூலமான கிராமிய இலக்கியம் நிறையவே தோற்றம் பெற்றிருந்தது. அதில் பலரும் பெரிதும் ஆர்வம் காட்டியும் வந்துள்ளனர். 

தினபதி சிந்தாமணி எழுத்துப் பண்ணையானது பல்வேறு இலக்கியவாதிகள் உருவாகக் காரணமாக அமைந்தது. அத்துடன் தினகரன், வீரகேசரி பத்திரிகைகளின் பக்க பலமும் ஆதரவும் அவர்களுக்குத் தொடர்ந்தும் கிடைத்து வந்தது. 

1972 - 1981 காலப் பகுதியில் நிறைய இலக்கியவாதிகள் தோற்றம் பெறத் தொடங்கினர். இது படிப்படியாக வளர்ச்சி கண்டு, இன்று கிண்ணியா பிரதேசம் இலக்கிய வளமும் செல்வாக்கும் உள்ள ஒரு பிரதேசமாக மிளிர்வதை அவதானிக்கலாம். இவர்களின் படைப்புகள் தேசிய, சர்வதேச மட்டங்களிலும் முக்கியத்துவம் பெற்று வருவதை அவதானிக்கும் போது மிகுந்த சந்தோஷமாக இருக்கிறது.

இளம் தலைமுறைப் படைப்பாளிகளின் கலை இலக்கிய முயற்சிகளுக்கு நீங்கள் எவ்வகையான ஆலோசனைகளை முன்வைக்கிறீர்கள்? 

இளம் தலைமுறை எழுத்தாளர்களுக்கு என்னைப் பொறுத்தவரை முன்வைக்கக்கூடிய ஆலோசனைகள் எதுவுமில்லை என்றே தோன்றுகிறது. அவர்கள் தமது பாட்டுக்கு இலக்கியம் படைத்துக் கொண்டு தமக்கான பாதையில் பயணிக்கின்றனர். அவர்கள் செல்வது புதிய இலக்கியப் பாதைப் பயணிப்பாகும். அதில் திருப்பங்கள் ஏற்படலாம். அதன் மூலம் இலக்கிய செழுமைக்கு வழிகள் திறக்கவும் படலாம். அவர்களின் நடை அவர்களுக்கானது.

இறுதியாக வாசகர்களிடம் பகிர்ந்து கொள்ளும் செய்தி என்ன? 

இலக்கியத்தைப் பொறுத்தவரையில் எழுத்தாளரைப் போல் வாசகர்களின் பங்களிப்பும் முக்கியமானது. மூத்த எழுத்தாளர்களுக்கு அவர்களுக்கான வாசகக் குழு இருந்தது. அதன் மூலமாக படைப்புகள் பிரபல்யம் பெறவும் பேசப்படவும் வாய்ப்புகள் கிடைக்கப் பெற்றன. இந்நிலையில் எழுத்தாளர்கள் தமக்கான வாசகர்களை தக்க வைத்துக் கொள்வது அவசியமாகின்றது. அதற்கேற்ற வகையில் அவர்களின் எழுத்து நடை, கற்பனைத் திறன், யதார்த்த சிந்தனை, கருப்பொருள் என்பன சிறப்பாக அமைதல் அவசியமாகும். 

நேர்கண்டவர்:- வெலிகம ரிம்ஸா முஹம்மத்

நேர்கண்டவர்:- வெலிகம ரிம்ஸா முஹம்மத்

நேர்கண்டவர்:- வெலிகம ரிம்ஸா முஹம்மத்

32. ஜே.எஸ்.கே.ஏ.ஏ.எச். மௌலானா அவர்களுடனான நேர்காணல்

ஜே.எஸ்.கே.ஏ.ஏ.எச். மௌலானா அவர்களுடனான நேர்காணல்

(ஜமாலியா செய்யத் கலீல் அவ்ன் அல் ஹாஷிமிய் மௌலானா)

நேர்கண்டவர்:- வெலிகம ரிம்ஸா முஹம்மத்

உங்களைப் பற்றிய அறிமுகத்தை எமது வாசகர்களுக்காகக் கூறுங்கள்?

ஜே.எஸ்.கே.ஏ.ஏ.எச். மௌலானா (ஜமாலியா செய்யத் கலீல் அவ்ன் அல் ஹாஷிமிய் மௌலானா) என்பது எனது பெயர். இலங்கையின் தென் மாகாணத்திலுள்ள, வெலிகமயிலிருந்து இரண்டு மைல்கள் தூரத்திலுள்ள வெலிப்பிட்டி எனும் சிற்றூரில் 1937 டிசம்பர் திகதி 20 இல் பிறந்தேன். எனது வயது ஐந்தாகும் போது ஆங்குள்ள சிறு பள்ளிக்கூடத்தில் என்னைக் கல்வி கற்பதற்காகச் சேர்த்தார்கள். ஆங்கு மூன்றாம் ஆண்டுவரை என் தாய் மொழியைக் கற்றேன். அங்கு அதற்குமேல் வகுப்புகள் அங்கு இருக்கவில்லை.

பின்னர் என் மதிப்பிற்குரிய தந்தையவர்கள் என்னை வெலிகாமத்திலுள்ள ஒரு பள்ளிக் கூடத்தில் ஐந்தாம் ஆண்டில் சேர்த்தார்கள். அதில் ஒரு வருடம் படித்த பின்பு அதன் பக்கத்தில் உள்ள ஒரு கனிஷ்டப் பாடசாலையில் ஆண்டு ஆறிலிருந்து ஆங்கிலக் கல்வி கற்றேன். அங்கு படித்து அரசுப் பரீட்சையில் சிரேஷ்ட வகுப்பில் சித்தியடைந்தேன். இதுவரை தமிழில் ஒவ்வொரு பாடங்களே படித்திருந்தேன்.

எனக்குத் தமிழ் கற்பித்த ஆசிரியர் ஒவ்வொருவரும் சிறந்த தமிழ் அறிவுள்ளவர்கள். எமது மதிப்பிற்குரிய தந்தையவர்களும் தமிழிலும், அரபி, ஆங்கிலம் முதலான ஏனைய கலைகளையும் நன்கு கற்றவர்கள். மதிப்பிற்குரிய தகப்பனார் அவர்கள் அறபியில் மிகத் தேர்ந்தவர். ஆதலால் அவர்களிடம் கசடறக் கற்கும் திறனையும் பெற்றேன்.

ஆங்கிலத்திலும் தமிழிலும் எஸ்.எஸ்.ஸி. சித்தியடைந்தேன். எனவே நம்மூர்ப் பக்கத்திலே உள்ள அகுரஸ்ஸை எனும் ஊரில் உள்ள போர்வை எனும் கிராமத்தில் ஒரு பள்ளிக் கூடத்தில் ஆங்கில ஆசிரியராகப் பதவியேற்றேன். அங்கு மூன்று வருடங்கள் கடமை புரிந்து, காலியில் இருந்த அரசினர் தமிழ் ஆசிரியர்ப் பயிற்சிக் கலாசாலை ஒன்றில் பயிற்சி பெற்றேன். இரண்டு வருடங்கள் கற்று முடிந்ததும் வெலிகாமத்தில் உள்ள அறபா பாடசாலையில் கற்பித்தேன். அதன்பின் எனக்கு ஓர் இடமாற்றம் கிடைத்தது. அது குருநாகலிலுள்ள பண்டார கொஸ்வத்தை எனும் ஊரில் உள்ள தமிழ்ப்  பாடசாலையாகும். அங்கு தலைமையாசிரியராகக் (அதிபராக) கடமை புரிந்தேன். அங்கு ஒரு வருடமே எனக்குக் கடமையாற்றக் கிடைத்தது. அதற்குப்பின் எனக்குப் பதவி உயர்வு கிடைத்தது. அங்கிருந்து சிலாபத்திலுள்ள கல்விப் பணிப்பகம் சென்றேன். நான் அங்கு வட்டாரக் கல்வி அதிகாரியாக ஐந்து வருடங்கள் பணி புரிந்தேன். அதன்பின் அநுராதபுரத்திலுள்ள கல்வி பணிப்பகத்திற்கு மாற்றம் பெற்றேன். அங்கும் பதினொரு வருடங்கள் பணி புரிந்தும் எனக்கு மாற்றம் கிடைக்காததால், அத்தொழிலை எறிந்து என் தொழில் தமிழ் தாய்க்கு பணி செய்து கிடப்பதே எனும் உயர் நோக்கில் தாயில்லம் வந்து சேர்ந்தேன். 

எமது தமிழ்ப் பணி எட்டாம் வகுப்பிலிருந்து ஆரம்பமாகத் தொடங்கிற்று. எல்லாருக்கும் உள்ள இயற்கைக் குணமென்னும் பொறாமை உறவினருக்குள்ளும் இருந்ததனால் யான் எதிர் நீச்சல் போட்டேன். கடவுள் நம்முடனிருந்தார். அக்காலத்தில் பத்திரிகைக்கு எழுதிய ஒரிரண்டு பாக்களே பிரசுரிக்கப்பட்டன. மற்றவை உறவினர்கள் திருவிளையாட்டுக்குள் மறைந்தன. 

நீங்கள் எப்போது, எந்த வயதில் எழுத்துத் துறைக்குள் நுழைந்தீர்கள்? உங்கள் பாடசாலை வாழ்க்கை, தொழில் அனுபவம் பற்றியும் குறிப்பிடுங்கள்?

என் வயது ஏழிலிருந்து என் இக்கைங்கரியத்தை கடவுள் ஆரம்பித்து தந்தார். எனது பாடசாலைத் தொழிலில் நான் பெற்ற அனுபவம் தொழிலைத்தீரச் செய்தல் என்பதாகும். பாடசாலையில் சக மாணாக்கரோடு ஒன்று கூடிப் பழகுவதில் பல அனுபவங்கள் உண்டாகின. ஒருவரின் குணம் மற்றவரின் குணத்திற்கும் பெரிதும் மாறுபட்டதாயிருந்தது. எவரெவருக்கு எவரெவர் பிடித்தமாயிருப்பாரோ அவர் குணத்திற்கேற்ப நண்பர்களைப் பிடித்துக்கொள்வர், உறவாடுவர். இந்தவகையில் புதுப் புது நட்புக்களைப் பிடித்துக்கொள்வதிலும், அவர்களுடன் படித்த பாடங்களை மீட்டிக்கொள்வதிலும் ஓர் அலாதியான இன்பம் உண்டாகிறது. இல்லத்தில் அடைந்து கிடப்பதைவிட பள்ளிக்குச் செல்வதில் மிகச் சந்தோஷமுண்டு. பாடசாலையில் படித்து வந்து பின்னர் ஆசிரியராகத் தொழில் கிடைத்ததும் ஒரு புது அநுபவம் உண்டாகியது. மாணாக்கர் மனதிற்கு ஏற்றபடி கற்பித்து மாணாக்கர் வெற்றியடையச் செய்வதில் பெரும் பெரும் அநுபவமுண்டானது. 

ஆசிரியராக பல்வேறு ஆண்டுகள் சேவை புரிந்த நீங்கள் மாணவர்களிடையே இலக்கிய வளர்ச்சியை அவதானிக்கக் கூடியதாக இருந்ததா?

மாணாக்கர் மிகச் சிலரிடத்தே இலக்கிய ஆர்வம் காணப்பட்டது. ஆசிரியராக பணிபுரிந்து வந்த காலத்தில் பலதரப்பட்ட மாணாக்கர் பயிலும் பள்ளியில் அவர்களின் குண, பழக்க வழக்கங்கள் மிக மிக வேறுபாடடைந்திருக்கும். இவர்களின் ஒரு பகுதியினர் கல்விக் கேள்விகளில் மிக விருப்பமுடையோராய்க் காண்பர். இப்படிப்பட்ட மாணாக்கர் சித்திரம் வரைதல், பாடல்கள் பாடல் முதலியனவற்றில் மிக்கச் சிறப்புடையோராய் காணப்படுவர். ஆசிரியர் மாணாக்கர் பலவகையிலும் முன்னேற்றமடைய இலக்கியத் திறன் வாய்ந்த ஆசிரியர்களும் காரணமாவர். ஆசிரியர்களில் மதிப்புக் கொண்ட மாணாக்கர் இலக்கியம் முதலான இன்பக் கலைகளில் முன்னேறுவர். இந்தவகையில் யானும் ஒருவராய் இருந்தமையால் என்னிடம் கற்றவர்கள், நல்ல இலக்கியப் பாடல்களைப் பாடுவதிலும் எழுதுவதிலும் சிறப்புற்றுத் தோன்றினர்.   

எத்தனை ஆண்டுகளாக கவிதைகளை எழுதி வருகின்றீர்கள்? மரபுக் கவிதைகள் பற்றி நீங்கள் என்ன சொல்வீர்கள்?

பல்லாண்டுகளாக தமிழ்க் கவிதைகள் எழுதி வருகிறேன். அளவிட்டுச் சொல்ல முடியாது. மரபுக் கவிதைகள் கற்பாரிடத்து உயர் நோக்கங்களையும், மொழியில் உயர்ச்சியையும் உண்டு பண்ணும். மரபுக் கவிதைகள் சட்டதிட்டங்களையும் அதனை உறுதியாகக் கடைபிடிக்கும் ஒரு நெறியையும் வாழ்க்கையில் உண்டு பண்ணும். மொழியறிவு விரிவடையும், பாட்டெழுத வேண்டும்; என்பதற்காக சிலர் கரடுமுரடாகவும் எழுதுவார்கள்.

மரபுக் கவிதைகளை நீங்கள் எப்படியான சந்தர்ப்பங்களில் எழுதுகின்றீர்கள்? இத்துறையில் நீங்கள் ஈடுபட வழிகாட்டியவர்கள் யாவர்?

எந்தச் சந்தர்ப்பத்திலும் நான் புதுக் கவிதைகளை உபயோகிப்பதில்லை. அதுவும் வேண்டின், பாரதியார் எழுதிய கிளிப் பாட்டு போல் இலக்கண வழுவின்றி எழுதுவேன். பாக்கள் வாழ்த்துகளாயினும் சரியே, எல்லாச் சந்தர்ப்பங்களிலும் நான் மரபுக் கவிதைகளையே எழுதுகிறேன். புராணங்கள் கவிதைகள் முதலான இவை யாவும் யாப்பிலக்கண அமைவோடு அமைவதையே நான் விரும்புகிறேன். சிறப்புமிக்கச் சங்க கால நூல்களும் சிறப்புமிக்க அவற்றின் உரைகளும் எனக்கு மிகவும் வழிகாட்டின. 

இதுவரை நீங்கள் வெளியிட்ட நூல்கள் பற்றிச் சுருக்கமாகக் குறிப்பிடுங்கள்?

புது வகைக் கவிதைகள் (பாரதியார் எழுதிய கவிதைகளைப் பின்பற்றியும்) நூல்கள் எழுதியுள்ளேன். உமர் (ரலி) புராணம் எனும் பெயருடன் ஒரு புராணம் எழுதியுள்ளேன். ஓரிலக்கண நூலும் எழுதியுள்ளேன். யாப்பிலும் ஒரு விளக்க நூல் எழுதியுள்ளேன். அந்தவகையில் இதுவரை இருபது நூல்களுக்கு மேல் எழுதியுள்ளேன். நான் வெளியிட்ட பல நூல்களுள், குறிஞ்சிச் சுவை, ஐங்குறுநூறு வரிசையில் பாலைவனம், நாயகர் பன்னிரு பாடல், ஈழவள நாட்டிற் பயிர் பெருக்க வாரீர், மஹானந்தலங்கார மாலை, அண்ணல் நபிகள் அற்புத அகில நாதர், இறையருட்பா, தாகி பிரபம், பாத்திமா நாயகியார் மாலை, உமர் (ரலி) புராணம் ஆகியவை இவற்றுள் சிலவாகும். எதிர்காலத்தில் இன்னும் பல நூல்கள் அச்சிடற்குள்ளன.

மரபுக் கவிதைகளை எழுதுவதில் பாண்டித்தியம் பெற்ற நீங்கள் புதுக் கவிதைகளை எப்படிப் பார்க்கின்றீர்கள்?

மரபுக் கவிதைகள் இலக்கண எல்லைகளுடன் அமைந்தவை. யாப்பிலக்கணம் தவறினால் அதனைப் பாவென்றே கூற முடியாது. எதுகையிருக்க வேண்டும், மோனையிருக்க வேண்டும். எதுகைக் கேற்ற மோனை வரவில்லையானால் அதிற் பாவிலக்கணப் பிழைப்பட்டுவிடும். இதில் ஓர் ஒழுங்கு முறையுண்டு. ஆனால் இன்று உலவும் புதுக் கவிதைகளில் எழுத்து, அசை, சீர், பந்தம், அடி தொடை முதலியன ஒழுங்கு முறையில் அமைந்ததாக இல்லை. அவைகளில் ஓர் ஒழுங்கு முறை காணப்படவில்லை. ஆதலால் புதுப்புது முறைகளை உண்டு பண்ணாமல் உள்ள யாப்பிலக்கணத்தையே கடைபிடித்து வருதல்தான் அவசியமாகிறது.

அக்காலங்களில் கவிஞர்கள் நிறைய இருந்தார்கள். அவர்கள் எழுதும் பாக்கள் யாவும் சிறப்புடையனவாயும் யாப்பிலக்கண அமைதியுடனும் இருந்தன. அவர்களுக்குத்தான் கவிஞர்கள், பண்டிதர்கள், வித்துவான்கள் என்ரெல்லாம் பட்டங்கள் வழங்கினர். இன்றோ இதைக் காண்பது அரிதிலுமரிது. அக்காலத்தில் பிழையாகப் பாடியவர்களின் காதுகள் துண்டிக்கப்பட்டன. 

கவிதைக்கு யாப்பிலக்கணம் இருத்தல் வேண்டும். அல்லாதன சொல்லாகவும் சீரற்ற சீராகவும் அமைந்திருப்பதும், அவர்களுக்குப் பெருங்கவிஞர் பட்டங்கள் அளிப்பதும், விந்தையாகவுள்ளது. யாப்பருங்கலம், யாப்பருங்கலக் காரிகை, முதலானவற்றைப் படித்து அறிந்து கொள்ளலாம். புதுக்கவிதைகள் என்பனவற்றை யான் பொருந்தவில்லை.  

'மரபுக் கவிதைகள் காலப்போக்கில் முற்றாக அழிந்துவிடும்' எனப் பரவலாகச் சொல்லப்படுகிறதே. இதுபற்றி நீங்கள் என்ன சொல்வீர்கள்?

மரபுக் கவிதைகள் பல்லாண்டுகளுக்கு முன்னேயே உற்பத்தியாயின. முதற் சங்கம் அழிந்த போதும் அவை அழியவில்லை என்பதை யாவரும் அறிவர். அவற்றை நினைத்தபடியெல்லாம் அழித்துவிட முடியாது. இது திண்ணம். புதுக்கவிதைகள் எனக் கூறிக்கொண்டு பலரும் எழுதத் தொடங்கிய போதும் அதனால் மரபுக் கவிதைகளையோ சங்க நூல்களையோ எவராலும் அழித்துவிட முடியாது. அவ்வாறு நினைப்போர் தற்பெருமைக்காகக் கூறிக் கொள்வாரேயாம். இப்போது பல இடங்களிலும் தமிழ்ச் சங்கங்கள் பல்கிப் பெருகி வருகின்றன. பட்டங்களும் கொடுக்கிறார்கள். இது பரவலாய் உள்ளதைக் காண்க. நாமும் இந்தியாவில் தமிழ்ச் சங்கம் அமைத்துள்ளோம். வாழ்க நற்றமிழ்! வாழ்க மரபுக் கவிதைகள்!!  

உங்களது படைப்புகளுக்கான வாசகர் வட்டம் எந்தளவில் உள்ளது?

எனது வாசகர் வட்டம் இலங்கை, இந்தியா, சிங்கப்பூர், மலேசியா மற்றெல்லலா நாடுகளிலும் உள்ளன. அதிகப் பேர் நம் நூல்களைக் கேட்டுப் படிப்பது மட்டுமல்லாது என்னை வினைந்து கேட்டு, கூட்டங்களும் வைக்கிறார்கள். எனது நூல்களை நிறையப் பேர் வாங்கிப் படிக்கிறார்கள். 

ஈழத்து எழுத்தாளர்களினதும் இந்திய எழுத்தாளர்களின் எழுத்துக்களுக்கிடையே நீங்கள் அவதானிக்கும் பிரதான ஒற்றுமை, வேற்றுமைகள் பற்றிச் சுருக்கமாகக் கூறுங்கள்?

நல்ல தமிழில் எழுதும் போது இந்திய எழுத்தாளர்கள் மத்தியிலும் இலங்கை எழுத்தாளர்கள் மத்தியிலும் ஒற்றுமை வேற்றுமைகளிரா.

இலங்கை எழுத்தாளர்களுடன் அல்லாது இந்திய எழுத்தாளர்களுடன் இணைந்து செயற்பட காரணம் என்ன?

இலங்கையில் கதவு தாழிடப்பட்டிருந்தது. புகுத முடியவில்லை. எனினும் இந்தியாவில் கதவு விரியத் திறக்கப்பட்டிருந்தது. ஆங்கு புகுதலில் எளிது கண்டேன். அதனாலேயே நான் எழுதும் நூல்களனைத்தும் ஆங்கேயே அச்சிடப்பட்டன, இப்போதும் அச்சிடப்பட்டுக் கொண்டிருக்கின்றன. அங்குதான் எனது நூல்களுக்கு அதிக வரவேற்புகள் இருந்தது. இதனாலேயே இந்திய எழுத்தாளர்களுடன் இணைந்து செயற்படக் காரணமாயிற்று.  

  

ஏனைய உள்நாட்டு எழுத்தாளர்களுடனான உறவுகள் எப்படியுள்ளது? எவ்வகையான எழுத்துகளை ஃ யாருடைய எழுத்துகளை அதிகம் வாசிக்கிறீர்கள்?

உள்நாட்டு எழுத்தாளர்களின் உறவு அதிகம் உண்டு. பாகுபாடில்லாமல் இலக்கியத் தமிழில் எழுதுவோர் எவராயினும் அவரின் ஆக்கங்களை யான் அதிகம் வாசிப்பேன்.

புராண இலக்கியங்களை இளந்தலைமுறை எழுத்தாளர்கள் வாசிப்பதாக நினைக்கிறீர்களா?

மிகக் குறுகியவர்களே வாசிக்கிறார்கள். இளந்தலைமுறைகள் அதிகம் கற்கிறார்கள் என்பது தெரிய வருகிறது. அவைகள் அவருடைய மதச் சார்புள்ளவைகள் ஆயின் முஸ்லிம் பிள்ளைகள் இதில் அதிகம் தொடர்பு வைப்பதில்லை. எவ்வாராயினும் அறிவு, நம் தமிழ் மொழி என்பதன் நிமித்தம் அவற்றைப் படித்தல் அவசியமாகும். தமிழ் படிப்பவர்களுக்குத் தமிழ் மிகமிக முக்கியமானதாகும். பல்வேறு வகையான நடைமுறைகளை தமிழில் கண்டுகொள்ளலாம். இதில் ஞானக் கலைகளும் உண்டு. கதைப் போக்குகள் நல்லதாயிருக்கும். ஆறுமுக நாவலர் எழுதிய தமிழ் நடைகள் போற்றத்தக்கன என்பேன். நல்ல நடைகள் தமிழில் உண்டு. முருகன் அல்லது அழகு முதலான நூல்களில் ஞானம், இலக்கியம் போன்றவைகள் வித்தாய்த் திகழும். 

நீங்கள் இதுவரை வாசித்த நூல்களில் உங்களைக் கவர்ந்த நூல் எது? ஏன்?

யான் இதுவரை வாசித்த நூல்களில் இலக்கியப் பாடல்கள், திருக்குறள், நாலடியார், கம்பராமாயணம் முதலான இன்னும் பல நூல்கள். அவைகள் இகத்தை மட்டும் குறிப்பிடாது அகத்தையும் கூறுகின்றன.

உங்களது ஆரம்ப கால இலக்கியத்துக்கும் தற்கால இலக்கியத்தக்கும் எவ்வாறான வேறுபாடுகள் காணப்படுகின்றது?

எனது ஆரம்ப கால இலக்கியம் சங்க கால இலக்கிய நூல்களுடன் தொடர்புடையது. எனது வயது பதினேழுக்கு மேல் மரபுக் கவிதைகள் எழுதுவதில் மிக்க ஆர்வங்கொண்டு எழுதி வந்தேன்.  அன்றிலிருந்து இன்றுவரை என்னால் எழுதப்படும் பாக்கள் யாவும் யாப்பிலக்கண அமைவு கொண்டுள்ளமையால் அன்றும் இன்றும் தரத்தில் ஒரே நிலைகொண்டது. யாப்பிலக்கண ஒழுங்கு முறைப்படியே புதுப் பாக்களையும் எழுதி வருகிறேன். பாட்டுக்கு எதுகையும் மோனையும் உயிர் போன்றவை. யாப்பிலக்கண வழுவின்றி பா வமைத்தலையே புலவர்கள் விரும்புவார்கள். முன்பைவிட இப்போது யாத்துவரும் இலக்கிய நூல்கள் மிக்கன. (அதிகம்) 

உங்களது எதிர்கால எழுத்து முயற்சிகள் பற்றிக் குறிப்பிடுங்கள்?

இதுவரை யான் செய்து வந்தவற்றுள் உள்ள மீதியைச் செய்து வருகிறேன். உமர் (ரலி) புராணம் 2ஆம் 3ஆம் பாகம், நன்னூலுக்கான விளக்கம் போன்றவற்றைக் குறிப்பிடலாம்.

சாதாரணமாக எழுத்தாளர் ஒருவரின் பணி எவ்வாறு இருக்க வேண்டும் என்று கருதுகின்றீர்கள்?

நம் பணி பணத்துக்காகவெனக் கருதாதிருத்தல் வேண்டும். பெருமைக் கெழுதாமல் இலக்கியங்களுக்கு  ஏற்ற தரத்தில் எழுதல் வேண்டும். சங்க கால இலக்கியத்துக்கு, அதன் தரத்திற்கு அமைந்த நடையில் எழுதல் வேண்டும். எவர் எதை வாசிக்கிறாரோ அவருக்கது பொருத்தமான நடையாக, அது அமைய வேண்டும். எவர் எதை விரும்புகிறாரோ அதற்கேற்ற விளக்கம் அதில் இருத்தல் வேண்டும். சிறந்த இலக்கியத்தை பத்திரிகைத் தமிழுடன் கலத்தல் நல்லதன்று என்பது எனது கருத்து. 

இலக்கிய வாழ்வில் இதுவரை உங்களால் மறக்க முடியாத சம்பவம் ஒன்றைக் குறிப்பிடுங்கள்?

என்னுடைய இலக்கண, இலக்கிய வழியிலே சிலர் வந்து முட்டித் தோற்றனர். ஒருவர் என்னிடம் வந்து நீங்கள் கடுமையாக எழுதுகிறீர்கள் என்றார். பாருங்கள்,

கற்கக் கசடறக் கற்பவை கற்றபின்

நிற்க அதற்குத் தக என எவ்வளவு இலகுவாக உள்ளது என்றார். 

உண்மைதான், மறுபுறம் பார்க்கும் போது,

துப்பார்க்குத் துப்பாய துப்பாக்கித் துப்பார்க்குத்

துப்பாய தூஉம் மழை எனவும் உள்ளது காண்க என்றேன், அவர் வாய் மூடிச் சென்றார். 

பல தசாப்த இலக்கிய வாழ்வில் உங்களுக்கு அல்லது உங்கள் படைப்புகளுக்கு இதுவரை கிடைத்த பாராட்டுக்கள், பட்டங்கள், விருதுகள் பற்றிக் குறிப்பிட முடியுமா?

இதுவரை நான் எழுதி வெளியிட்டவை பலவுண்டு. அவைகள் வெளிவந்த போதும் இதற்கான பட்டங்கள், பதவிகள் முதலானவற்றை எடுப்பதற்கான பகீரதப் பிரயத்தனங்களை நானோ எனது தோழர்களோ எடுக்கவில்லை. அவற்றை எமக்குத் தோவையெனக் கருதவுமில்லை. சிலருக்குக் கிடைத்த இடைவழிப் பட்டங்கள், மதிப்புரைகள் மட்டும் பெரிய புத்தகப் படங்களோடும் பெரிய நூல்களாகப் படங்களுடனும் அச்சிட்டுப் பெருமைப்பட்டுக்கொள்கிறார்கள். இப்படியான தற்பெருமைகளை நானோ எனது தோழர்களோ விரும்பவில்லை. 

எதிர்காலச் சந்ததிகளுக்கு நீங்கள் கூறும் அனுபவ மொழிகள் யாவை?

எதிர்காலச் சந்ததிகள் இலக்கணத் தமிழில் எழுத வேண்டும் எனக் கேட்டுக்கொள்கிறேன். அவர்கள் இலக்கண, இலக்கிய நூல்களையும் நன்கு கற்றல் வேண்டும். மனங்களுக்கேற்ற புதுப்புது கல்வியைத் தரும் கலைத் துறைக்கு உகந்த நல்ல விடயங்களை எழுதுதல் அவசியம். பார்த்ததையே பார்த்து பிரதி பண்ணாமல் மனதுக்கேற்ற நல்ல புதிய விடயங்களை எழுத்தாளர்கள் அமைத்துக் கொள்ளல் வேண்டும். நல்ல இலக்கியச் சொற்களை அமைத்துக்கொள்ளல் வேண்டும். சொல்லாராய்ச்சியோடு எழுதல் வேண்டும். பல்லுடைக்கும் தமிழ் என்றெல்லாம் கூறி கம்பராமாயணம், சீறாப் புராணம் முதலான மற்றும் சங்க கால இலக்கிய நூல்களை உதாசீனம் செய்யாதிருத்தல் வேண்டும். ஆயின் சொல் வளர்ச்சி குன்றி தாயினும் தந்தையினும் பேச்சு வழக்குகள் எம்மில் ஊன்றிவிடும். அதனை எளிய தமிழெனவும் சொல்ல முடியாது. கொச்சைத் தமிழ் வழக்கில் அது அமைந்துவிடும். இவையெல்லாம் கவனித்து எழுதுதலே இலக்கணத்துக்கும் இலக்கியத்துக்கும் தொண்டு செய்தல் எனவாகும். 

இறுதியாக என்ன சொல்ல விரும்புகிறீர்கள்?

நன்னூலை நல்லபடி கற்றுக் கொள்ளுங்கள். தொல்காப்பியத்தை படித்துக் கொள்ளுங்கள். இலக்கண வழுவின்றி நல்லபடி எழுதுங்கள். நல்ல இலக்கணம், இலக்கியம் முதலியவைகளுடன் வாழ்வைக் களியுங்கள், கழியுங்கள்.

வாழ்க தாய் மொழி!

பற்கலைகளும் வாழ்க!!

தமிழின எதிரிகள் வீழ்க!!!

நேர்கண்டவர்:- வெலிகம ரிம்ஸா முஹம்மத்